Luda yã takada kũ Bisã yão NAANAA 6

Bisãsirinↄ yakanaa

1 Kũ bisãsirinↄ nà kɛna nà òtɛn dagula òtɛn nɛ́nↄgbɛ̃nↄ i, 2 akũ Luda nɛ́nↄ è bisãsiri nɛ́nↄgbɛ̃ pìnↄ mana, akũ òtɛni ń sɛ́ ń pↄyeinaaa. 3 Akũ Dikiri pì: Ma Nini nigↄ̃ kú bisãsirinↄ gũn gↄrↄ sĩnda pínkiro, zaakũ mɛ̀barademɛ. Ń gↄrↄnↄ nigↄ̃ wɛ̃̀ basuddomɛ. 4 Gbɛ̃ gbã̀nanↄn kú andunia gũn gↄrↄ birea kũ gↄrↄ bire gbɛrao dↄ, gↄrↄ kũ Luda nɛ́ pìnↄ bisãsiri nɛ́nↄgbɛ̃nↄ dↄ̃̀ nↄgbɛ̃nↄ ũ ò nɛ́nↄ ì kũńwo. Ń nɛ́ pìnↄmɛ gↄ̃sa gbãna kũ ń tↄ́ bò zaa káakunↄ ũ.

5 Dikiri è kũ bisãsirinↄ yã vãni kɛna dasi andunia gũn. Gↄrↄ sĩnda pínki yã bɛ̃̀nɛ laasunn òdigↄ̃ lɛ́ ado, 6 akũ a pↄ yàka bisãsiri kũ à kɛ̀ zĩtɛ yã musu. À laasun pãnde lɛ̀, 7 akũ à pì: Mani bisãsiri kũ ma kɛ̀ zĩtɛ wara, bisãsirinↄ kũ nↄ̀bↄnↄ kũ pↄ́ kũ òdi táa o kũ kùaonↄ kũ bãnↄo, zaakũ ma pↄ yàka ń kɛna yã musu. 8 Ama Nuhu Dikiri pↄnna lè.

Nuhu yã

9 Nuhu burinↄ yãn dí. Nuhu bi gbɛ̃ manamɛ. Kũ à kun, a mɛ̀n do mɛ́ à taari vĩro à táa ò kũ Ludao. 10 Nuhu nɛ́gↄ̃gbɛ̃nↄ ì gbɛ̃nↄn aakↄ̃, Sɛmu kũ Hamuo kũ Yafɛtio. 11 Luda è andunia gbɛ̃nↄ yàka ń pínki, taarikɛna andunia pà. 12 Kũ Luda andunia gwà, à è à yàka, zaakũ gbɛ̃ sĩnda pínki zã̀ zɛ́a.

13 Akũ Luda pì Nuhunɛ: Mani gbɛ̃ sĩnda pínki kakatɛ, kũ ń yãin taarikɛna dà anduniala. Mani ń kakatɛ lɛɛlɛ kũ anduniaomɛ. 14 Ǹ gó'itɛ kɛkɛ kũ lí lɛ̀kɛtɛɛo ǹ kpɛ́nɛnↄ kɛ a gũn ǹ ↄ̀da maa a gũn kũ a kpɛo. 15 Ĩni gó pì kɛ lán dí bà. A gbã̀na gã̀sãkuru wàa do kpɛ́ basↄↄro, a yàasa gã̀sãkuru bupla akuri, a lei sↄ̃ gã̀sãkuru baraakuri. 16 Ǹ gó pìi musu pápa, gbasa ǹ guforo tó a dagura gwe gã̀sãkuru do zaa a musu kpa. Ǹ gbà da gó pì kpado ǹ gó pì kɛ didikↄ̃ana lɛu aakↄ̃.

17 Makũ sↄ̃ mani tó í da anduniala, de mà pↄ́ wɛ̃̀ndide kũ òdi wesa bonↄ kakatɛ ń pínki. Pↄ́ kũ ò kú andunia gũnnↄ ni gaga pínki. 18 Ama ma bàka nigↄ̃ kú kũnwo. Ĩni gɛ̃ gó pìi gũn kũ n nɛ́gↄ̃gbɛ̃nↄ kũ n nanↄo kũ n nɛ́nↄ nↄnↄo. 19 Ĩni pↄ́ wɛ̃̀ndide pínki sɛ́ ǹ gɛ̃ kũńwo mɛ̀n plapla de onigↄ̃ kun kũ wɛ̃̀ndiio. 20 Bã burinↄ kũ nↄ̀bↄ burinↄ kũ pↄ́ kũ òdi táa o kũ kùao burinↄ pínki oni su n kĩnaa mɛ̀n plapla de ògↄ̃ kun. 21 Ǹ pↄ́ble kũ òdi ble sĩnda pínki sɛ́tɛ ǹ kakara á zàna ũ, ákↄ̃nↄ kũ pↄ́ pìnↄ. 22 Akũ Nuhu kɛ̀ lɛ à yã kũ Luda ònɛɛ kɛ̀ pínki.

NAANAA
<
6
>