Luda yã takada kũ Bisã yão NAANAA 38

Yuda kũ Tamao

1 Zĩ kũ̀a Yuda bò a gbɛ̃nↄ kĩnaa à gɛ̀ɛ à vùtɛ Adulamu gbɛ̃ kũ òdi pinɛ Ira bɛa. 2 Gwen à dàkarɛ kũ Kanaanↄ bùsu gbɛ̃ kũ òdi pinɛ Sua nɛ́nↄgbɛ̃o, akũ à a sɛ̀ nↄ ũ. 3 À nↄ̀ↄ sì à nɛ́ ì gↄ̃gbɛ̃ ũ, akũ à tↄ́ kpànɛ Ɛɛ. 4 À ɛ̀ra à nↄ̀ↄ sì dↄ à nɛ́gↄ̃gbɛ̃ ì, akũ à tↄ́ kpànɛ Ona. 5 À ɛ̀ra à nɛ́gↄ̃gbɛ̃ ì dↄ, akũ à tↄ́ kpànɛ Sela. Gↄrↄ kũ à nɛ́ pìi ì, à kú Kezibimɛ.

6 Akũ Yuda nↄgbɛ̃ kũ òdi pinɛ Tama sɛ̀ a daudu Ɛɛnɛ. 7 Ɛɛ kɛ̀ Dikirinɛ vãni, akũ à a dɛ̀. 8 Akũ Yuda pì Onanɛ: Ǹ n vĩ̀ni gyaanↄ sɛ́ ǹ buri kɛ n vĩ̀ninɛ, lákũ òdi kɛ nà. 9 Kũ Ona dↄ̃ kũ nɛ́ kũ áni i kũ a vĩ̀ni gyaanↄo nigↄ̃ de a buri ũro, tó à wùtɛ kãao akũ à ye à a zĩda e, àdi a gↄ̃gbɛ̃ pↄ́ kↄ́tɛmɛ, de àsun buri kɛ a vĩ̀ninɛro yãi. 10 Yã kũ àtɛn kɛ pìi kɛ̀ Dikirinɛ vãni, akũ à a dɛ̀ dↄ. 11 Akũ Yuda pì a nɛ́ gyaanↄ Tamanɛ: Ǹ gɛ́ ǹgↄ̃ gyaanↄ ble n de bɛa ari ma nɛ́ Sela zↄ̃kↄ̃ kũ. Zaakũ àtɛn da Sela ni ga lán a vĩ̀ninↄ bàmɛ. Akũ Tama gɛ̀ɛ à vùtɛ a de bɛa.

12 Kũ a gↄrↄ gìi kɛ̀, akũ Yuda nanↄ gà. Kũ a nɛ̀sɛɛ kpàtɛ, à dà zɛ́n àtɛn gɛ́ a sãkãkɛ̃rɛrinↄ kĩnaa Timina kũ a gbɛ̃nna Irao. 13 Akũ ò a baaruu kpà Tamanɛ ò pì: N zã de tɛn gɛ́ Timina a sãnↄ kã kɛ̃rɛ. 14 Akũ à a gyaanↄblepↄnↄ bò a pↄ́dangãnn sɛ̀ à kù a ãnnwa, akũ à gɛ̀ɛ à vùtɛ Enaimu bĩnilɛa Timina zɛ́n. Zaakũ à è Sela zↄ̃kↄ̃ kũ̀, odi a kpáa nↄ ũro. 15 Kũ Yuda a è, akũ à a dìtɛ karua ũ kũ à pↄ́ kù a ãnnwa yãi. 16 Akũ à nài zɛ́ sarɛ à pì: Ǹ tó mà wútɛ kũnwo. Adi a dↄ̃ a nɛ́ gyaanↄ ũro. Akũ nↄgbɛ̃ pìi pì: Tó n wútɛ kũmao, bↄ́n ĩni kpámaa? 17 À wèa à pì: Mani ma kpàsa blènɛ mɛ̀n do kpãzãnnɛ. Akũ à pì: Ǹ tↄrↄma ditɛmɛnɛ ari ǹgↄ̃ gɛ́ kpãzã. 18 Akũ à a là à pì: Bↄ́ tↄrↄman mani ditɛnnɛɛ? A pì: Ǹ n sèedakɛbↄ kũ a bàao kũ gò kũ ń kũnaao kpáma. Akũ à kpàa à wùtɛ kãao à nↄ̀ↄ dↄ̀agu. 19 Akũ nↄgbɛ̃ pìi fùtɛ à tà bɛ à a pↄ́dangãnn bò à a gyaanↄblepↄnↄ sɛ̀ à dà. 20 Yuda a gbɛ̃nna Adulamu gbɛ̃ zĩ̀ kũ blènɛo à tↄrↄma boo nↄgbɛ̃ pìia. Kũ à kà, adi a lero. 21 Akũ à gwedenↄ làla à pì: Karua kũ à kú Enaimu zɛ́ sarɛ la yã kú máa? Ò wèa ò pì: Karua ke kú laro fá! 22 Akũ à ɛ̀ra à tà à pì Yudanɛ: Mádi a ero. Gwedenↄ pì o karua ke dↄ̃ gwe yã sero. 23 Akũ Yuda pì: Àgↄ̃ pↄ́ pìnↄ kũna. Óni tó gbɛ̃nↄ ó yáa dↄro. Ma n zĩ kũ blèe pìio, ńdi a lero.

24 Mↄ aakↄ̃ gbɛra ò sù ò ò Yudanɛ ò pì: N nɛ́ nanↄ Tama karua kà, akũ à nↄ̀ↄ sì a pãpãkɛnaa pìi gũn. Yuda pì: À bo kãao ò tɛ́ sↄ̃a. 25 Kũ òtɛn bo kãao bàai, à lɛ́gbãzã kɛ̀ a zã denɛ à pì: Gbɛ̃ kũ à pↄ́ díkĩnanↄ vĩ mɛ́ à nↄ̀ↄ dↄ̀magu. Ǹ sèedakɛbↄ kũ a bàao kũ gò díkĩnao gwa, tó ń a de dↄ̃. 26 Yuda pↄ́ pìnↄ dↄ̃̀, akũ à pì: Nↄgbɛ̃ pì yã nna demala, zaakũ mádi a kpá ma nɛ́ Selaaro. Yuda dí wútɛ kãao doro. 27 Kũ à kà nɛ́'ina, à sù à lè sìkanↄ mɛ́ ò kú a gbɛrɛ gũn. 28 Gↄrↄ kũ àtɛn nɛ́ i, ń gbɛ̃ do ↄ bò, akũ nↄgbɛ̃ nɛ́sɛtɛri wↄ̃nↄ tɛ̃ra dↄ̀a à pì: Nɛ́ díkĩna mɛ́ à bò káaku. 29 Kũ nɛ́ pì a ↄ sùkpa, akũ nɛ́ plade bò, akũ nↄgbɛ̃ pìi pì: N bo bùimɛ fá! Akũ ò tↄ́ kpànɛ Pɛrɛzi. 30 Abire gbɛra kũ a gbɛ̃ndo kũ ò wↄ̃nↄ tɛ̃ra dↄ̀ a ↄaa bò, akũ ò tↄ́ kpànɛ Zɛra.