Luda yã takada kũ Bisã yão NAANAA 34

Sɛkɛmu kusina Dinaa

1 Lea nɛ́nↄgbɛ̃ Dina kũ à ì kũ Yakubuo bò à wɛ́ kpátɛ bùsuu pì nↄgbɛ̃nↄi. 2 Kũ bùsuu pì kína Amↄ nɛ́ Sɛkɛmu, Ivi buri a è, à a sɛ̀ kũ gbãnao, akũ à wùtɛ kãao. 3 A pↄ dↄ nↄkpare pìia à yei, akũ à yã nnanna ònɛ. 4 Akũ Sɛkɛmu pì a denɛ: Ǹ nɛ́nↄkpare bire wɛtɛmɛnɛ mà sɛ́. 5 Kũ Yakubu mà ò a nɛ́nↄgbɛ̃ kpe bò, a nɛ́nↄn kú sɛ̃̀n kũ a pↄ́kãdenↄ, akũ à yĩ̀tɛ ari ò sù. 6 Akũ Sɛkɛmu de Amↄ gɛ̀ɛ à Yakubu le à yã pì onɛ. 7 Kũ Yakubu nɛ́nↄ bò sɛ̃̀n ò sù, akũ ò yã pìi mà gↄ̃̀nↄ. Ń nɛ̀sɛɛ yàka ò pↄ fɛ̃̀ manamana, kũ Sɛkɛmu wé'iyã kɛ̀ Isarailanↄnɛ yãi, à wùtɛ kũ Yakubu nɛ́nↄgbɛ̃o à yã kũ à de ò kɛro kɛ̀. 8 Akũ Amↄ pìńnɛ: Ma nɛ́ Sɛkɛmu pↄ dↄ á nɛ́nↄgbɛ̃a. Á yã nna. À a kpáa nↄ ũ. 9 Ò lɛ́dokↄ̃nↄ kɛ ògↄ̃ ó nɛ́nↄgbɛ̃nↄ kpãzãkↄ̃a. 10 Àgↄ̃ kú kũoo, ó bùsu kun á pↄ́ ũmɛ. À vutɛn àgↄ̃ laga tán àgↄ̃ zĩtɛ vĩ. 11 Akũ Sɛkɛmu ò Dina de kũ a dãgↄ̃nↄnɛ à pì: À tó mà á pↄnna le. Pↄ́ kũ a pi mà kpááwa mani kpá. 12 À anzureblebↄ lɛ́ damɛnɛ zↄ̃kↄ̃ kũ gbanↄ dasidasi. Pↄ́ kũ a ò mani kpá. À nɛ́nↄkpare pì kpáma nↄ ũ.

13 Akũ Yakubu nɛ́nↄ wè Sɛkɛmu kũ a de Amↄooa kũ manafikio kũ Sɛkɛmu ń dãre kpe bò yãi. 14 Ò pìńnɛ: Óni fↄ̃ ò abire kɛro, óni fↄ̃ ò ó dãre kpá gyↄfↄrↄdearo, zaakũ wé'iyãmɛ ó kĩnaa. 15 Óni we á yãiro, séto à gↄ̃ lán ó bà á gↄ̃gbɛ̃nↄ tↄ̃̀ zↄ̃ ń pínki. 16 Tó a tↄ̃̀ↄ zↄ̃̀, óni ó nɛ́nↄ kpãzãáwa óni á nɛ́nↄ sɛ́ nↄ ũ. Ónigↄ̃ kú kãáo, óni gↄ̃ buri dokↄ̃nↄnↄ ũ. 17 Ama tó ádi we ó yãiro, tó ádi tↄ̃̀ zↄ̃ro, óni ó dãre sɛ́ ò tá kãaomɛ. 18 Yã pìi kɛ̀ Amↄ kũ a nɛ́ Sɛkɛmuoonɛ nna. 19 Kɛfɛnna pì yã pìi gↄ̃̀gↄ̃ likalika, kũ Yakubu nɛ́nↄgbɛ̃ yã kànɛ yãi. À bɛ̀ɛrɛ vĩ deńla a de bedenↄ tɛ́.

20 Amↄ kũ a nɛ́ Sɛkɛmuo gɛ̀ɛ ń wɛ̃tɛ bĩnilɛa, akũ ò yã ò kũ wɛ̃tɛdenↄ ò pì: 21 Gbɛ̃ pìnↄ yãke vĩ kũooro. Ò tó ògↄ̃ kú ó bùsun ògↄ̃ laga tá, zaakũ bùsuu pìi yàasa ani mↄ́wá. Óni ń nɛ́nↄgbɛ̃nↄ sɛ́ óni ó nɛ́nↄ kpáḿma. 22 Gbɛ̃ pìnↄ sↄ̃, oni we ògↄ̃ kú kũoo de ò gↄ̃ buri dokↄ̃nↄ ũro, séto adi kɛ ó gↄ̃gbɛ̃ sĩnda pínki tↄ̃̀ↄ zↄ̃̀ lán ń bà baasiro. 23 Ń pↄ́kãdenↄ kũ ń aruzɛkɛnↄ kũ ń zùnↄ pínki ni gↄ̃ ó pↄ́ ũroo? Ò weńnɛ de ògↄ̃ kú kũoo. 24 Wɛ̃tɛpidenↄ Amↄ kũ a nɛ́ Sɛkɛmuo yã mà, akũ ń gↄ̃gbɛ̃nↄ tↄ̃̀ↄ zↄ̃̀ ń pínki.

25 A gↄrↄ aakↄ̃de zĩ, kũ ò kú kũ wãwão ò kú kũ yãke laasunnworo, Yakubu nɛ́ gbɛ̃nↄn planↄ Simɛↄ kũ Levio, Dina vĩ̀ninↄ, ń baadi a fɛ̃nɛda sɛ̀ ò sì wɛ̃tɛn ò gↄ̃gbɛ̃nↄ dɛ̀dɛ ń pínki. 26 Ò Amↄ kũ a nɛ́ Sɛkɛmuoo dɛ̀dɛ, akũ ò Dina sɛ̀ ò bòo Sɛkɛmu kpɛ́n ò tà kãao. 27 Wɛ̃tɛdenↄ dɛdɛnaa gbɛra Yakubu nɛ́nↄ sù ò wɛ̃tɛ pↄ́nↄ nàkↄ̃a kũ ò wé'i dà ń dãrea yãi. 28 Ò ń sãnↄ kũ ń blènↄ sɛ̀tɛ kũ ń zùnↄ kũ ń zaakinↄ, pↄ́ kũ ò kú wɛ̃tɛ gũnnↄ kũ pↄ́ kũ ò kú ń buranↄ pínki. 29 Ò ń aruzɛkɛnↄ sɛ̀tɛ pínki kũ ń nɛ́nↄ kũ ń nↄgbɛ̃nↄ kũ pↄ́ kũ ò kú ń bɛanↄ pínki.

30 Akũ Yakubu pì Simɛↄnɛ kũ Levio: A sumɛnɛ kũ yã vãnio. Kanaanↄ kũ Pɛrizinↄ kũ bùsu díkĩna buri pãndenↄ nigↄ̃ ye ma kãiro. Lákũ ó dasiro nà, tó ò lìkawái, tó ò sìógu, oni ma dɛ kũ ma burinↄo pínki. 31 Akũ ò wèa ò pì: Kũ à ó dãre dìtɛ karua ũ, abire manan gwe yá?