Luda yã takada kũ Bisã yão 2 SAMUƐLI 5

Dauda kana Isarailanↄ kpatan

1 Isarailanↄ sù ń buria ń pínki Dauda kĩnaa zaa Ɛblↄnu ò pì: Ó aru dokↄ̃nↄmɛ. 2 Zaa zĩ gↄrↄ kũ Solu de ó kína ũ, mↄkↄ̃mmɛ ndì dowɛrɛ arɛ zĩ̀lan, gɛna kũ sunaao. Akũ Dikiri pìnnɛ, mↄkↄ̃mmɛ ĩnigↄ̃ de a gbɛ̃ Isarailanↄ don'arɛde ũ, ń kína ũ. 3 Kũ Isaraila gbɛ̃ zↄ̃kↄ̃nↄ sù kína Dauda kĩnaa zaa Ɛblↄnu ń pínki, gwen à lɛ́dokↄ̃nↄ kɛ̀n kũńwo Dikiri arɛ, akũ ò nísi kù a mìia ò a kà Isarailanↄ kpatan. 4 Dauda wɛ̃̀ baraakuri vĩ gↄrↄ kũ à nà kíblenaaa, à vùtɛ kín wɛ̃̀ bupla. 5 À de Yudanↄ kína ũ zaa Ɛblↄnu wɛ̃̀ suppla kũ mↄ suddoo, akũ à de Yudanↄ kũ Isarailanↄ pínki kína ũ zaa Yurusalɛmu wɛ̃̀ baraakuri awɛɛ'aakↄ̃.

6 Kína kũ a gbɛ̃nↄ gɛ̀ɛ Yurusalɛmu de à zĩ̀ ká kũ Yebusi kũ ò kú gwenↄ. Akũ ò ò Daudanɛ: Ĩni gɛ̃ laro, bee vĩ̀nanↄ kũ ɛrɛnↄ oni pɛ́mma. Òtɛn da Dauda ni le à gɛ̃ gwero. 7 Bee kũ abireo Dauda wɛ̃tɛ bĩnide kũ òdi pi dↄ Zaiↄ̃ pìi sì, akũ à gↄ̃̀ a wɛ́ra ũ. 8 Zĩ birea Dauda pì: Tó gbɛ̃ ye à Yebusinↄ dɛdɛ, séde à gɛ̃ ízɛ kũ ò yↄ̃̀ gbɛ̀n gũn, ani ɛrɛnↄ kũ vĩ̀naa pìnↄ le. Dauda ibɛrɛnↄmɛ. Abire yãi òdi pi, vĩ̀nanↄ kũ ɛrɛnↄ oni gɛ̃ kínabɛaro. 9 Akũ Dauda bɛ kũ̀ wɛ̃tɛ bĩnide pìi gũn, à a zĩda tↄ́ kpànɛ, Dauda Wɛ̃tɛ. À kpɛ́nↄ bòbo à lìkai ari gu kũ ò wɛ̀ɛɛ tàtan, òdi pi Milo. 10 Dauda gbãna tɛn kara, zaakũ Dikiri Luda Zĩ̀karide kú kãao.

11 Taya kína Hiramu gbɛ̃nↄ zĩ̀ Daudaa kũ sida línↄ kũ lí'arinↄ kũ gbɛ̀'arinↄ, akũ ò bɛ bònɛ. 12 Akũ Dauda dↄ̃̀ sà kũ Dikiri a ka Isarailanↄ kína ũmɛ, akũsↄ̃ à a kpataa kàraárɛ kũ Isarailanↄn de Dikiri gbɛ̃nↄ ũ yãi.

13 Dauda bona Ɛblↄnu gbɛra à ɛ̀ra à nↄ pãndenↄ sɛ̀ à kàra Yurusalɛmu dↄ kũ nↄ yìgisaridenↄ, akũ à nɛ́gↄ̃gbɛ̃nↄ kũ nɛ́nↄgbɛ̃nↄ ì kũńwo. 14 Nɛ́gↄ̃gbɛ̃ kũ à ń í Yurusalɛmu pìnↄ tↄ́n dí: Samua, Sobabu, Natã, Sulemanu, 15 Iba, Ɛlisua, Nɛfɛgi, Yafia, 16 Ɛlisama, Ɛliada kũ Ɛlifɛlɛtio.

17 Kũ Filisitininↄ mà ò Dauda kà Isarailanↄ kína ũ, akũ ò gɛ̀ɛ òtɛni a wɛtɛ ò a dɛ ń pínki. Kũ à ń baaruu mà, akũ à gɛ̀ɛ sɛ̃̀ntɛpↄrↄtu. 18 Filisitininↄ zĩ̀'ↄ pòro Rɛfaimu guvutɛn, 19 akũ Dauda gbɛ̀ka Dikiria à pì: Mà gɛ́ mà lɛ́tɛ Filisitininↄa, ĩni ń namɛnɛ ma ↄĩ yá? Akũ Dikiri wèa à pì: Ǹ gɛ́, mani ń nannɛ n ↄĩ. 20 Akũ Dauda gɛ̀ɛ Baali Pɛrazimu, à zĩ̀i blèḿma gwe. Akũ à pì: Dikiri dòmɛnɛ arɛ, à bò à sù ma ibɛrɛnↄa bùi lákũ í dì gu fↄ̃ nà. Akũ à tↄ́ kpà gu pìinɛ Baali Pɛrazimu. 21 Filisitininↄ ń tãnanↄ tò gwe, akũ Dauda kũ a gbɛ̃nↄ sɛ̀tɛ ò tào.

22 Filisitininↄ ɛ̀ra ò sù dↄ, ò zĩ̀'ↄ pòro Rɛfaimu guvutɛn. 23 Akũ Dauda ɛ̀ra à gbɛ̀ka Dikiria dↄ. Akũ Dikiri wèa à pì: Ǹsun gɛ́ńyĩ súsuro. Ǹ likańyĩ kpɛ kpa ǹ lɛ́tɛḿma kpɛ̃̀ líkpɛ sarɛ. 24 Tó a gɛ̀sɛ kĩni mà lí pìnↄ musu, à kɛ likalika, zaakũ makũmɛ ma bo ma doárɛ arɛ gwe, de mà zĩ̀ bleárɛ Filisitini zĩ̀karinↄa yãi. 25 Dauda kɛ̀ lákũ Dikiri ònɛ nà, akũ à zĩ̀i blè Filisitininↄa sɛna zaa Gibiↄ̃ ari à gɛ̀ɛ pɛ́ Gɛzaa.