Luda yã takada kũ Bisã yão 2 SAMUƐLI 7

Luda lɛ́sɛna Daudanɛ

1 Kũ kína vùtɛ a bɛa, Dikiri a bò ibɛrɛ kũ ò likainↄ ↄĩ à a gbà ĩampaki, 2 akũ kína pì annabi Natãnɛ: É'e! Kpɛ́ kũ ò dↄ̀ kũ sida líon manigↄ̃ vutɛn, Luda àkpati gↄ̃ ditɛna bizakutan yá? 3 Natã wèa à pì: Lákũ à kɛ̀nnɛ nà ǹ kɛ, zaakũ Dikiri kú kũnwo. 4 Gwãani birea Dikiri yã sù Natãa à pì: 5 Ǹ gɛ́ ǹ o ma zↄ̀bleri Daudanɛ kũ ma pì, àkũ mɛ́ ani kpɛ́ kũ manigↄ̃ kun bomɛnɛro. 6 Zaa gↄrↄ kũ ma Isarailanↄ bↄ̀tɛ Misila ari gbãra mádi bɛ kũro. Madìgↄ̃ sↄ̃sↄ̃sↄ̃sↄ̃mɛ, bizakutamɛ ma kúki ũ. 7 Gu kũ ma sↄ̃sↄ̃n kũ ma gbɛ̃ Isarailanↄ ń pínki madì don'arɛdenↄ ditɛ ò dońnɛ arɛ, ama mádi o ń gbɛ̃kenɛ, bↄ́yãi adi kpɛ́ bomɛnɛ kũ sida líoro. 8 Ǹ gɛ́ ǹ o ma zↄ̀bleri Daudanɛ, ma Dikiri Zĩ̀karide ma pì, ma a sɛ̀ sãdãkia de àgↄ̃ de ma gbɛ̃ Isarailanↄ don'arɛde ũ. 9 Má kú kãao gu kũ à gɛ̀ɛn pínki, akũ ma a ibɛrɛnↄ dɛ̀dɛnɛ. Mani a tↄ́ bo manamana sà, anigↄ̃ kú andunia tↄ́denↄ tɛ́. 10 Mani bùsu kpá ma gbɛ̃ Isarailanↄa, mani ń kátɛn, oni vutɛn ń pↄ́ ũ. Ń laakari ni futɛ doro. Gbɛ̃ vãninↄ ni le ò wɛ́ tãḿma lákũ ò wɛ́ tã̀ḿma káaku 11 gↄrↄ kũ ma don'arɛdenↄ dìtɛńnɛ nà doro. Mani a bo a ibɛrɛ pìnↄ ↄĩ ń pínki.

Makũ Dikiri matɛn onɛ, makũ mɛ́ mani bɛ kɛnɛ a burinↄ gbãnaleki ũ. 12 Tó a gↄrↄ pàpa à gà, mani a buri kũ à bò a mɛ̀ɛn ke sɛ́ lei, mani a ká kpatan. 13 Àpi mɛ́ ani kpɛ́ bo kũ ma tↄ́ nigↄ̃ kúa, mani a kpatablena gbá pɛ́tɛ, anigↄ̃ kí ble ari gↄrↄ sĩnda pínki. 14 Manigↄ̃ denɛ De ũ, anigↄ̃ de ma nɛ́ ũ. Tó à taari kɛ̀, mani wɛ́ tãa kũ gòoomɛ, lákũ bisãsiri dì gbɛ̃ gbɛ̃ nà. 15 Ama ma gbɛ̃kɛ ni kɛ̃kↄ̃a kãao lákũ ma kɛ̃̀kↄ̃a kũ Solu kũ ma a bò Dauda arɛ nàro. 16 A burinↄ nigↄ̃ kpata ble gↄrↄ sĩnda pínki. A kpata pì nigↄ̃ lakana vĩro.

17 Akũ Natã yã pìi gbã̀ Daudanɛ lákũ Dikiri òarɛ nà pínki.

Dauda wɛ́kɛna Dikiria

18 Akũ kína Dauda gɛ̃̀ à vùtɛ Dikiri arɛ à pì: Dikiri Luda, bↄ́n ma ũu? Dínↄn ma bedenↄ ũ kũ n ma ka gwena dí takaaa? 19 Dikiri Luda, abirekũ bi yã fítimɛ n kĩnaa, akũ n makũ n zↄ̀bleri buri kũ onigↄ̃ kú zianↄ yã ò dↄ yá? Lɛn ndì kɛńnɛ lɛ yá, Dikiri Luda? 20 Dikiri Luda, mani pinnɛ deramɛ dↄↄ? Makũ n zↄ̀bleri ń ma dↄ̃. 21 N yã zↄ̃kↄ̃ↄ pìi kɛ̀ lákũ n pↄ yei nà yã kũ n ò yãi, akũ n tò makũ n zↄ̀bleri ma dↄ̃̀. 22 Dikiri Luda, ń zↄ̃kↄ̃ fá! Oni gbɛ̃ke lɛkↄ̃a kũnworo. N baasiro dikiri ke kunlo, lákũ o mà kũ ó são nà. 23 Dín oni lɛkↄ̃a kũ n gbɛ̃ Isarailanↄↄ? Andunia burinↄ tɛ́ buri mɛ̀n do pìin n bo n gɛ n bò, de ògↄ̃ de n gbɛ̃nↄ ũ. N n zĩda tↄ́ bò, n yã zↄ̃kↄ̃ bonsarɛnↄ kɛ̀ n gbɛ̃ pìnↄnɛ, n pɛ buri kenↄa kũ ń tãnanↄ n gbɛ̃ kũ n ń bó Misilanↄ arɛ. 24 N Isarailanↄ dìtɛ ògↄ̃ de n gbɛ̃nↄ ũ ari gↄrↄ sĩnda pínki. Dikiri, n gↄ̃ ń Luda ũ. 25 Dikiri Luda, lɛ́ kũ n sɛ̀ makũ n zↄ̀bleriinɛ kũ ma burinↄ yã musu, ǹgↄ̃ zĩ kɛa gↄrↄ sĩnda pínki. Ǹ kɛ lákũ n ò nà 26 de ǹ tↄ́ bo manamana ari gↄrↄ sĩnda pínki. Gbɛ̃nↄ ni pi Dikiri Zĩ̀karidemɛ Isarailanↄ Luda ũ. Makũ n zↄ̀bleri Dauda, ĩni ma burinↄ zĩni pɛ́tɛ, 27 zaakũ Dikiri Zĩ̀karide Isarailanↄ Luda, n òmɛnɛ n pì, ĩni ma bɛ kɛmɛnɛ ma burinↄ gbãnaleki ũ. Abire yãi makũ n zↄ̀bleri ma kùgbãna kɛ̀ ma wɛ́kɛ díkĩna kɛ̀mma. 28 Dikiri Luda, mↄkↄ̃mmɛ Luda ũ, n yã náani vĩ, akũ n yã mana dínↄ lɛ́ sɛ̀ makũ n zↄ̀bleriinɛ. 29 Ǹ arubarika da makũ n zↄ̀bleri burinↄgu sà, n wɛ́ nigↄ̃ tɛ́ńyĩ gↄrↄ sĩnda pínki. Dikiri Luda, n yã ò n arubarikaa dà makũ n zↄ̀bleri burinↄgu, onigↄ̃ arubarika vĩ ari gↄrↄ sĩnda pínki.