Luda yã takada kũ Bisã yão BONAA 5

Musa kũ Harunao gɛna Firi'auna arɛ

1 Abire gbɛra Musa kũ Harunao gɛ̀ɛ ò Firi'auna lè ò pìnɛ: Yã kũ Dikiri Isarailanↄ Luda òon dí. À pì ǹ a gbɛ̃nↄ gbarɛ ò gɛ́ dikpɛ kɛarɛ gbárannan. 2 Firi'auna wèḿma à pì: Dímɛ Dikiri ũ kũ mà a yã ma mà Isarailanↄ gbarɛɛ? Má Dikiri dↄ̃ro. Mani Isarailanↄ gbarɛro. 3 Akũ ò pìnɛ: Eberunↄ Luda bò à sùwá. Ǹ ó gba zɛ́ ò gɛ́ ò gↄrↄ aakↄ̃ kɛ gbárannan ò sa o Dikiri ó Luda pìia, de àsun gyã káwáiro kesↄ̃ zĩ̀i. 4 Akũ Misila kína pìi pì Musanɛ kũ Harunao: À kɛ̀ dera a tò gbɛ̃nↄ laakari tɛn go ń zĩaa? À ɛra á zĩa. 5 Akũ à ɛ̀ra à pì: Kũ gbɛ̃nↄ dasi kũ̀ sà, akũ á ye ò kámma bo kũ ń zĩo yá?

6 Zĩ birea Firi'auna yã dìtɛ Isaraila wɛ́tãmmarinↄnɛ kũ ń don'arɛdenↄ à pì: 7 Àsun sɛ̃̀buru kpáḿma ò kúnku kɛo lákũ adì kɛ nà yã doro. Ò gɛ́ ò ń pↄ́ kɛ̃ ń zĩda. 8 Ama ò kúnku kɛ lákũ òdi kɛ nà yã lɛ́n. Àsun lagońnɛro, zaakũ ma'ãdenↄmɛ. A yã mɛ́ à tò ń wiki dìgↄ̃ dↄ, òtɛn pi ò ye ò gɛ́ sa o ń Ludaamɛ. 9 À zĩ karańnɛ de òsun ĩampaki le ò laakari kpá ɛ́kɛyãnↄa doro.

10 Akũ ń wɛ́tãmmarii pìnↄ kũ ń don'arɛdenↄ sù ò pìńnɛ: Firi'auna pì òsun sɛ̃̀buru kpááwa doro. 11 À gɛ́ à wɛtɛ á zĩda gu kũ áni len. Bee kũ abireo óni zĩ lagoárɛro, bee fíti. 12 Akũ ò fã̀kↄ̃a ò gɛ̀ɛ Misila gu sĩnda pínki sɛ̃̀ kɛ̃ sɛ̃̀buru ũ. 13 Ń wɛ́tãmmarii pìnↄ dìgↄ̃ nakaraḿma lákũ gu dìgↄ̃ dↄ nà, de ò ń zĩ láka lákũ òdi láka nà gↄrↄ kũ òdi sɛ̃̀buru kpáḿma. 14 Ò gbɛ̃naa kɛ̀ Isaraila don'arɛde kũ ń wɛ́tãmmarinↄ dìtɛnↄnɛ ò pìńnɛ: À kɛ̀ dera ádi kúnku kɛ gbãra ke gĩa à kà lákũ ò a lɛ́ dìtɛárɛ nà yãroo? 15 Akũ Isaraila don'arɛdenↄ gɛ̀ɛ ò wiki lɛ̀ Firi'aunaa ò pì: À kɛ̀ dera ntɛn kɛ ókↄ̃nↄ n zↄ̀blerinↄnɛ lɛɛ? 16 Òtɛni sɛ̃̀buru kpáwá doro, akũ òtɛn pi ò kúnku kɛ. Òtɛni ó gbɛ̃, ama n gbɛ̃nↄ mɛ́ ò taari vĩ. 17 Akũ à pì: Ma'ãdenↄn á ũ. Lɛn á de lɛ! A yã mɛ́ à tò adìgↄ̃ pi áni gɛ́ sa o Dikiria. 18 À gɛ́ zĩ kɛ. Oni sɛ̃̀buru kpááwa doro, bee kũ abireo áni kúnku kɛ lákũ ò dàárɛ nà lɛ́a.

19 Kũ ò ò Isaraila don'arɛdenↄnɛ òsun gↄrↄ do kúnkubona lagoro, ò dↄ̃̀ kũ ò yã è sà. 20 Kũ ò bò Firi'auna kĩnaa, ò dàkarɛ kũ Musao kũ Harunao, òtɛni ń dã, 21 akũ ò pìńnɛ: Dikiri á yã gwa à yãkpatɛ kɛ kãáo, zaakũ a tò Firi'auna kũ a gbɛ̃nↄn ye ó kãiro. A ó dɛna zɛ́ kpàḿman gwe. 22 Akũ Musa ɛ̀ra à gɛ̀ɛ à pì Dikirinɛ: Dikiri, bↄ́yãi n wari dↄ̀ gbɛ̃ pìnↄaa? Abire yãin n ma zĩ yá? 23 Zaa gↄrↄ kũ ma gɛ ma yã ò Firi'aunanɛ kũ n tↄ́o, akũ àtɛn wari dↄ n gbɛ̃nↄa, akũ ńdi ń bo sↄ̃ro bi!

BONAA
<
5
>