6
1 Zaakũ Luda zĩkɛri dakenↄn ó ũ, o kútɛ kɛ̀árɛ, àsun Luda gbɛ̃kɛ sí à a kɛ pãro. 2 Luda pì:
Ma n yã mà a gↄrↄa,
ma kpanyĩ surabana gↄrↄ.
Gↄrↄ kà sà, gbãramɛ surabana gↄrↄ pì ũ.
3 Odì yã kũ ani tó gbɛ̃ fu kɛro, de òsun ó zĩ taari lero yãi. 4 Odì ó zĩda mↄ gbɛ̃nↄnɛ zɛ́ sĩnda pínki gũn kũ Luda zĩkɛrinↄn ó ũ. Odì mɛna fↄ̃ manamana kũ takasio kũ wario kũ wɛ́tãmmanaao. 5 Ò ó gbɛ̃, ò ó ká kpɛ́siran, ò fùtɛwái. O zĩ gbãna kɛ̀, ódi le o i òro, nà ó dɛ́. 6 O mↄ̀ńnɛ kũ nɛ̀sɛpurao kũ dↄ̃naao kũ sùruuo kũ manakɛnaao kũ Luda Ninio kũ yenyĩ manafiki sario 7 kũ yãpura'onaao kũ Luda gbãnao. Ó yãmanakɛbↄnↄ kũna ó ↄplan kũ ó ↄzɛo. 8 Òdi ó kpe ta, òdi ó kpe bo. Òdi ó tↄ́ vãni sí, òdi ó tↄ́ nna sí. Yãpuradenↄn ó ũ, akũ òdi ó ditɛ manafikidenↄ ũ. 9 Tↄ́denↄn ó ũ, akũ òdi ó ditɛ lán gbɛ̃ kũ ò ń dↄ̃ronↄ bà. Ó bɛ̃nɛmɛ fá, akũ òdi ó ditɛ gɛ̀nↄ ũ. Òdi ó ditɛ pↄ́gbɛ̃nanↄ ũ, ama òdi ó dɛro. 10 Ó pↄ dìgↄ̃ nnamɛ, akũ òdigↄ̃ ó ditɛ pↄsiradenↄ ũ. Odì gbɛ̃nↄ kɛ aruzɛkɛdenↄ ũ dasi, akũ òdigↄ̃ ó ditɛ takasidenↄ ũ. Ó pↄ́ sĩnda pínki vĩ, akũ òdigↄ̃ ó ditɛ pↄ́saridenↄ ũ.
11 Kↄrintidenↄ, o yã òárɛ súsu, o ó nɛ̀sɛɛ wɛ̃̀árɛ. 12 Ódi ó nɛ̀sɛgũnyã utɛárɛro, ama a á pↄ́ ùtɛwɛrɛ. 13 Ma yã òárɛ lán ma nɛ́nↄ bà. Lákũ o ó nɛ̀sɛɛ wɛ̃̀árɛ nà, à á nɛ̀sɛ wɛ̃wɛrɛ lɛ se.
Àsun kɛ lɛɛlɛ kũ Yesusaridenↄoro
14 Àsun kɛ dokↄ̃nↄ kũ Yesusaridenↄoro. Yã mana bàka ũgba kũ a vãnioo? Bↄ́n gupura kũ gusirao vĩ kũ kↄ̃oo? 15 Kirisi yã ni kↄ̃ sí kũ Setan pↄ́o deramɛɛ? Deramɛ Yesude bàka nigↄ̃ kú kũ Yesusarideoo? 16 Luda kpɛ́ dì kↄ̃ sí kũ tãnanↄo yá? Zaakũ Luda Wɛ̃̀ndide kpɛ́n ó ũ, lákũ à ò nà:
Manigↄ̃ kú kũńwo, manigↄ̃ kure ń tɛ́,
manigↄ̃ de ń Luda ũ,
onigↄ̃ de ma gbɛ̃nↄ ũ.
17 Abire yãi Dikiri pì:
À kɛ̃ḿma, àgↄ̃ kú ádona,
àsun ↄ na pↄ́ gbãsĩaro,
mani á sí, 18 manigↄ̃ denɛ De ũ,
ánigↄ̃ de ma nɛ́gↄ̃gbɛ̃nↄ ũ kũ ma nɛ́nↄgbɛ̃nↄ.
Dikiri Gbãnasĩndapinkide mɛ́ à ò.