12
1 Ǹ tó n Kɛ̀ri yã gↄ̃ dↄngu n kɛfɛnnakɛgↄrↄ zĩ
ari gↄrↄ vãni gɛ́ ká,
ari wɛ̃̀ kũ ĩni pi ntɛni a nna ma doroa.
2 Ǹ tó a yã gↄ̃ dↄngu
ari ifãntɛ̃ kũ gupurao gↄ̃ lago,
ari mↄvura kũ susunɛnↄ gↄ̃ sira kũ,
ari legũmanaa gbɛra guweresari gↄ̃ gɛ́ su.
3 Gↄrↄ birea n ↄnↄ nigↄ̃ lukaluka,
n gbánↄ ni koko,
n pↄ́sobↄnↄ ni kámma bo kũ ò dasi doro yãi,
n gugwabↄnↄ ni gu e ń wondoo gũn dãadãa.
4 N lɛ́ nigↄ̃ nakↄ̃ana gãnulɛa,
wísilↄgbɛ kĩni ni busɛ kũnnɛ.
Bãnↄ wiki ni n vu in,
nↄkparenↄ lɛ̀ ni kɛnnɛ busɛ.
5 Ĩni vĩna kɛ guleinɛ kũ kurena zɛ́ gũnwo,
n mìkã ni pura kũ lán desu vú bà.
Ĩni n zĩda gátɛ lán kwa táa'onaa bà,
pↄ́ke ni n mɛ̀ futɛ doro,
zaakũ bisãsiri dì gɛ́ a gɛ́kiamɛ,
akũ ↄ́ↄdↄrinↄ dìgↄ̃ kure gãnulɛa.
6 Ǹ tó n Kɛ̀ri yã gↄ̃ dↄngu
ari n andurufu bà gↄ̃ gɛ́ kɛ̃,
ari n wura ta gↄ̃ gɛ́ kpakoto kũ,
ari n í lo gↄ̃ gɛ́ wíwi,
ari n lↄ̀gↄ guga gↄ̃ gɛ́ wí,
7 ari n bùsutiti gↄ̃ ɛra à gɛ́ gɛ̃ zĩtɛn,
gu kũ à bòn,
ari n nini gↄ̃ gɛ́ tá
Luda kũ à kpàmma kĩnaa.
8 Makũ laasunde ma pì:
Yã pã búgubugu,
a pínki pãmɛ.
Yã pì lakanaa
9 Abire gbɛra lákũ laasunde pì ↄ̃ndↄ̃ nà, à dↄ̃naa dàdańnɛ. À laasun lɛ̀ à kpátɛ kɛ̀ yãi, akũ à yáasinↄ lɛ̀ dasi. 10 À kpátɛ kɛ̀ yã manai, akũ a yã pìnↄ kɛ̃̀ a zɛ́a, akũsↄ̃ yãpuramɛ.
11 Ɔ̃ndↄ̃ri yãnↄn de
lákũ gò kũ òdi pↄ́kãdenↄ lɛ́o bàmɛ,
ń yã'onanↄn de
lán koosa kũ ò pà gínginnↄ bà.
Sãdãri mɛ̀n do mɛ́ à yã pìnↄ dà.
12 Ma nɛ́, ǹ laakari kɛ, ǹsun yãke karanlo. Òdi takadanↄ kɛ̃ dasidasi, à lɛ́ vĩro. Kyókɛna zↄ̃kↄ̃ sↄ̃ àdi mɛ̀ɛ kpasamɛ. 13 Ò a pínki mà, a mìdɛnaan dí:
Ǹ vĩna kɛ Ludanɛ,
ǹgↄ̃ a yãditɛnanↄ kũna,
zaakũ gbɛ̃ sĩnda pínki yãn gwe.
14 Luda ni yãkpatɛ kɛ ó yã sĩnda pínki musu,
kũ yã kũ utɛnaao pínki,
bee a mana ke a vãni.