1 Wunɛ tɔnun bii, ɑ Gɔgu gerusio ɑ nɛɛ, ɑmɛniwɑ nɛ, Yinni Gusunɔ nɑ geruɑ. Nɑ nɛɛ, nɛ wee nɑ Gɔgu seesi wi, wi u sɑ̃ɑ Mɛsɛki kɑ Tubɑlin kpɑro. 2 Kon nùn yɑrɑ win tem di mɛ mu wɑ̃ɑ sɔ̃ɔ yɛ̃sɑn nɔm geun sɔɔ sɔɔwɔ. Kpɑ n de u Isirelibɑ wɔri. 3 Adɑmɑ kon win tɛndu wɔrɑ win nɔm dwɑrun di kpɑ n win sɛ̃ɛnu mwɛɛri win nɔm geun di. 4 U koo wɔrumɑ Isirelibɑn guunu wɔllɔ wi, kɑ win tɑbu kowobu kɑ tɔn be bɑ nùn swĩimɑ. Kpɑ gunɔsu kɑ gbeeku yɛɛ yi ben yɑɑ di. 5 U koo wɔrumɑwɑ temɔ nge mɛ nɛ, Yinni Gusunɔ nɑ geruɑ. 6 Kon Mɑgɔgu ye dɔ̃ɔ doke kɑ sere be bɑ wɑ̃ɑ tem burerɔ bɔri yɛndu sɔɔ. Sɑɑ ye sɔɔ, bɑ koo giɑ mɑ nɛnɑ nɑ sɑ̃ɑ Yinni Gusunɔ. 7 Kon de bu nɛn yĩsi dɛɛrɑru giɑ Isirelibɑn suunu sɔɔ. Nɑ ǹ derimɔ bu tu sɑnku. Sɑɑ yerɑ bwesenu kpuro nu koo giɑ mɑ nɛnɑ nɑ sɑ̃ɑ Gusunɔ Isirelibɑn Yinni Dɛɛro. 8 Wee ye kpuro yɑ koorɑmɔ yɑ wee. Yɑ koo koorɑwɑ tɔ̃ɔ te nɛn tii nɑ yi. Nɛ, Yinni Gusunɔwɑ nɑ yeni geruɑ. 9 Yen tɔ̃ɔ te, Isirelibɑ bɑ koo yɑri ben wusun di, kpɑ bu ben yibɛrɛbɑn tɛrɛ bɑkɑnu kɑ piiminu mwɛɛri kɑ ben tɛmɑ kɑ sɛ̃ɛnu kɑ ben yɑɑsi kɑ ben bɔri kpɑ bu kɑ ye kpuro dɔ̃ɔ sɔ̃re wɔ̃ɔ nɔɔbɑ yiru. 10 Bɑ ǹ mɑɑ dɑ̃ɑ kɑso dɔɔ yɑkɑsɔ. Mɛyɑ bɑ ǹ mɑɑ dɑ̃ɑ burɑmɔ dɑ̃ɑ sɔ̃ɔwɔ bu kɑ doo ko. Domi tɑbu yɑ̃ɑ niyɑ bɑ koo kɑ dɔ̃ɔ sɔ̃re. Bɑ koo ben yibɛrɛbɑ mwɛɛri be, be bɑ rɑɑ bu mwɛɛrɑ. Bɑ koo tɔmbun yɑ̃nu gurɑ be bɑ rɑɑ ben yɑ̃nu gurɑ. Nɛ Yinni Gusunɔwɑ nɑ yeni geruɑ.

11 Yen tɔ̃ɔ te, Isireliɔ kon Gɔgu siku yeru wɛ̃ nim wɔ̃ku bɔruguun sɔ̃ɔ yɑri yeru giɑ, mi tɔmbɑ rɑ sɑre. Kpɑ tu berɑ min swɑɑ go. Miyɑ bɑ koo Gɔgu kɑ win tɔn dɑbi te sike, kpɑ bu yɑm mi soku Gɔgun tɔn dɑbinun wɔwɑ. 12 Isirelibɑrɑ bɑ koo bu sike kpɑ bu wɑ bu kɑ ben tem dɛɛrɑsiɑ. Bɑ koo ye kowɑ suru nɔɔbɑ yiru. 13 Isirelibɑ kpurowɑ bɑ koo goo ni sike. Yen tɔ̃ɔ te, bɑ koo mɑn bɛɛrɛ wɛ̃, kpɑ bu mɔm. Nɛ, Yinni Gusunɔwɑ nɑ yeni geruɑ. 14 Suru nɔɔbɑ yiru yen bɑɑ sɔɔ, bɑ koo tɔmbu gɔsi be bɑ ko n sirenɛ bɑ n goo ni nu tie kɑsu bɑ n sikumɔ. Be bɑ sɑrɔ mi kpuro, bɑ koo bu somi. Mɛyɑ bɑ koo kɑ tem mɛ kpuro dɛɛrɑsiɑ. 15 Tɔn be bɑ bɔsu tem mɛ sɔɔ, bɑ̀ n tɔn kukunu wɑ, kpɑ bu yĩreru ko mi. Be bɑ siku ten sɔmburu mɔ̀ bɑ̀ n nɑ kpɑ bu kuku ni gurɑ bu sike Gɔgun tɔn dɑbi ten wɔwɑ mi. 16 Bɑ koo mɑm wuu gɑgu yĩsiru kɛ̃ Hɑmɔnɑ. Yĩsi ten tubusiɑnɑ dɑbiru. Nge mɛyɑ bɑ koo kɑ tem mɛ dɛɛrɑsiɑ.

17 Yinni Gusunɔ u nɛɛ, tɔnun bii, ɑ gunɔ bwese bwesekɑ kɑ gbeeku yɛɛ kpuro sɔ̃ɔwɔ ɑ nɛɛ, yi mɛnnɑmɑ bɑɑmɑ kpuron di nɛn yɑ̃ku te kon kon sɔ̃. Kon yɑ̃ku bɑkɑru ko Isirelibɑn guunɔ kpɑ yi yɑɑ tem yi yɛm nɔ. 18 Yi koo tɑbu durɔbun gonu di kpɑ yi wirugibun yɛm nɔ be, be bɑ sɑ̃ɑ nge Bɑsɑnin yɑ̃ɑ kinɛnu kɑ yɑ̃ɑ kpɛmminu kɑ bonu kɑ kɛtɛ kinɛ ni nu gum mɔ. 19 Yi koo yɑɑ gum di yi debu kpɑ yi yɛm nɔ sere mu yi go nge tɑm nɛn yɑ̃ku te kon yi kuɑ min sɔ̃. 20 Nɛ, Yinni Gusunɔ nɑ nɛɛ, yi koo dumi kɑ yin mɑɑsɔbun yɑɑ di kɑ tɑbu durɔbu kɑ sere tɑbu kowobu be bɑ tie. Yi koo yɑɑ ye diwɑ yi debu nɛn dii yerɔ.

21 Kon bwesenu nɛn yiiko sɔ̃ɔsi kpɑ nu wɑ nge mɛ nɑ bu siri kɑ sɛɛyɑsiɑ bi nɑ bu kuɑ. 22 Sɑɑ yen dɔmɑ ten di sere kɑ bɑɑdommɑɔ, nɛn tɔmbu Isirelibɑ bɑ koo giɑ mɑ nɛnɑ nɑ sɑ̃ɑ Gusunɔ ben Yinni.

23 Bwesenu nu koo giɑ mɑ Isirelibɑn torɑnun sɔ̃nɑ nɛ, Yinni Gusunɔ nɑ bu biru kisi mɑ nɑ derɑ bɑ bu yoru mwɛɛrɑ bɑ kɑ dɑ tem tukumɔ. Nɑ bu ben yibɛrɛbɑ nɔmu sɔndiɑ bɑ bu go tɑbu sɔɔ. 24 Nɑ bu sɛɛyɑsiɑ nge mɛ ben torɑnu nu nɛ ni nu bu kuɑ disigibu. Mɑ nɑ bu nɛn wuswɑɑ beruɑ. 25 Adɑmɑ tɛ̃ nɛ, Yinni Gusunɔ nɑ nɛɛ, kon de Isirelibɑ be, Yɑkɔbun bweseru bu wurɑmɑ yorun di. Kon be kpuron wɔnwɔndu ko. Sɑɑ ye sɔɔ, kon nisinu se nɛn yĩsi dɛɛrɑ ten sɔ̃. 26 Sɑnɑm mɛ bɑ koo sinɑ bɑ n wɑ̃ɑ bɔri yɛndu sɔɔ, goo kun mɑɑ bu bɑɑsimɔ bɑ koo ben sekuru duɑri kɑ ben nɑɑnɛ sɑri te bɑ mɑn kuɑ. 27 Tɔmbu bɑ koo mɑn bɛɛrɛ wɛ̃ nɑ̀ n Isirelibɑ wunɑmɑ ben yibɛrɛbɑn suunu sɔɔn di nɑ kɑ wurɑmɑ. 28 Bɑ koo giɑ mɑ nɛnɑ nɑ sɑ̃ɑ Gusunɔ ben Yinni, nɛ wi nɑ derɑ bɑ kɑ bu yoru dɑ bwese tukunun suunu sɔɔ, mɑ nɑ derɑ bɑ mɑɑ wurɑmɑ ben temɔ. Bɑɑ ben turo nɑ ǹ derimɔ u sinɑ tem tukumɔ. 29 Nɑ ǹ mɑɑ bu biru kisimɔ. Domi kon bu nɛn Hunde wɛ̃. Nɛ Yinni Gusunɔwɑ nɑ yeni geruɑ.