5
Isirelibɑ, i de i gɔ̃ru gɔsiɑ
1 Bɛɛ Isirelibɑ, i swɑɑ dɑkio i nɔ gɔɔ swĩi yi nɑ mɔ̀ bɛɛn sɔ̃.
2 Bɛɛ be i wɔrumɛ temɔ nge wɔndiɑ be bɑ gu,
i ǹ mɑɑ seemɔ.
Goo sɑri wi u koo bɛɛ seeyɑ.
3 Domi Yinni Gusunɔ u geruɑ u nɛɛ,
bɛɛn wuu ge gɑ tɑbu durɔbu nɔrɔbu (1.000) mɔ,
bɑ̀ n tɑbu dɑ, tɔmbu wunɔbuwɑ (100) bɑ koo wurɑmɑ.
Ge gɑ mɑɑ tɑbu durɔbu wunɔbu mɔ,
tɔmbu wɔkurɑ bɑ koo tiɑ.
I wurɑmɑ Gusunɔn mi
n sere dɑ̃kuru ko
4 Wee ye Yinni Gusunɔ u mɑɑ bɛɛ Isirelibɑ sɔ̃ɔmɔ.
U nɛɛ; ì n kĩ i n wɑ̃ɑ, wiyɑ i ko kɑsu.
5 I ku mɑɑ sɑ̃ɑru dɑ Betɛliɔ kɑ Giligɑliɔ kɑ Beri Sebɑɔ.
Domi u koo de bu Giligɑligibu yoru mwɛɛri.
Kpɑ bu Betɛligibu kɑm koosiɑ.
6-7 Bɛɛ be i rɑ gem gɔsie weesu,
kpɑ i kun mu gɑrisi gɑ̃ɑnu,
i nɑ wi, Yinni Gusunɔn mi,
kpɑ i wɑ i n wɑ̃ɑ,
kpɑ u ku rɑɑ bɛɛ Isirelibɑ wɔri u mwɑ nge dɔ̃ɔ.
Kpɑ i goo biɑ Betɛliɔ wi u koo dɔ̃ɔ wi go.
8 Yinni Gusunɔwɑ u kperi bwese bwesekɑ kuɑ,
mɑ u yen bɑɑyere yi yen ɑyerɔ.
U rɑ yɑm wɔ̃kuru gɔsie yɑm bururɑm.
Kpɑ u de sɔ̃ɔ sɔɔ gu tĩrɑ, gu gɔsiɑ wɔ̃kuru.
U rɑ nim wɔ̃kun nim mɛnnɛ,
kpɑ u mu yɛ̃kɑnɑ tem kpuro sɔɔ.
9 Wiyɑ u rɑ dɑmgibun dɑm bue.
Kpɑ u de bu ben wusun gbɑ̃rɑnu kɔsuku.
Kɑ gem, win yĩsirɑ Yinni Gusunɔ.
10 Bɛɛ Isirelibɑ, be bɑ bɛɛ sirimɔ dee dee,
i rɑ n bu tusɑ,
kpɑ i n kɑ wi u gem gerumɔ kɔ̃ruɑ.
11 I rɑ bwɛ̃ɛbwɛ̃ɛbu dɑm dɔre,
i n ben gbeɑn dĩɑnu mwɛɛrimɔ kɑ dɑm.
Yen sɔ̃, i ǹ sinɑmɔ bɛɛn diɑ sɔɔ
ye i bɑnɑ kɑ kpee ni i dɑ̃kɑ.
Mɛyɑ i ǹ mɑɑ bɛɛn resɛm ye i duurɑn bii duronun tɑm nɔrumɔ.
12 Domi u bɛɛn torɑnu yɛ̃ nu kpɑ̃,
u mɑɑ yɛ̃ mɑ i durum kuɑ too.
I gemgibu nɔni sɔ̃ɔmɔ.
I nɔm birɑn kɛ̃nu mwɑɑmɔ.
Mɑ i yinɑmɔ bu sɑ̃ɑrobu ben gem wɛ̃ siri yerɔ.
13 Sɑnɑm mɛni, sɑnɑm kɔ̃sumɑ.
Yen sɔ̃, wi u lɑɑkɑri mɔ, wiyɑ u ko n nɔɔ mɑɑri.
14 I de i n geɑ mɔ̀ n kun mɔ kɔ̃sɑ.
Kpɑ i wɑ i n wɑ̃ɑ.
Nge mɛyɑ Gusunɔ wɔllu kɑ tem Yinni u ko n kɑ bɛɛ wɑ̃ɑ nge mɛ i rɑ gere.
15 I kɔ̃sɑ tusio kpɑ i geɑ kĩɑ.
I de gem mu siribu di siri yerɔ.
Sɔrɔkudo Gusunɔ, wɔllu kɑ tem Yinni u koo bɛɛ Isirelibɑn tɔn be bɑ tiɑrɑ wɔnwɔndu kuɑ.
16 Yen sɔ̃, Gusunɔ wɔllu kɑ tem Yinni u geruɑ u nɛɛ,
tɔmbɑ koo gɔɔ wuri ko yɑm kpuro,
kpɑ bɑ n sumɔ swɛɛ sɔɔ, bɑ n mɔ̀, wee, wee!
Bɑ koo gbɑɑ wukobu sokumɑ bu gɔɔ wooru sinɑ,
kpɑ bu gɔɔ swĩigibu mɛnnɑmɑ.
17 Sɑnɑm mɛ u koo bɛɛ wɔrimɑ,
kɑ be bɑ wɑ̃ɑ gberɔ kpuro bɑ koo gɔɔ swĩwɑ.
Yinni Gusunɔwɑ u yeni geruɑ.
Yinni Gusunɔn siribun tɔ̃ru
18 Bɔ̃rurobɑ bɛɛ be i Yinni Gusunɔn siribun tɔ̃ru mɑrɑ.
Mbɑ i yĩiyɔ i wɑ tɔ̃ɔ te sɔɔ.
I n yɛ̃ mɑ tɑ ko n sɑ̃ɑwɑ yɑm wɔ̃kuru, n ǹ mɔ yɑm bururɑm.
19 I ko i n sɑ̃ɑwɑ nge tɔnu wi u gbee sunɔ dukɑ suurimɔ,
mɑ u kɑ yɑɑ gɔbɑ gɑɑ yinnɑ.
Ye u duɑ win dirɔ u gɑnɑ nɛnuɑ,
mɑ wɑɑ yɑ nùn dɔmɑ.
20 Yinni Gusunɔn tɔ̃ɔ te, tɑ sɑ̃ɑwɑ yɑm wɔ̃kuru n ǹ mɔ yɑm bururɑm.
Tɑ tĩriwɑ niki niki, yɑm bururɑm sɑri.
Sɑ̃ɑ te Yinni Gusunɔ u tusɑ
21 Yinni Gusunɔ u nɛɛ, u bɛɛn tɔ̃ɔ bɑkɑ ni i rɑ nùn diiye tusɑ.
U ǹ mɑm mɑɑ kĩ u bɛɛn mɛnnɔsun woo nɔ.
22 Ì n nùn yɑ̃ku dɔ̃ɔ mwɑɑrɑrugiru kuɑ kɑ mɑɑ kɛ̃nu,
u ku rɑ nu mwɛ.
Mɛyɑ u ku rɑ mɑɑ bɛɛn siɑrɑbun yɑ̃kunu mɛɛri
ni i rɑ ko kɑ yɑɑ sɑbe ni nu gum mɔ.
23 I kɑ bɛɛn womusun wɔkinu doonɔ win bɔkun di.
U ǹ mɑɑ kĩ u bɛɛn mɔrɔkunun wurenu nɔ.
24 Adɑmɑ i de gem mu n wɑ̃ɑ bɛɛn suunu sɔɔ,
mu n kokumɔ nge nim mɛ mu ku rɑ kpe.
25 Bɛɛ Isirelibɑ, i kɑ kuɑ wɔ̃ɔ weeru gbɑburu sɔɔ, i nùn yɑ̃kunu kɑ kɛ̃nu kuɑre nge mɛ? 26 Bũu wi bɑ mɔ̀ Sɑkutu wi i gɑrisi bɛɛn sunɔ kɑ sere kperɑ ye i sɑ̃ɑmɔ i mɔ̀ Kewɑni, i nin bwɑ̃ɑroku ni i tii kuɑ sɔɔre nge mɛ i sɔɔwɑ gisɔ? Bɛɛn tii i yɛ̃ mɑ i ǹ koore mɛ.
27 Yen sɔ̃, u koo de bu bɛɛ yoru mwɛɛri
bu kɑ dɑ sere Dɑmɑsin berɑ giɔ.
Wi, Gusunɔ wɔllu kɑ tem Yinniwɑ u yeni geruɑ.