Luda yã takada kũ Bisã yão 2 SAMUƐLI 20

Sɛba bona Dauda kpɛ

1 Gaavude ke mɛ́ à kú gwe, a tↄ́n Sɛba, Bikiri nɛ́, Biliaminu burimɛ. Akũ à kuru pɛ̀ à pì:

Ó baka kú kũ Daudaoro,

ó bàka kú kũ Yɛsɛ nɛ́oro,

ákↄ̃nↄ Isarailanↄ, á baadi tá a bɛa.

2 Akũ Isarailanↄ kɛ̃̀ Daudaa ń pínki ò gɛ̀ɛ ò nà Bikiri nɛ́ Sɛbaa, ama Yudanↄ zɛ̀ kũ ń kínao bona zaa Yodai ari Yurusalɛmu. 3 Kũ Dauda sù a bɛa Yurusalɛmu, à a nↄ yìgisaride gbɛ̃nↄn kuri kũ à tò òtɛn bɛ gwanↄ sɛ̀ à ń ká bɛ ken ògↄ̃ ń dãkpã. Dauda ń gwá, ama adi wútɛ kũńwo doro. Ò ń káka kpɛ́n gyaanↄnↄ ũmɛ ari ò gɛ̀ɛ ò gàgao.

4 Akũ kína pì Amasanɛ: Ǹ Yuda zĩ̀karinↄ sísi ò kakaramai gↄrↄ aakↄ̃ dagura. Mↄkↄ̃n sↄ̃, ĩnigↄ̃ kú lamɛ. 5 Amasa gɛ̀ɛ à Yudanↄ sìsi, ama à gìi kɛ̀ de gↄrↄ kũ kína dìtɛnɛla. 6 Akũ Dauda pì Abisainɛ: Bikiri nɛ́ Sɛba ni wari dↄwá tera de wari kũ Abusalomu dↄ̀wála. Ǹ ma gbɛ̃nↄ sɛ́tɛ à pɛ́tɛi, de àsun sí wɛ̃tɛ bĩniden à piti ó ↄĩro yãi. 7 Akũ Yoabu gbɛ̃nↄ kũ kína dãkpãrinↄ kũ zĩ̀karinↄ ń pínki ò bↄ̀tɛ Yurusalɛmu ò pɛ̀tɛ Bikiri nɛ́ Sɛbai.

8 Gↄrↄ kũ ò kú gbɛ̀ gbɛ̃̀ntɛ̃ kũ à kú Gibiↄ̃ sarɛ, akũ Amasa sù dańlɛ. Yoabu zĩ̀ka'uta dana, a fɛ̃nɛ dↄna a pi. Kũ à nà Amasai, à fɛ̃nɛ pìi wòto a plɛn 9 à pìnɛ: Ma gbɛ̃, ń aafia yá? Akũ à Amasa kũ̀ a lɛ́kãsãa kũ a ↄ plao lákũ à ye à lɛ́ pɛ́aa bà. 10 Amasa dí fɛ̃nɛ kũ à kú Yoabu ↄn tàasi káro, akũ Yoabu a zↄ̃̀o a gbɛrɛn, a nukãninↄ bↄ̀tɛ à kàtɛ zĩtɛ. Yoabu dí ɛra à a plade zↄ̃̀ doro, zaakũ à gà kↄ̀. Akũ Yoabu kũ a dakũna Abisaio pɛ̀tɛ Bikiri nɛ́ Sɛbai.

11 Yoabu ìbanↄ do gↄ̃̀ zɛna Amasala à pì: Gbɛ̃ kũ à zɛ̀ kũ Yoabuo kũ Daudao, à do Yoabui. 12 Aru dana Amasa gɛ̀la zɛ́dan, akũ zĩ̀kari kũ òtɛn sunↄ zɛ̀ òtɛn gwa ń pínki. Kũ Yoabu ìbaa pìi è gbɛ̃ kũ òtɛn su gwenↄ ń pínki ò zɛ̀ òtɛn gwa, akũ à Amasa gɛ̀ɛ gàtɛ à gòo zɛ́n à dìtɛ sɛ̃̀n, akũ à uta kùala. 13 Kũ à gàtɛ à gòo zɛ́n lɛ, gbɛ̃ sĩnda pínki bò à tɛ̀ Yoabui, akũ ò Bikiri nɛ́ Sɛba gbɛ̀sɛ.

14 Sɛba lìka Isaraila burinↄ bùsuui pínki ari Abɛli Bɛtɛmaka, akũ Bɛri burinↄ sù ò kàkara ò tɛ̀i gwe. 15 Yoabunↄ sù ò lìkai zaa Abɛli Bɛtɛmaka. Ò bùsuu kàtɛkatɛ wɛ̃tɛ bĩni sarɛ, akũ òtɛn wɛtɛ ò bĩni pìi gboro. 16 Akũ nↄgbɛ̃ ↄ̃ndↄ̃de ke lɛ́ zù zaa wɛ̃tɛ gũn à pì: À sã kpá! À sã kpá! Ǹ o Yoabunɛ à su la, mà yã onɛ. 17 Kũ Yoabu nà nↄgbɛ̃ pìii, akũ à a là à pì: Mↄkↄ̃mmɛ Yoabu ũ yá? À wèa à pì: Makũmɛ! Akũ à pìnɛ: Ǹ sã kpá makũ n zↄ̀bleri yãi. À pì: Ma sã kpà. 18 Akũ nↄgbɛ̃ pìi pì: Òdi pi yã, ǹ yã gbɛka Abɛlidenↄa, yã le à mì dɛ. 19 Ó kun yãkete sari Isaraila gbɛ̃ náanidenↄ ũ, akũ ntɛn wɛtɛ ǹ Isaraila wɛ̃tɛ tↄ́de dí kakatɛ yá? Bↄ́yãi ń ye ǹ Dikiri wɛ̃tɛ dɛɛ? 20 Yoabu wèa à pì: Gyam! Oi! Má ye mà á dɛdɛro. Má ye mà á wɛ̃tɛ kakatɛro. 21 Lɛnlo! Gbɛ̃ kũ òdi pinɛ Bikiri nɛ́ Sɛba, Ɛflaimu burinↄ bùsu sĩ̀sĩde gbɛ̃ mɛ́ à fùtɛ kína Daudai. À gbɛ̃ mɛ̀n do pì kpáma, mani go á wɛ̃tɛla. Akũ nↄgbɛ̃ pìi pìnɛ: Ǹ ma! Oni a mì zunnɛ zaa bĩni musu.

22 Nↄgbɛ̃ pìi gɛ̀ɛ à a gbɛ̃nↄ lè kũ a ↄ̃ndↄ̃kɛo, akũ ò Bikiri nɛ́ Sɛba mìi zↄ̃̀ ò zù Yoabunɛ. Yoabu kuru pɛ̀, akũ ò fã̀kↄ̃a, ò wɛ̃tɛ pìi tò gwe. Baadi tà a bɛa, akũ Yoabu pìi tà kína kĩnaa Yurusalɛmu.

Dauda ìbanↄ

23 Yoabumɛ Isaraila zĩ̀karinↄ pínki gbɛ̃ zↄ̃kↄ̃ ũ. Yoyada nɛ́ Bɛnayamɛ dogarinↄ gbɛ̃ zↄ̃kↄ̃ ũ. 24 Adoniramumɛ zↄ̀nↄ gbɛ̃ zↄ̃kↄ̃ ũ. Ailudi nɛ́ Yosafatamɛ baarukpari ũ. 25 Sevamɛ takadakɛ̃ri ũ. Zadↄki kũ Abiataoomɛ sa'orikinↄ ũ. 26 Yairi gbɛ̃ Iramɛ Dauda kpàasi ũ.