1 Ó gbɛ̃nↄ, Yesu Kirisi suna kũ ó kↄ̃kakaranaao de ò daalɛ yã musu, o wɛ́ kɛ̀áwa, 2 àsun tó á laakari futɛ aragaro. Tó annabi yãke waazi ke takada kũ ò pì à bò ó kĩnaa pì, Dikiri sugↄrↄ kà kↄ̀, àsun bídi kɛro. 3 Àsun tó gbɛ̃ke á sãtɛ kũ yã bire takaoro, zaakũ gↄrↄ bire ni suro, séto gbɛ̃nↄ bona Luda kpɛ gↄrↄ kà gĩa kũ ludayãdarisari kũ à mìi pɛ̀ kakatɛna zɛ́a bona gupuraao. 4 Ani gí pↄ́ kũ òdi ń ditɛ dikiri ũnↄi kũ pↄ́ kũ òdi donyĩ kɛńnɛnↄ pínki, ani a zĩda bi deńla, ani gɛ́ à vutɛ Luda kpɛ́n, à a zĩda ditɛ Luda ũ se. 5 Gↄrↄ kũ má kú kãáo ma yã pìi òárɛ. Ádi dↄnloo? 6 Á dↄ̃ pↄ́ kũ àtɛni a dãdã de àsun bo a gↄrↄ ãro yá? 7 Zaakũ ludayãdanasari tɛn ↄ tá asiri gũn kↄ̀. Ani boro, séto gbɛ̃ kũ àtɛn kpánɛ gò zɛ́n baasiro, 8 ludayãdarisarii pì ni gbasa à bo sà. Dikiri Yesu ni a dɛ kũ a lɛ́'ĩao, à a kakatɛ kũ a suna gakurio. 9 Ludayãdarisari pì ni su kũ Setan gbãnao à daboyãnↄ kũ yãbonsarɛnↄ kɛ kũ sèeda ɛ́kɛ buri sĩnda pínkio. 10 Ani manafiki buri sĩnda pínki kɛ gbɛ̃ kũ ò mìi pɛ̀ kakatɛna zɛ́anↄnɛ, kũ ò gì yãpura kũ ani ń sura bai yãi. 11 Abire yãi Luda ni likarana pãsĩ zĩḿma de ò ɛ́kɛ náani kɛ. 12 Yã ni gbasa à vutɛ gbɛ̃ kũ odi yãpura síro kũ òdi pↄnna kɛ kũ a vãnionↄa ń pínki.

13 Ó gbɛ̃ Dikiri yenyĩdenↄ, à mana ògↄ̃ Luda sáabu kpá gↄrↄ sĩnda pínki á yã musu, zaakũ Luda á sɛ́ zaa káaku, de à bo kũ a Nini kũ à tò o gↄ̃ a pↄ́ ũ gbãnao á yãpura sina yãi. 14 Luda á sísi à á sɛ́ baaru nna kũ o kpàárɛ yãi, de á baka gↄ̃ kú ó Dikiri Yesu Kirisi gakuri gũn. 15 Abire yãi ó gbɛ̃nↄ, à zɛ gbãna, àgↄ̃ yã kũ o dàárɛ kũ lɛ́o ke takada gũn kũna. 16 Ó Dikiri Yesu Kirisi kũ Luda ó Deo yewái, a gbɛ̃kɛ gũn à ó laakarii kpàtɛwɛrɛ ari gↄrↄ sĩnda pínki, à tãmaa mana dàógu. 17 À á laakari kpátɛárɛ, à á gba gbãna yãmanakɛna kũ yãmana'onaao gũn pínki.