24
Yerusɑlɛmu yɑ sɑ̃ɑ
nge weke te tɑ wuuru diirɑ
1 Isirelibɑn yorun wɔ̃ɔ nɔɔbɑ nnɛsen suru wɔkurusen sɔ̃ɔ wɔkuruse sɔɔrɑ Yinni Gusunɔ u Esekiɛli sɔ̃ɔwɑ u nɛɛ, 2 wunɛ tɔnun bii, ɑ gisɔn tɔ̃ɔ te yoruo. Domi gisɔrɑ Bɑbilonin sinɑ boko u koo Yerusɑlɛmu tɑrusim tore. 3 A nɛn tɔmbu mɛm nɔɔ sɑri be mɔn teni sɔ̃ɔwɔ ɑ kɑ bu kirɔ ko. A nɛɛ, nɛnɑ nɑ nun yiire nɑ nɛɛ,
ɑ sii wekeru suo kpɑ ɑ tu nim doke.
4 Kpɑ ɑ yɑɑ tɑɑrun yɑɑ geɑ kɑ yɑɑ nɔmun yɑɑ geɑ suɑ ɑ doke mi.
Yen biru, kpɑ ɑ yɑɑ kuku bɔrɔkɔbɑ sɔndi yen wɔllɔ.
5 A mɑɑ yɑ̃ɑ geeru gɔsio wunɛn yɑ̃ɑ gɔ̃ɔn di
kpɑ ɑ ten yɑɑ doke weke te sɔɔ.
Kpɑ ɑ doo dɑ̃ɑ doke
ɑ yɑɑ ye kpuro yike yu ye
sere kɑ yen kukunɔ.
6 Kpɑ ɑ yɑɑ ye wunɑ tiɑ tiɑ.
Bɑɑ yen tiɑ ɑ ku rɑ deri mi.
Wee ye nɛ, Yinni Gusunɔ nɑ geruɑ.
Nɑ nɛɛ, Yerusɑlɛmu yɑ sɑ̃ɑwɑ bɔ̃rurɑ yen tɔn goberun sɔ̃.
Yɑ sɑ̃ɑwɑ nge sii weke te tɑ wuuru diire,
te bɑ ǹ kpɛ̃ bu teɑ bu nɑɑmwɛ.
7 Yɛm mɛ Yerusɑlɛmu yɑ yɑri mi,
mu wɑ̃ɑwɑ yen suunu sɔɔ.
Yɑ mu yɑriwɑ kperu wɔllɔ,
n ǹ mɔ tem dirɑ sɔɔ tuɑ yu sere mu wukiri.
8 Tɛ̃ kon yɛm mɛ deri kpee ten wɔllu mi,
mi mu ǹ berurɔ,
kpɑ nɛn mɔru yu ku kɑ se
n Yerusɑlɛmu ye mɔru kɔsie.
9 Nɛ, Yinni Gusunɔ nɑ nɛɛ,
Yerusɑlɛmu yɑ sɑ̃ɑwɑ bɔ̃rurɑ yen tɔn goberun sɔ̃.
Nɛn tii kon dɑ̃ɑ sube bɑkɑru ko.
10 A dɑ̃ɑ tɑɑsio kpɑ ɑ dɔ̃ɔ doke
kpɑ ɑ de yɑɑ ye, yu ye mɛtɛ mɛtɛ.
A ye kpee yɑ̃nu dokeo
kpɑ ɑ de yen kukunu nu dɔ̃ɔ mwɑɑrɑ mɑm mɑm.
11 Yen biru, ɑ weke dii te sɔndio dɔ̃ɔ gɛ̃ɛ sɔɔ
sere tu swĩɑ tu swɛ̃rɑ.
Kpɑ disi ni nu rɑɑ wɑ̃ɑ te sɔɔ nu kpe
tɑ kun mɑɑ wuuru diire.
12 Kɑ mɛ, kookɑri ye, yɑ koo kɑm kowɑ, domi dɔ̃ɔ kun kpɛ̃ u wuu diirɑm mɛn bweseru kpeesiɑ. 13 Nge mɛyɑ Yerusɑlɛmu yɑ disi duurɑ yen torɑ ni yɑ kuɑn sɔ̃. Wee nɑ kĩɑ n ye dɛɛrɑsiɑ ɑdɑmɑ yɑ ǹ wure. Yen sɔ̃ tɛ̃, yɑ ǹ mɑɑ kpɛ̃ yu dɛɛrɑ sere nɛn mɔru yu kɑ sure. 14 Nɛ, Yinni Gusunɔwɑ nɑ yeni geruɑ. Kon ye siriwɑ nge mɛ yen dɑɑ yɑ nɛ, nɑ ǹ yen wɔnwɔndu mɔ̀. Yɑ koo mɑɑ koorɑ. Kon ye kowɑ nɑ ǹ sikɑ mɔ̀. Nɑ ǹ biru wurɑmɔ.
Esekiɛlin kurɔn gɔɔ
15 Yinni Gusunɔ u Esekiɛli sɔ̃ɔwɑ u nɛɛ, 16 tɔnun bii, kon nun wi ɑ kĩru bo goori subɑru sɔɔ. Adɑmɑ ɑ ǹ yɛ̃ron gɔɔ yeru mɔ̀. A ǹ win gɔɔ sinɑmɔ. A ǹ mɑɑ gɔɔ sumɔ win sɔ̃. 17 A weeweenu koowo wunɛn tii sɔɔ ɑ ku de goo u nɔ. A ku gɔɔ sinɑ. A wunɛn dɑwɑni bɔkuo kpɑ ɑ wunɛn bɑrɑnu doke nge mɛ ɑ rɑ ko. A ku wunɛn wuswɑɑ wukiri. A ku mɑɑ gɔɔ dĩɑnu di.
18 Yerɑ Esekiɛli u ye tɔmbu sɔ̃ɔwɑ bururu mɑ yen yokɑ win kurɔ u kpunɑ u gu. Yen sisiru bururu mɑ u kuɑ nge mɛ Yinni Gusunɔ u nùn yiire. 19 Yerɑ tɔmbu bɑ nùn bikiɑmɔ bɑ mɔ̀, u bu tubusio ye u mɔ̀ mi. 20 Yerɑ u bu wisɑ u nɛɛ, Yinni Gusunɔwɑ u nùn sɔ̃ɔwɑ u nɛɛ, 21 u be Isirelibɑ gɑri yini sɔ̃ɔwɔ u nɛɛ, wi, Yinni Gusunɔ u koo de bu win sɑ̃ɑ yeru kɔsuku tèn sɔ̃ bɑ tii sue kɑ te bɑ̀ n mɛɛrɑ bɑ rɑ n nuku dobu mɔ̀ kɑ tè sɔɔ bɑ ben yĩiyɔbu doke. Bɑ koo ben bii be bɑ tie Yerusɑlɛmuɔ mwɛɛri bu go. 22 Bɑ koo kowɑ nge mɛ Esekiɛli u kuɑ. Bɑ ǹ ben wuswɑɑ wukirimɔ nuku sɑnkirɑnun sɔ̃, bɑ ǹ mɑɑ gɔɔ dĩɑnu dimɔ. 23 Bɑ koo ben dɑwɑni bɔkewɑ kpɑ bu ben bɑrɑnu doke. Bɑ ǹ koo gɔɔ yeru ko, bɑ ǹ koo mɑɑ gɔɔ swĩ. Adɑmɑ bɑ koo woorɑ ben torɑnun sɔ̃ kpɑ bɑ n weeweenu mɔ̀. 24 Wi, Esekiɛli u ko n sɑ̃ɑwɑ yĩreru ben suunu sɔɔ. Bɑ koo kowɑ nge mɛ u kuɑ. Sɑnɑm mɛ yebɑ kpuro yɑ koo bu deemɑ, sɑɑ ye sɔɔrɑ bɑ koo giɑ mɑ Gusunɔ u sɑ̃ɑwɑ Yinni.
25 Yen biruwɑ Yinni Gusunɔ u Esekiɛli sɔ̃ɔwɑ u nɛɛ, u koo de Isirelibɑ bu win sɑ̃ɑ yeru biɑ te tɑ sɑ̃ɑ ben kuku yeru mi, te bɑ̀ n mɛɛrɑ tɑ rɑ bu nuku dobu wɛ̃ mi, kɑ tèn sɔ̃ bɑ tii sue mi, mɑ bɑ ben yĩiyɔbu doke te sɔɔ. Yen biru kpɑ u de ben bibu bu gbisuku. 26 Sɑnɑm mɛ kɛ̃si ni, nu koo bu deemɑ, goo u koo nu kisirɑri kpɑ u nɑ u nun sɔ̃. 27 Yen tɔ̃ɔ te, wunɛn nɔɔ gɑ koo wukiɑrɑ kpɑ ɑ kɑ yɛ̃ro gɑri ko. Wunɑ kɑɑ n sɑ̃ɑ yĩreru wunɛn tɔmbun sɔ̃. Sɑɑ ye sɔɔ, bɑ koo giɑ mɑ nɛ Gusunɔ nɑ sɑ̃ɑwɑ Yinni.