Luda yã takada kũ Bisã yão NAANAA 25

Ibrahĩ ganaa

1 Ibrahĩ nↄ pãnde sɛ̀ dↄ a tↄ́n Kɛtura. 2 Nɛ́ kũ à ì kãaonↄ tↄ́n dí: Zimlã, Yↄkↄsã, Mɛdã, Midiã, Isibaki, Sua. 3 Yↄkↄsã mɛ́ à Seba kũ Dedão ì. Dedã burinↄn Asirianↄ kũ Lɛtusinↄ kũ Lɛuminↄ ũ. 4 Midiã nɛ́gↄ̃gbɛ̃nↄ tↄ́n dí: Efa, Ɛfa, Anↄku, Abida, Ɛlɛda. Ń pínki Kɛtura burinↄmɛ.

5 Ibrahĩ a aruzɛkɛ kpà Isaakua pínki, 6 akũ à gba dà a nↄ yìgisaride nɛ́nↄnɛ à ń gbárɛ ifãboki kpa de à kpɛ́ à ga, de òsungↄ̃ kú kũ Isaakuoro yãi.

7 Ibrahĩ kɛ̀ wɛ̃̀ bakɛ̃ndo sↄↄro sari, 8 akũ à gà. À zĩ kũ̀ yúkuyuku, gbasa à kà a gbɛ̃nↄla gyãwãn. 9 A nɛ́nↄ Isaaku kũ Sumailao a vĩ̀ Makpɛla gbɛ̀wɛɛ gũn, Mamare ifãboki kpa, bura kũ à de Iti buri Zoa nɛ́ Ɛflↄnu pↄ́ ũ yã 10 kũ Ibrahĩ pìi lù Itinↄa. Gwen ò a vĩ̀n kũ a nanↄ Sarao. 11 Ibrahĩ ganaa gbɛra Luda arubarikaa dà a nɛ́ Isaakun. À vutɛna Ludabɛ̃nɛkũadima'e lↄ̀gↄↄ sarɛ.

Sumaila burinↄ

12 Ibrahĩ nɛ́ Sumaila burinↄ yãn dí. Sara zĩkɛri Hazara, Misila nↄgbɛ̃ mɛ́ à nɛ́ pìi ì kãao. 13 Sumaila nɛ́gↄ̃gbɛ̃nↄ tↄ́n dí lákũ ò ń í nà. A daudu tↄ́n Nɛbayo. A dakũnanↄ tↄ́n dí: Keda, Adabɛli, Mibisamu, 14 Misima, Duma, Masa, 15 Adada, Tema, Yetu, Nafisi kũ Kedemao. 16 Sumaila nɛ́gↄ̃gbɛ̃nↄ tↄ́n gwe. Ń baadi a tↄ́ kpà a lakutu ke a bùraanɛ. Mↄ́kↄ̃nↄmɛ a buri kuri awɛɛplanↄ kínanↄ ũ.

17 Sumaila kɛ̀ wɛ̃̀ basuddo akuri awɛɛsuppla, akũ à gà à kà a gbɛ̃nↄla gyãwãn. 18 A burinↄ vùtɛ zaa Avila ari à gɛ̀ɛ pɛ́ Surua, Misila ifãboki kpa gɛna Asiria bùsu kpa. Òdi kↄ̃ tɛ́ kpákpa kũ Ibrahĩ buri kparanↄro.

Isau kũ Yakubuo inaa

19 Ibrahĩ nɛ́ Isaaku burinↄ yãn dí. Ibrahĩ Isaaku ì. 20 Kũ Isaaku kà wɛ̃̀ bupla, akũ à Labã dãre Rɛbɛka sɛ̀. Àkũmɛ Siria bùsu gbɛ̃ Bɛtuɛli kũ à bò Mɛsↄpↄtamia bùsun nɛ́ ũ. 21 Isaaku wɛ́ kɛ̀ Dikiria a nanↄnɛ, zaakũ paramɛ, akũ Dikiri a adua sì, a nanↄ pìi nↄ̀ↄ sì. 22 Sìkanↄ tɛn ↄsi ká a gbɛrɛn, akũ à pì: Bↄ́ yã mɛ́ à tò yã bire taka ma lee? Akũ à gɛ̀ɛ à Dikiri là. 23 Dikiri pìnɛ:

Buri mɛ̀n pla kú n nɛ́'isↄn,

gbɛ̃nↄn pla kũ ò kú n gbɛrɛn pìnↄ ni kɛ̃kↄ̃a.

Buri mɛ̀n do gbãna nigↄ̃ de a dola,

a kũ à bò káaku nigↄ̃ nɛ́ ũ gbɛ̃ kpɛdenɛ.

24 Kũ a nɛ́'igↄrↄ kà, akũ à sìkanↄ ì gↄ̃gbɛ̃nↄ ũ. 25 Kũ gbɛ̃ káaku tɛn bo, à bò tɛ̃ɛ zónzon. À mɛ̀kã vĩ lán uta kãde bà, akũ ò tↄ́ kpànɛ Isau. 26 Abire gbɛra kũ nɛ́ plade tɛn bo, à dↄ̀ Isau gbátokia, akũ ò tↄ́ kpànɛ Yakubu. Isaaku wɛ̃̀ baaakↄ̃de gũnn à nɛ́ pìnↄ ì.

27 Nɛ́ pìnↄ zↄ̃kↄ̃ kũ̀. Isau kɛ̀ tofekari gbãna kũ àdi kɛ̃ sɛ̃̀ntɛaro ũ. Yakubu sↄ̃ bɛgwariimɛ. 28 Isaaku ye Isaui kũ à nↄ̀bↄ lɛ́'i vĩ yãi. Rɛbɛka sↄ̃ à ye Yakubui.

29 Zĩkea Yakubu tɛn dòo kuku, akũ Isau sù kũ sɛ̃̀ntɛo nà tɛni a dɛ. 30 Akũ à pì Yakubunɛ: N yã nna! Ǹ tó mà dò tɛ̃ra bire ble, zaakũ nà tɛni ma dɛmɛ. A yã mɛ́ à tò, ò tↄ́ kpà Isaunɛ Ɛdↄmu. 31 Yakubu pì: Ǹ n daudukɛzɛ kpáma gĩa. 32 Akũ Isau pì: Má kú ga lɛ́i, bↄ́n ma daudukɛzɛ ni kɛmɛnɛɛ? 33 Akũ Yakubu pìnɛ: Ǹ la damɛnɛ gĩa. Akũ à la dànɛ à a daudukɛzɛ kpàa. 34 Akũ Yakubu burodii kpàa kũ bládoo pìio. À blè à í mì, akũ à fùtɛ à bò. Lɛmɛ Isau kɛ̀ lɛ, à a daudukɛzɛ dìtɛ pã.