Luda yã takada kũ Bisã yão NAANAA 31

Yakubu bàasina Labãnɛ

1 Yakubu yã kũ Labã nɛ́nↄ tɛn o mà kũ ò pì: Yakubu ó de pↄ́nↄ sìa pínki. Ó de aruzɛkɛ gũnn à karanaa lèn. 2 Yakubu dↄ̃̀ Labã wɛ́a, kũ a yã kú a nɛ̀sɛn lán yã bà doro. 3 Akũ Dikiri pìnɛ: Ǹ ɛra ǹ tá n dizi bùsun n danɛnↄ bɛa, manigↄ̃ kú kũnwo. 4 Akũ Yakubu Rahila kũ Leaoo sìsi ò mↄ́ a pↄ́nↄ kĩnaa sɛ̃̀n. 5 À pìńnɛ: Ma dↄ̃̀ á de wɛ́a kũ ma yã kú a nɛ̀sɛn lán yã bà doro. Bee kũ abireo ma de Luda kú kũmao. 6 Á dↄ̃ á zĩdanɛ kũ ma zĩ kɛ̀ á denɛ ma gbãna lɛ́mmɛ. 7 Á de ↄ̃ndↄ̃ kɛ̀mɛnɛ, à ma làadaa lìtɛ gɛ̃̀n kuri, akũ Luda dí tó à yãke kɛ̀mɛnɛro. 8 Tó à pì sã bakibakinↄmɛ ma baka ũ, sãnↄ dìgↄ̃ nɛ́ bakibakinↄ i. Tó à pì a wãnzãndenↄmɛ ma baka ũ, sãnↄ dìgↄ̃ nɛ́ wãnzãndenↄ i. 9 Luda á de sãnↄ sìa à kpàma.

10 Gↄrↄ kũ blènↄ tɛn kpákpa o, ma nana ò, akũ nana gũn ma è blèkofĩni kũ òtɛn kpákpa onↄ bi blè wãnzãndenↄmɛ kũ a bakibakinↄ kũ a totontotonnↄo. 11 Akũ Luda Malaikaa pìmɛnɛ nana pìi gũn: Yakubu! Akũ ma wea ma pì: Makũ di! 12 À pì: Ǹ wɛ́ sɛ́ ǹ gwa. Blèkofĩni kũ òtɛn kpákpa onↄ pínki blè wãnzãndenↄmɛ kũ a bakibakinↄ kũ a totontotonnↄo, zaakũ ma yã kũ Labã kɛ̀nnɛ è pínki. 13 Makũmɛ Luda kũ à bò à sùnyĩ Bɛtɛli ũ, gu kũ n gbɛ̀ɛ pɛ̀tɛn n nísi kùa n lɛ́ kɛ̀ma. Tera sà ǹ futɛ ǹ bo bùsu dín ǹ tá n bùsun. 14 Akũ Rahila kũ Leaoo pìnɛ: Ó túbi vĩ ó de bɛa dↄ yá? 15 Adi ó ditɛ gbɛ̃ zĩ̀tↄnↄ ũnloo? A ó yíamma, akũ à a ↄgↄ blè pínki. 16 Aruzɛkɛ kũ Luda sì ó dea gↄ̃̀ ó pↄ́ ũ pínkimɛ kũ ó nɛ́nↄ. Ǹ yã kũ Luda ònnɛ kɛ pínki sà.

17 Akũ Yakubu fùtɛ à a nɛ́nↄ kũ a nↄnↄ dì lakuminↄ kpɛ. 18 À a pↄ́kãdenↄ kũ aruzɛkɛ kũ à lè Mɛsↄpↄtamianↄ sɛ̀tɛ pínki, akũ à dà zɛ́n àtɛn tá a de kĩnaa Kanaanↄ bùsun. 19 Kũ Labã gɛ̀ɛ a sãnↄ kã zↄ̃zↄ̃, akũ Rahila a tãnanↄ sɛ̀ kpãni a kpɛ. 20 Yakubu sↄ̃ à ↄ̃ndↄ̃ kɛ̀ Siria buri Labãnɛ adi lɛ́ zaaro. 21 À fùtɛ à bàa lɛ̀ kũ a pↄ́nↄ pínki à bikũ̀ Yuflatia, akũ à mìi pɛ̀ Giliada gusĩsĩdea.

Labã pɛtɛna Yakubui

22 A gↄrↄ aakↄ̃de zĩ ò pì Labãnɛ Yakubu bàa lɛ̀. 23 À a gbɛ̃nↄ kàkara, akũ à pɛ̀tɛi. À táa ò gↄrↄ suppla, akũ à a lè Giliada gusĩsĩden. 24 Akũ Luda bò à sùa gwãani nana gũn à pìnɛ: Ǹ laakari kɛ yã kũ ĩni o Yakubunɛi a mana ke a vãni.

25 Labã Yakubu bùra lè katɛna Giliada gusĩsĩden, akũ à bùra kàtɛ gwe kũ a gbɛ̃nↄo se. 26 Akũ Labã gɛ̀ɛ à pì Yakubunɛ: Bↄ́yãi n ↄ̃ndↄ̃ kɛ̀mɛnɛ n ma nɛ́nↄ sɛ̀tɛ n ta kũńwo lán zĩ̀zↄnↄ bàa? 27 Bↄ́yãi n ↄ̃ndↄ̃ kɛ̀mɛnɛ n woto kpãni ńdi lɛ́ zamaro, de ma gɛ zɛnnɛ kũ pↄnnakɛnaao kũ lɛ̀sinaao kũ gã̀gãao kũ mↄrↄↄo. 28 Ńdi tó ma lɛ́ zà ma nɛ́nↄ kũ ma daikorenↄaro. N yↄ̃nkↄyã kɛ̀. 29 Ma gbãna kà mà yã vãni kɛárɛ, akũ n de Luda yã òmɛnɛ gwãani à pì mà laakari kɛ yã kũ mani onnɛi a mana ke a vãni. 30 Ntɛn tá sà, kũ ntɛni n de bɛ bɛgɛ kɛ yãi. À kɛ̀ dera n ma tãnanↄ sɛ̀ kpãnii? 31 Yakubu wèa à pì: Ma vĩna kɛ̀, matɛn da ĩni n nɛ́nↄ símamɛ. 32 Gbɛ̃ kũ n n tãnanↄ lè a kĩnaa, ò a dɛ. Ǹ ma pↄ́nↄ gwagwa ó gbɛ̃nↄ wára. Tó n n pↄ́ lè, ǹ sɛ́. Yakubu sↄ̃, à dↄ̃ kũ Rahila Labã pↄ́ sɛ̀ kpãniro. 33 Labã gɛ̃̀ Yakubu bizakutan à gɛ̃̀ Lea kutan à gɛ̃̀ nↄgbɛ̃ zĩkɛri mɛ̀n pla pìnↄ kutan, adi pↄ́ke lero. Kũ à bò Lea kutan, à gɛ̃̀ Rahila kutan. 34 Rahila tãna pìnↄ sɛ̀ à ùtɛ lakumi gàarii gũmmɛ, akũ à vùtɛa. Labã a kuta gũn gwàgwa pínki, adi pↄ́ke lero. 35 Rahila pì a denɛ: Baa, ǹsun pↄ fɛ̃mairo, zaakũ mádi le mà futɛro kũ má ↄ kũna yãi. Lɛmɛ Labã a tãnanↄ wɛ̀tɛ lɛ adi lero. 36 Akũ Yakubu pↄ pà à lɛ́fↄtↄ kà Labãi à pì: Bↄ́ dàan ma kɛ̀ɛ? Bↄ́ durunnan ma kɛ̀ akũ n pɛtɛmai wãnawãna lán dí bàa? 37 Kũ n ma pↄ́nↄ gwàgwa pínki, n n bɛ pↄ́nↄ lè gwe yá? Ǹ boo gupuraa ma gbɛ̃nↄ kũ n gbɛ̃nↄ wára, ò yã nna kpá gbɛ̃ kũ a yã nnaa. 38 Ma kɛ n bɛ wɛ̃̀ baro. N sãnↄ kũ n blènↄ dí nↄ̀ bↄtɛro, mádi n sã ke sóro. 39 Mádi sunnɛ kũ pↄ́ kũ nↄ̀bↄ pãsĩnↄ kũ̀ keoro, madì a fĩna bonnɛ ma zĩdamɛ. Ndì pↄ́ kũ ò a kpãni ò gwãani ke fãnantɛ̃ fĩna lama. 40 Ifãntɛ̃ dì ma lɛ fãnantɛ̃, ĩa dì ma dɛ gwãani, madì itɛ̃ kɛ. 41 Lɛn ma kɛ n bɛa lɛ ari wɛ̃̀ baro. Wɛ̃̀ gɛ̃ro donsari ma zĩ kɛ̀nnɛ n nɛ́nↄgbɛ̃ gbɛ̃nↄn planↄ yãi. Ma wɛ̃̀ suddo kɛ̀ n kpàsa yã musu. N ma làadaa lìtɛ gɛ̃̀n kuri. 42 Tó adi kɛ ma dizi Ibrahĩ Luda kũ ma de Isaaku a vĩna vĩ zɛ̀ kũmao baasiro, de n ma gbarɛ ↄkori. Luda zĩ kũ ma kɛ̀ kũ warioo è, akũ à kpã̀kɛ̃nyĩ gĩa gwãani.

43 Akũ Labã wè Yakubua: Nↄgbɛ̃ díkĩnanↄ bi ma nɛ́nↄmɛ. Nɛ́ díkĩnanↄ sↄ̃ ma daikorenↄmɛ. Pↄ́kãde díkĩnanↄ sↄ̃ ma pↄ́kãdenↄmɛ. Pↄ́ kũ n è la pínki ma pↄ́mɛ. Bↄ́n mani kɛ ma nɛ́nↄgbɛ̃nↄ kũ nɛ́ kũ ò ìnↄnɛ gbãraa? 44 Ǹ tó ò lɛ́dokↄ̃nↄ kɛ àgↄ̃ de sèeda ũ ó dagura. 45 Akũ Yakubu gbɛ̀ɛ sɛ̀ à pɛ̀tɛ yã pì dↄngupↄ ũ. 46 À pì a gbɛ̃nↄnɛ ò gbɛ̀nↄ sɛ́tɛ, akũ ò sɛ̀tɛ ò dìdikↄ̃a, akũ ò pↄ́ blè a sarɛ. 47 Akũ Labã tↄ́ kpà gbɛ̀didikↄ̃anaa pìinɛ Yega Saduta. Yakubu tↄ́ kpànɛ Galɛdi. 48 Labã pì: Gbɛ̀didikↄ̃ana díkĩnamɛ sèeda ũ ó dagura gbãra. Abire yãi ò tↄ́ kpànɛ Galɛdi. 49 Òdi pi dↄ Mizipa, zaakũ Labã pì: Dikiri ó dãkpã ó kɛ̃kↄ̃anaa gbɛra de òsun zãkↄ̃nlo yãi. 50 Tó n wari dↄ̀ ma nɛ́nↄgbɛ̃nↄa ke tó n nↄ pãndenↄ sɛ̀ dↄ, bee tó ó kú kↄ̃ kĩnaaro, ǹgↄ̃ dↄ̃ sãnsãn kũ Ludan ó yã pìi sèedade ũ. 51 Akũ Labã pìnɛ dↄ: Ǹ gbɛ̀didikↄ̃ana díkĩna gwa kũ gbɛ̀ kũ ma pɛ̀tɛ ó dagurao. 52 Anigↄ̃ de sèeda ũ kũ mani vĩala mà su mà a vãni kɛnnɛro, mↄkↄ̃n sↄ̃ ĩni vĩala ǹ su ǹ a vãni kɛmɛnɛro. 53 Ibrahĩ kũ Naoo kũ ń deo Ludamɛ ó yãkpatɛkɛri ũ.

Akũ Yakubu la dà kũ Luda kũ a de Isaaku a vĩna vĩ tↄ́o. 54 À sa ò gusĩsĩden gwe, akũ à a gbɛ̃nↄ sìsi ò pↄ́ ble. Kũ ò pↄ́ blè, akũ ò ì gwe. 55 Labã fùtɛ kↄnkↄkↄnkↄ, à lɛ́ zà a daikorenↄa kũ a nɛ́nↄ à sa mana òńnɛ, akũ à ɛ̀ra à tà a bɛa.