Luda yã takada kũ Bisã yão 2 TIMƆTI 2

Kirisi Yesu zĩ̀kari mana

1 Mↄkↄ̃n sↄ̃ ma nɛ́, ǹgↄ̃ gbãna kũ gbɛ̃kɛ kũ Luda vĩ kũoo Kirisi Yesu gũnwo. 2 Yã kũ n mà ma ò pari wára, ǹ na gbɛ̃ náanidenↄnɛ ń ↄĩ, kũ oni fↄ̃ ò dada gbɛ̃ pãndenↄnɛ. 3 Ǹ warikɛna fↄ̃ kũoo Kirisi Yesu zĩ̀kari mana ũ. 4 Andunia yã bↄkↄtɛnaa dì do zĩ̀kari kũ à kú zĩ̀lannɛ arɛro, de a yã ká a dikirigu yãi. 5 Bàkpakũsũri sↄ̃, tó adi bàa lɛ́ a zɛ́aro, ani zĩ̀blena fùra lero. 6 À kũ̀ búbari kũ à zĩ gbãna kɛ̀ a baka sɛ́ káaku. 7 Ǹ laasun lɛ́ yã kũ ma òo pìnↄa, zaakũ Dikiri ni n gba ↄ̃ndↄ̃ a pínki gũn.

8 Ǹ dↄn kũ Yesu Kirisi bi Dauda burimɛ, akũsↄ̃ à vù bona gan. Baaru nna kũ madì kpán gwe. 9 Abire yãin matɛn wari kɛ. Ò mↄ̀ↄ kàma lán dàkɛrii bà, ama Luda yã dí sí mↄ̀ káaro. 10 Abire yãi madì yã sĩnda pínki fↄ̃ gbɛ̃ kũ Luda ń sɛ́nↄ yãi, de mↄ́kↄ̃nↄ se Luda ń sura ba, ò gakuri kũ àdi lákaro le kunna Kirisi Yesu gũn. 11 Yã díkĩna bi yãpuramɛ:

Tó o ga kãao, ónigↄ̃ kú kãao.

12 Tó o mɛna fↄ̃̀, óni kí ble kãao.

Tó o ledi kpài, ani ledi kpáwái se.

13 Tó ó náani vĩro, à kpɛ́ náani vĩ,

zaakũ ani we à ledi kpá a zĩdairo.

Dikiri zĩkɛri mana kũ lɛ́kpakↄ̃anaaoro

14 Ǹ yã pìnↄ dↄ n gbɛ̃nↄgu, ǹ nańnɛ Ludai òsun lɛ́kpakↄ̃ana kɛ yãnↄ musuro. À àre vĩro, àdi gbɛ̃ kũ òtɛn manↄ yakamɛ. 15 Ǹ kokari kɛ de Luda n sáabu kpá, zĩkɛri kũ àdi yã yãpura wɛ̃kↄ̃ańnɛ súsu ũ, kũ wé'i dì a kũ a zĩ yã musuro. 16 Ǹ pã yãbↄtɛna pã kũ àdi kↄ̃ sɛ́ kũ Luda yãoronɛ. Àdi gbɛ̃nↄ ludayãdanasari karańnɛmɛ, 17 akũ yã kũ òdi dańnɛ dì dańla lán fↄ̃nna bà. Imɛnɛu kũ Filɛtuo kú ń tɛ́. 18 Ò kɛ̃̀ yãpuraa, òdi pi ò fùtɛ bona gan kↄ̀, òdi gbɛ̃kenↄ ludanaanikɛnaa yakańnɛ. 19 Bee kũ abireo ɛ̃ kũ Luda kpàtɛ zɛna gbãna, ò yã díkĩna kɛ̃̀a: Dikiri gbɛ̃ kũ ò de a pↄ́ ũnↄ dↄ̃. Gbɛ̃ kũ àdi Dikiri sísi mì kɛ̃ yã vãnia.

20 Ɔn da dìgↄ̃ pↄ́nↄ vĩ dasi. Ò a kenↄ kɛ̀ kũ wuraao kũ andurufuuo yãtikisikɛbↄ ũ, akũsↄ̃ ò a kenↄ kɛ̀ kũ lío kũ gbĩ̀io yãfitikɛbↄ ũ. 21 Tó gbɛ̃ ↄ bↄ̀tɛ yã bɛ̀ɛrɛsari gũn, ani gↄ̃ yãtikisikɛbↄ ũ, anigↄ̃ anfãni vĩ Dikirinɛ, anigↄ̃ kú adona yãmanakɛna pínki soru gũn. 22 Ǹ bàa sí kɛfɛnna pↄ́nidɛnanↄnɛ, ǹ tó manakɛna kũ ludanaanikɛnaao kũ yenyĩo kũ kunna kũ kↄ̃o nnao donnɛ arɛ lɛɛlɛ kũ gbɛ̃ kũ òdi Dikiri sísi kũ nɛ̀sɛpuraonↄ. 23 Ǹ ↄ bↄtɛ mìsari lɛ́kpakↄ̃ana kũ à dↄ̃na ke vĩron. Ń dↄ̃ kũ àdi fìti da. 24 À mana Dikiri zↄ̀bleri gↄ̃ fìti vĩro. A nɛ̀sɛ gↄ̃ do kũ gbɛ̃ sĩnda pínkio, yãdannɛri mana kũ àdi gbɛ̃ fↄ̃ ũ, 25 à gbɛ̃ kũ òdi a yã síronↄ gba laakari busɛbusɛ. Òdigↄ̃ dↄ̃ro ke Luda ni fↄ̃ à ń gba zɛ́ ò nɛ̀sɛ litɛ ò yãpura sí, 26 ò bo Ibilisi kũ à ń kũ à ń dá a pↄyenyĩnaa gũn bàn, ń laakari suḿma.