Luda yã takada kũ Bisã yão NAANAA 2

1 Lɛn Luda musu kũ zĩtɛo kɛ̀ lɛ kũ a pↄ́nↄ pínki. 2 Ari a gↄrↄ supplade zĩ gↄ̃ ká, à zĩ kũ àtɛn kɛ pìi làka. A gↄrↄ supplade pì zĩ à kámma bò kũ zĩ kũ a kɛ̀nↄ pínki. 3 Akũ à arubarikaa dà gↄrↄ supplade pìn à dìtɛ a pↄ́ ũ, kũ gↄrↄ bire à kámma bò kũ zĩ kũ a kɛ̀nↄ pínki yãi.

Ɛdɛni swadakoo

4 Musu kũ zĩtɛo naana yãn dí. Gↄrↄ kũ Dikiri Luda zĩtɛ kũ musuoo kɛ̀, 5 pↄ́wɛ ke dí butɛ zĩtɛ kↄ̀ro, bee sɛ̃̀ɛ, zaakũ Dikiri Luda dí tó legũ màro, akũsↄ̃ gbɛ̃ke kun à bura zĩ kɛro. 6 Suka mɛ́ àdi kpá andunia gũn, akũ àdi mↄtↄ pisi zĩtɛa pínki.

7 Dikiri Luda gↄ̃gbɛ̃ í kàsa kũ bùsutitio, akũ à ĩa wɛ̃̀ndide vù a yĩn, akũ gↄ̃gbɛ̃ pìi gↄ̃̀ gbɛ̃ bɛ̃nɛ ũ. 8 Dikiri Luda swadakoo kɛ̀kɛ ifãboki kpa gu kũ òdi pi Ɛdɛni, akũ à gↄ̃gbɛ̃ kũ à kɛ̀ɛ pìi dà gwe. 9 Dikiri Luda tò lí buri sĩnda pínki bùtɛ zĩtɛ. Lí pìnↄ kɛ̀ mana, akũsↄ̃ ń nɛ́ blena nna. Lí wɛ̃̀ndide kú dàkoo pìi dagura. Lí kũ àdi dↄ̃na mana kũ a vãnio ińnɛ kú gwe dↄ.

10 Swa kú Ɛdɛni àdigↄ̃ mↄtↄ pisi dàkoo pìia. Bona gwe à ↄnɛ kɛ̀ siikↄ̃. 11 A káaku tↄ́n Pisↄ̃, àkũ mɛ́ à lika Avila bùsuui pínki. Wura kú bùsuu pìi gũn, 12 wuraa pì mana. Gbɛ̀ bɛ̀ɛrɛdenↄn kú gwe dↄ. 13 Swa pì ↄnɛ plade tↄ́n Giↄ̃, à lika Kusu bùsuui pínki. 14 A ↄnɛ aakↄ̃de tↄ́n Tigiri, a dↄ̀rↄↄ tà Asiria bùsu ifãboki kpa. Swa pì ↄnɛ siikↄ̃de tↄ́n Yuflati.

15 Dikiri Luda gↄ̃gbɛ̃ pìi dìtɛ Ɛdɛni dàkoo pìi gũn de àgↄ̃ a zĩ kɛ àgↄ̃ gwa. 16 Akũ à yã dìtɛnɛ à pì: Ĩni fↄ̃ ǹ dàkoo pì lí nɛ́nↄ ble pínki, 17 ama ǹsun lí kũ àdi dↄ̃na mana kũ a vãnio ińnɛ nɛ́ blero. Tó n blè, ĩni gamɛ.

18 Dikiri Luda pì: Gↄ̃gbɛ̃ kunna ado manaro. Mani kpanyĩri kɛnɛ a gbɛ̃ndo ũ. 19 Akũ Dikiri Luda bùsuu sɛ̀ à nↄ̀bↄnↄ kɛ̀o pínki kũ bãnↄ pínki, akũ à sù kũńwo gↄ̃gbɛ̃ pì kĩnaa de à e deran ani tↄ́ kpáńnɛ nà. Tↄ́ kũ gↄ̃gbɛ̃ pìi kpà pↄ́ wɛ̃̀ndide pìnↄnɛ pínki gↄ̃̀ ń tↄ́ ũ. 20 Gↄ̃gbɛ̃ pì tↄ́ kpà bɛ pↄ́kãdenↄnɛ pínki kũ bãnↄ kũ nↄ̀bↄsɛ̃ntɛnↄ pínki, ama adi kpanyĩri e ń tɛ́ a gbɛ̃ndo ũro. 21 Akũ Dikiri Luda i zↄ̃kↄ̃ↄ dà gↄ̃gbɛ̃ pìla. Kũ àtɛn i o, akũ à a gbã̀ntɛrɛwa mɛ̀n do bò, akũ à a mɛ̀baasi tàta a gbɛ̀n. 22 Akũ à gↄ̃gbɛ̃ gbã̀ntɛrɛwa kũ à bòo pìi lìtɛ nↄgbɛ̃ ũ, akũ à gɛ̀ɛ kãao a kĩnaa. 23 Akũ gↄ̃gbɛ̃ pìi pì:

Adikĩna wá bò ma wá gũmmɛ,

a mɛ̀ sↄ̃ à bò ma mɛ̀ɛ gũmmɛ.

Oni a sísi nↄgbɛ̃,

kũ Luda a bò gↄ̃gbɛ̃ gũn yãi.

24 A yã mɛ́ à tò gↄ̃gbɛ̃ dì bo a de kũ a dao bɛa, àdi nakↄ̃a kũ a nanↄo ò gↄ̃ mɛ̀ do ũ. 25 Gↄ̃gbɛ̃ kũ a nanↄo kú pótompo ń pla ń pínki, wé'i sↄ̃ àdi ń kũro.

NAANAA
<
2
>