1 Kũ Musa yã dínↄ ò Isarailanↄnɛ à làka, 2 à pì: Tera dí bà ma ka wɛ̃̀ basuddo, mani fↄ̃ mà doárɛ arɛ doro. Dikiri pìmɛnɛ mani bikũ Yodaaro. 3 Dikiri á Luda mɛ́ ani doárɛ arɛ à bikũ. Ani buri kũ ò kú gwenↄ kakatɛárɛ de à ń bùsu sí. Yↄsua mɛ́ anigↄ̃ doárɛ arɛ sà lákũ Dikiri ò nà. 4 Dikiri ni kɛ buri pìnↄnɛ lákũ à kɛ̀ Amↄrinↄ kínanↄnɛ nà Siↄ̃ kũ Oguo kũ ń bùsuuo kũ à ń kákatɛ. 5 Dikiri ni ń naárɛ á ↄĩ áni kɛńnɛ lákũ ma dìtɛárɛ nà pínki. 6 À á laakari kpátɛ àgↄ̃ wↄ́rↄgↄ vĩ! Àsun tó vĩna á kũro, àsun tó swɛ̃̀ kɛ̃águ ń yãiro, zaakũ Dikiri á Luda mɛ́ àtɛn gɛ́ kãáo. Ani á tónlo ani pã kpááiro.

7 Akũ Musa Yↄsua sìsi Isarailanↄ wára ń pínki à pìnɛ: Ǹ zɛ gbãna ǹgↄ̃ wↄ́rↄgↄ vĩ, zaakũ mↄkↄ̃n mɛ́ ĩni gɛ́ kũ gbɛ̃ dínↄ bùsu kũ Dikiri la dà ń dizi káakunↄnɛ à pì áni kpáḿma gũn. Mↄkↄ̃n mɛ́ ĩni bùsuu pìi kpaatɛtɛńnɛ. 8 Dikiri mɛ́ ani donnɛ arɛ. Àkũ mɛ́ anigↄ̃ kú kũnwo, ani n tónlo ani pã kpányĩ zikiro. Ǹsun tó vĩna n kũro ǹsun bídi kɛro.

9 Musa doka pìi kɛ̃̀ takada gũn à kpà sa'ori Levi buri kũ òdigↄ̃ Dikiri bàka kunna kũńwo àkpati sɛnanↄa kũ Isaraila gbɛ̃ zↄ̃kↄ̃nↄ ń pínki. 10 Musa yã dìtɛńnɛ à pì: Wɛ̃̀ supplapla gbɛra, wɛ̃̀ kũ òdi fĩnadenↄ kɛ̃ Kutadↄna dikpɛgↄrↄa, 11 tó Isarailanↄ sù ò ń zĩda mↄ̀ Dikiri ń Ludanɛ ń pínki gu kũ ani sɛ́ gũn, àgↄ̃ doka takada díkĩna kyó kɛńnɛ ò ma. 12 Àgↄ̃ ń kakara, gↄ̃gbɛ̃nↄ kũ nↄgbɛ̃nↄ kũ nɛ́ fítinↄ kũ bòasu kũ ò kú á wɛ̃tɛnnↄ, de ò ma ò dada, ò le ògↄ̃ Dikiri á Luda vĩna vĩ, ògↄ̃ dokayã pìnↄ kũna pínki ògↄ̃ zĩ kɛa. 13 Ń nɛ́ kũ ò yã pì dↄ̃ronↄ ni ma, onigↄ̃ vĩnakɛna Dikiri á Ludanɛ dada gↄrↄ kũ á kú bùsu kũ átɛn bikũ Yodaa à gɛ́ sí pìi gũn.

14 Dikiri pì Musanɛ: N gagↄrↄ kà kĩni. Ǹ Yↄsua sísi à gɛ́ zɛ dakarɛkia, mani zĩ nanɛ a ↄĩ. Akũ Musa kũ Yↄsuao gɛ̀ɛ ò zɛ̀ dakarɛkia. 15 Dikiri bò à sùḿma gwe tɛ́luku kũ à zɛna kuta pì kpɛ́lɛlɛaa gũn. 16 Akũ Dikiri pì Musanɛ: Tó n ka n dizinↄla, gbɛ̃ pìnↄ ni futɛ ò pãpã kɛ ò do bùsu kũ òtɛn gɛ̃n tãnanↄi. Oni pã kpámai ò ma bàka kunna kũńwo yã gboro. 17 Zĩ pìia mani pↄ fɛ̃ńyĩ mà pã kpáńyĩ, mani kpɛ lińnɛ ò ń kakatɛ. Kisianↄ ni wí ń musu dasi ò wari kɛ. Zĩ pìia oni pi: Kisira pìnↄ wì ó musu kũ ó Luda kú kũooro yãinloo? 18 Zĩ pìian mani kpɛ lińnɛ yã vãni kũ ò kɛ̀ yãi, ò arɛ dↄ̀ tãnanↄa.

19 Ǹ lɛ̀ díkĩna kɛ̃ takadan sà ǹ dada Isarailanↄnɛ ò sí, de àgↄ̃ demɛnɛ ń bona ma kpɛ sèeda ũ. 20 Tó ma gɛ kũńwo bùsu kũ ma la dà ń dizi káakunↄnɛ gũn, bùsu kũ vĩ kũ zↄ́'io din pìi, tó ò kã̀ ò mɛ̀ɛ kpà, oni arɛ dↄ tãnanↄamɛ ò ń gbagba. Oni pã kpámai ò ma bàka kunna kũńwo yã gboro. 21 Tó kisira pìnↄ ń lé dasi òtɛn wari kɛ, lɛ̀ɛ pì mɛ́ ani ń yã vãni káńnɛ ń ↄĩ, zaakũ a yã ni sã ń burinↄguro. Má yã kũ à kú ń nɛ̀sɛn gbãra dↄ̃ ari màgↄ̃ gɛ́ kũńwo bùsu kũ ma la dàńnɛ gũn. 22 Musa lɛ̀ɛ pìi kɛ̃̀ takadan zĩ pìia, akũ à dà Isarailanↄnɛ.

23 Dikiri yã dìtɛ Nuni nɛ́ Yↄsuanɛ à pì: Ǹ laakari kpátɛ ǹgↄ̃ wↄ́rↄgↄ vĩ! Mↄkↄ̃n mɛ́ ĩni gɛ́ kũ Isarailanↄ bùsu kũ ma la dàńnɛ gũn, akũsↄ̃ makũ manigↄ̃ kú kũnwo.

24 Kũ Musa dokayã pìnↄ kɛ̃̀ takadan à làka pínki, 25 à yã dìtɛ Levi buri kũ òdigↄ̃ Dikiri bàka kunna kũńwo àkpati sɛnanↄnɛ à pì: 26 À doka takada díkĩna sí à ditɛ Dikiri á Luda bàka kunna kãáo àkpatii sarɛ, àgↄ̃ kú gwe á bona Dikiri kpɛ sèeda ũ. 27 Zaakũ má á sãgbãna dↄ̃, lákũ adì gí yãi nà. Zaa gↄrↄ kũ má kú kãáo adìgↄ̃ bo Dikiri yã kpɛmɛ ari kũ a terao. Oni ma ga gbɛra pↄ́ o dↄ yá? 28 À á buri gbɛ̃ zↄ̃kↄ̃nↄ kũ á don'arɛdenↄ kakaramɛnɛ, de mà yã dínↄ dańnɛ ń sãn, ludambɛ kũ zĩtɛo nigↄ̃ de ma sèedadenↄ ũ á yã musu. 29 Zaakũ má dↄ̃ kũ áni á zĩda yaka ma ga gbɛra, áni kɛ̃ zɛ́ kũ ma mↄ̀árɛa. Abire gbɛra kisira ni á le, zaakũ áni yã kũ à vãni Dikirinɛ kɛ, ani pↄ fɛ̃ái tãna kũ a kɛ̀nↄ yãi.

30 Akũ Musa lɛ̀ɛ pì yã dà Isaraila kũ ò kakarananↄnɛ ń sãn mámmam.