Luda yã takada kũ Bisã yão BONAA 40

Bizakuta sakɛnaa

1 Dikiri pì Musanɛ: 2 Ǹ kuta dↄ kũ à de dakarɛki kuta ũ mↄ káakun gↄrↄ káaku zĩ 3 ǹ àkpati kũ doka gbɛ̀ anlonↄn kú a gũn ditɛn ǹ lábure kpái. 4 Ǹ gɛ̃ kũ teburuo ǹ a tanↄ kátɛa zɛ́azɛa. Ǹ gɛ̃ kũ fitiladibↄↄo ǹ a fitilanↄ kɛkɛ. 5 Ǹ wura turaretitikpataki ditɛ doka àkpati arɛ ǹ kuta kpɛ́lɛlɛ lábure kpá ǹ tataalɛ. 6 Ǹ sa'opↄ kũ òdi ká tɛ́n à tɛ́ kũ oki ditɛ dakarɛki kuta kpɛ́lɛlɛa, 7 ǹ dàga ditɛ dakarɛki kuta dagura kũ sa'okio ǹ í kán. 8 Ǹ kara kpá ǹ likai, ǹ lábure kpá karaa pì lɛ́a.

9 Ǹ pↄ́ sakɛnísi sɛ́ ǹ kú kpɛ́ pìia kũ pↄ́ kũ ò kú a gũnnↄ pínki ǹ ditɛ ma pↄ́ ũ kũ a zĩkɛbↄnↄ, oni gↄ̃ ma pↄ́ ũ. 10 Ǹ nísi pì kú sa'oki pìia kũ a zĩkɛbↄnↄ pínki. Ǹ sa'oki pì ditɛ ma pↄ́ ũ, anigↄ̃ de ma pↄ́ ũ deńla. 11 Ǹ nísi pì kú dàga pìia kũ a dibↄↄo, oni gↄ̃ ma pↄ́ ũ. 12 Ǹ su kũ Harunao kũ a nɛ́nↄ dakarɛki kuta kpɛ́lɛlɛa ǹ ń zú o gwe. 13 Ǹ sa'ori pↄ́kasanↄ da Harunanɛ, ǹ nísi kúa ǹ a ditɛ ma pↄ́ ũ, ani gↄ̃ ma gbàgbari ũ. 14 Ǹ su kũ a nɛ́nↄ dↄ ǹ utagyabanↄ dadańnɛ, 15 ǹ nísi kúkuḿma lákũ n kù ń dea nà, oni ma gbagba. Nísikummanaa pì mɛ́ ani tó ògↄ̃ de ma gbàgbarinↄ ũ ari ń buria. 16 Musa kɛ̀ lákũ Dikiri ònɛ nà pínki.

17 Ń bona Misila wɛ̃̀ plade mↄ káaku gↄrↄ káakua ò kuta pìi dↄ̀. 18 Kũ Musa tɛn kuta pì dↄ, à a zɛbↄnↄ pɛ̀tɛpɛtɛ gĩa, akũ à a lípɛtɛnↄ pɛ̀pɛn à a líkpakpanↄ kpàkpan, akũ à lípɛtɛnↄ pɛ̀tɛpɛtɛ. 19 À biza kùa, akũ à bára kùtɛa lákũ Dikiri ònɛ nà. 20 À sèeda gbɛ̀ anlonↄ sɛ̀ à kà àkpatii pìi gũn, à àkpatii pì sɛ́linↄ dà a zãnↄ gũn, akũ à a nɛ́ kùtɛa. 21 À gɛ̃̀o kpɛ́n, akũ à lábure kpà sèeda àkpatii pìii lákũ Dikiri ònɛ nà. 22 À teburuu dìtɛ dakarɛki kutan lábure pì kpɛ́lɛlɛ kpa gugbãnduru kpa. 23 À burodii kàtɛa Dikirinɛ zɛ́azɛa lákũ à ònɛ nà. 24 À fitiladibↄↄ dìtɛ dakarɛki kutan arɛdↄkↄ̃ana teburuua gɛ̀nↄmidↄki kpa, 25 à fitilanↄ nàna Dikiri arɛ lákũ à ònɛ nà. 26 Akũ à wura turaretitikpataki pìi dìtɛ dakarɛki kutan lábure sarɛ, 27 akũ à turaretiti gbĩ nnanna kpàtaa lákũ Dikiri ònɛ nà. 28 Akũ à lábure kpà kuta pì lɛ́a.

29 À sa'opↄ kũ òdi ká tɛ́n à tɛ́ kũ oki dìtɛ dakarɛki kuta kpɛ́lɛlɛa, akũ à sa'opↄ kũ òdi ká tɛ́n à tɛ́ kũ òa kũ flawaao lákũ Dikiri ònɛ nà. 30 À dàgaa pìi dìtɛ dakarɛki kuta dagura kũ sa'okio, akũ à í kàn. 31 Gwen Musa kũ Harunao kũ a nɛ́gↄ̃gbɛ̃nↄ dì ń ↄnↄ kũ ń gbánↄ pípin. 32 Tó òtɛn gɛ̃ dakarɛki kutan, ke tó òtɛn na sa'okii, òdi ń ↄnↄ kũ ń gbánↄ pípin lákũ Dikiri ò Musanɛ nà. 33 Akũ à karaa kpà à lìka kuta pìii kũ sa'okio, akũ à lábure kpà karaa pì lɛ́a. Lɛn Musa zĩ pìi kɛ̀ à làka lɛ.

Dikiri gakuri kipana bizakutan

(Nar 9:15-23)

34 Akũ tɛ́luku pìi dà dakarɛki kuta pìla, Dikiri gakuri kuta pìi pà. 35 Musa dí fↄ̃ à gɛ̃̀ dakarɛki kuta pìi gũnlo, kũ tɛ́luku dàala akũsↄ̃ kũ Dikiri gakuri kuta pìi pà yãi.

36 Isarailanↄ táa'onaa gũn, tó tɛ́luku pìi gò kuta pìia, akũ òdi futɛ kũ táo. 37 Tó tɛ́luku pì dí goaro, òdi futɛ kũ táoro, sé zĩ kũ à gòa. 38 Fãnantɛ̃ Dikiri tɛ́luku dì da kuta pìla, gwãani sↄ̃ tɛ́ dìgↄ̃ kú tɛ́luku pìi gũn. Lɛn Isarailanↄ dì e lɛ ń pínki ń táa'onaa gũn pínki.

BONAA
<
40
>