Luda yã takada kũ Bisã yão GALATIANƆ 6

Ɔdana kↄ̃a

1 Ma gbɛ̃nↄ, tó á gbɛ̃ke sù à sã̀tɛ à durunna kɛ̀, ákↄ̃nↄ kũ Luda Nini tɛn doárɛ arɛnↄ à gↄ̃gↄ̃ kãao busɛbusɛ, à laakari kɛ de òsun á yↄ̃ ò gwa sero. 2 Àgↄ̃ kↄ̃ aso sɛ́. Átɛn Kirisi doka papan gwe. 3 Tó gbɛ̃ke tɛni a zĩda gwa pↄ́ke ũ, akũsↄ̃ à kun pↄ́ke ũro, àtɛni a zĩda sãtɛmɛ. 4 Baadi a yãkɛna tàasi ká gbasa à ĩa dã. Àsun a yã lɛkↄ̃a kũ gbɛ̃ pãnde pↄ́oro, 5 zaakũ baadi ni a zĩda aso sɛ́mɛ.

6 Gbɛ̃ kũ òtɛn Luda yã danɛ, à a aruzɛkɛ li a dannɛriinɛ.

7 Àsun á zĩda kɛkɛro, Luda dí sí foboro. Pↄ́ kũ gbɛ̃ tↄ̃̀ↄn àdi kɛ̃. 8 Tó gbɛ̃ tↄ̃̀ a bisãsirikɛ dàaa, ani kakatɛna inɛ. Tó gbɛ̃ tↄ̃̀ Luda Nini donɛna arɛ gũn sↄ̃, ani wɛ̃̀ndi kũ àdi lákaro inɛ. 9 Òsun kpasa kũ yãmanakɛnaaoro, zaakũ tó ódi kámma booro, óni àre le a gↄrↄa. 10 Abire yãi tó o zɛ́ lè, ògↄ̃ a mana kɛ gbɛ̃ sĩnda pínkinɛ, atɛ̃nsa ó Yesu náanikɛri dakenↄ.

Lɛ́zammanaa

11 À wãnzãn gbàgidigbagidi kũ ma kɛ̃̀ kũ ma zĩda ↄo gwa sà.

12 Gbɛ̃ kũ òtɛn yã kɛ gbɛ̃nↄ wɛ́ yãinↄ mɛ́ òtɛn gã naáwa kũ tↄ̃̀zↄ̃na yão, de òsun wɛ́ tãḿma zɛna kũ Kirisi gana lía yãoro yãi. 13 Bee tↄ̃̀zↄ̃rii pìnↄ se, ò doka kũnaro. Ò ye à tↄ̃̀ zↄ̃, de ò le ò ĩa dã á sèedaa pìi yã musu yãimɛ. 14 Mani ĩa dã pↄ́ke yã musuro, séde ó Dikiri Yesu Kirisi gana lía yã baasiro, zaakũ a yãi andunia gↄ̃̀mɛnɛ gɛ̀ ũ akũsↄ̃ ma gↄ̃ gɛ̀ ũ andunianɛ. 15 Tↄ̃̀zↄ̃na ke tↄ̃̀zↄ̃nasari yãke vĩro, séde gↄ̃na gbɛ̃ dufu ũ. 16 Luda gbɛ̃kɛ kɛ gbɛ̃ kũ ò yã pì kũnanↄnɛ, à ń gba aafiaa. Mↄ́kↄ̃nↄmɛ Isaraila yãpuranↄ ũ.

17 Zaa gbãragbɛ̃ke sún ma wɛ́ tã doro. Wari kũ ò dↄ̀ma Yesu yãi bↄ̀gbɛ kpɛ́ kú ma mɛ̀ɛa.

18 Ma gbɛ̃nↄ, ó Dikiri Yesu Kirisi gbɛ̃kɛ kɛárɛ! Aami.