1 Dikiri yã ò Musanɛ à pì: 2 Àgↄ̃ Isaraila daudunↄ kũ pↄ́kãde nɛ́ sà káakunↄ kpáma, zaakũ ma pↄ́nↄmɛ ń pínki.

3 Musa pì Isarailanↄnɛ: Á bona Misila zↄ̀blen gↄrↄ díkĩna yã gↄ̃ dↄágu, zaakũ Dikiri mɛ́ à á bↄ́tɛ Misila kũ a ↄ gbãnao. Àsun pↄ́futɛna só gↄrↄ pìiaro. 4 Átɛn bↄtɛ Misila gbãramɛ mↄ káaku kũ òdi pi Abibu gũn. 5 Dikiri lɛ́ sɛ̀ á dizinↄnɛ à pì áni bùsu kũ à vĩ kũ zↄ́'io din, kũ Kanaanↄ kũ Itinↄ kũ Amↄrinↄ kũ Ivinↄ kũ Yebusinↄn kun kpááwa. Tó à tò a ka, à dikpɛ pì kɛ mↄ dín. 6 Àgↄ̃ burodi futɛnasari só ari gↄrↄ suppla. A gↄrↄ supplade pì zĩ nigↄ̃ deárɛ Dikiri dikpɛ gↄrↄ ũ. 7 Àgↄ̃ burodi futɛnasari só ari gↄrↄ suppla pì papa. Pↄ́futɛna ke lùbɛnɛ ke súngↄ̃ kú ↄn ke gũn á bùsunlo. 8 Zĩ pìia àgↄ̃ o á nɛ́gↄ̃gbɛ̃nↄnɛ átɛn kɛ lɛ yã kũ Dikiri kɛ̀árɛ kũ à á bↄ́tɛ Misila yãimɛ. 9 Dikpɛ pì nigↄ̃ deárɛ sèeda ũ lán pↄ́ dana ↄaa bà, ke lán dↄngu pↄ́ yĩna mì'arɛaa bà, de Dikiri doka gↄ̃ kú á lɛ́n, zaakũ àkũ mɛ́ à á bↄ́tɛ Misila kũ a ↄ gbãnao. 10 Àgↄ̃ dokayã pì kɛ a gↄrↄa wɛ̃̀ kũ wɛ̃̀ɛo.

11 Tó Dikiri tò a ka Kanaanↄ bùsun, akũ à kpàáwa lákũ à a lɛ́ sɛ̀árɛ nà kũ á dizinↄ, 12 àgↄ̃ á daudunↄ kpáa ń pínki. Á pↄ́kãde nɛ́ sà káakunↄ dìgↄ̃ de a pↄ́ ũ ń pínki. 13 Àgↄ̃ á zaaki nɛ́ sà káaku tↄrↄma bo kũ sãnɛo. Tó ádi boro, à a waka fĩ. Àgↄ̃ á daudunↄ tↄrↄma bo ń pínki. 14 Tó á nɛ́gↄ̃gbɛ̃nↄ á lá a mìii zia ò pì, bↄ́ yãn gwee, à pińnɛ Dikiri á bↄ́tɛ zↄ̀blen Misila yã kũ a ↄ gbãnao yãimɛ. 15 Kũ Firi'auna kùgbãna kɛ̀ à gì ó gbarɛi, akũ Dikiri Misila daudunↄ dɛ̀dɛ ń pínki kũ pↄ́kãde nɛ́ sà káakunↄ ń pínki. A yã mɛ́ à tò odì sa oa kũ pↄ́kãde nɛ́ sà káakunↄ pínki, odì ó daudunↄ tↄrↄma bo. 16 Adikĩna nigↄ̃ de sèeda ũ lán pↄ́ dana ó ↄaa bà ke pↄ́ yĩna ó mì'arɛaa bà, zaakũ Dikiri mɛ́ à ó bↄ́tɛ Misila kũ a ↄ gbãnao.

17 Kũ Firi'auna Isarailanↄ gbàrɛ, Luda dí bo kũńwo Filisitini bùsu zɛ́ kparo, bee kũ a kãnikɛo, zaakũ à pì: Tó ò fùtɛńyĩ kũ zĩ̀io, oni ǹ nɛ̀sɛ litɛ ò ɛra Misila. 18 Luda pã̀ zɛ́ pìinɛ, akũ à gbáranna zɛ́ sɛ̀ kũńwo Isira Tɛ̃ra kpa. Isarailanↄ bↄ̀tɛ Misila ò ń zĩ̀kabↄnↄ kũna.

19 Musa Yusufu wánↄ sɛ̀ àtɛn táo, zaakũ Yusufu tò Isarailanↄ lɛ́ sɛ̀arɛ yã à pì, tó Luda sù ń bo, oni a wánↄ sɛ́tɛ ò boo gwe.

20 Kũ ò bò Suko, ò gɛ̀ɛ ò bùraa kàtɛ gbáranna lɛ́a zaa Etamu. 21 Dikiri dìgↄ̃ dońnɛ arɛ tɛ́luku gũn fãnantɛ̃ de àgↄ̃ zɛ́ mↄńnɛ. Gwãani sↄ̃ àdigↄ̃ dońnɛ arɛ tɛ́nɛnɛ gũn, de àgↄ̃ gu puńnɛ ògↄ̃ táa o fãnantɛ̃ kũ gwãanio. 22 Tɛ́luku pìi dì go ń arɛ fãnantɛ̃ro, tɛ́nɛnɛ pìi dì go ń arɛ gwãaniro.