Luda yã takada kũ Bisã yão NAANAA 50

1 Yusufu kùsi a dea à ↄ́ↄ dↄ̀ a musu à lɛ́ pɛ̀pɛa. 2 Akũ à ò a zĩkɛri ɛzɛdenↄnɛ ò ɛzɛ kũ àdi tó gɛ̀ vãro máma a de gɛ̀ɛa. Akũ ò màma Isaraila gɛ̀ɛa 3 ari gↄrↄ bupla de àsun yagi kɛro yãi, zaakũ lɛn Misilanↄ dì kɛ lɛ, akũ ò a gɛ̀ ↄ́ↄ dↄ̀ gↄrↄ baaakↄ̃ akuri. 4 Kũ ò a gɛ̀ ↄ́ↄ dↄ̀ ò làka, Yusufu pì Firi'auna ↄndenↄnɛ: Á yã nna! Tó ma á pↄnna lè, à omɛnɛ Firi'aunanɛ à pi: 5 Kũ ma de tɛn ga, à tò ma la dànɛ à pì mà a vĩ mira kũ à kɛ̀kɛ a zĩda pↄ́ ũ Kanaanↄ bùsun. Ǹ ma gba zɛ́ mà gɛ́ mà a de vĩ sà, mani ɛra mà su. 6 Akũ Firi'auna pìnɛ: Ǹ gɛ́ ǹ n de vĩ, zaakũ à tò n la dàarɛ.

7 Kũ Yusufu tɛn gɛ́ a de vĩ, Firi'auna ìbanↄ kũ a bɛ gbɛ̃ zↄ̃kↄ̃nↄ kũ Misila bùsu gbãnadenↄ gɛ̀ɛ kãao ń pínki. 8 Yusufu bedenↄ kũ a vĩ̀ninↄ kũ a de bedenↄ gɛ̀ɛ kãao ń pínki dↄ. Ń nɛ́ fítinↄ kũ ń sãnↄ kũ ń blènↄ kũ ń zùnↄ mɛ́ ò gↄ̃̀ Gosɛ̃ bùsun ńtɛ̃nɛ. 9 Sↄ̃gonↄ kũ sↄ̃denↄ gɛ̀ɛ kãao dↄ. Gbɛ̃ kũ ò gɛ̀ɛ zɛnɛɛ pìnↄn dasi manamana. 10 Kũ ò kà Atada pↄ́wɛgbɛ̃kia Yoda bara, gwen ò wiki gbãna lɛ̀n ari, ò gɛ̀ ↄ́ↄ dↄ̀ manamana, akũ Yusufu a de wɛ̃nda kɛ̀ ari gↄrↄ suppla. 11 Kũ Kanaanↄ bùsudenↄ è lákũ òtɛn gɛ̀ kɛ nà Atada pↄ́wɛgbɛ̃kia, akũ ò pì: Misilanↄ gɛ̀kɛna zↄ̃kↄ̃n dí. Abire yãi ò tↄ́ kpà Yoda bara gu pìinɛ Abɛli Misila.

12 Lɛn Yakubu nɛ́nↄ kɛ̀ lɛ lákũ à òńnɛ nà. 13 Ò a gɛ̀ɛ sɛ̀ ò gɛ̀ɛo Kanaanↄ bùsun, akũ ò a vĩ̀ Makpɛla bura gbɛ̀wɛɛ kũ Ibrahĩ lù Iti buri Ɛflↄnua mira ũ gũn Mamare ifãboki kpa. 14 Kũ Yusufu a de vĩ̀ à làka, à ɛ̀ra à tà Misila kũ a vĩ̀ninↄ kũ gbɛ̃ kũ ò gɛ̀ɛ zɛnɛ a de gɛ̀ vĩnↄ ń pínki.

Yusufu náanikpana a vĩ̀ninↄa

15 Kũ Yusufu vĩ̀ninↄ è ń de gà, akũ ò pì: Tó Yusufu ibɛrɛɛ sɛ̀ kũoo, akũ à ye à a vãni kũ o kɛ̀nɛ pínki fĩna bowɛrɛ sↄ̃ bi? 16 Akũ ò lɛ́gbãzã kɛ̀nɛ ò pì: De n de kpɛ́ à ga à pì 17 ò onnɛ ǹ ó taari kũ ó durunnao kɛ̃wá, zaakũ a vãnin o kɛ̀nnɛ. N yã nna! Ǹ ó taarinↄ kɛ̃wá. N de Luda zↄ̀blerinↄmɛ ó ũ. Kũ ò yã pìi ò Yusufunɛ, akũ à ↄ́ↄ dↄ̀. 18 Akũ a vĩ̀ninↄ sù a kĩnaa ò kùtɛ a arɛ ò pì: N zↄ̀nↄmɛ ó ũ. 19 Akũ Yusufu pìńnɛ: Àsun vĩna kɛro. Ludamɛ ma ũ yá? 20 Á ye à a vãni kɛmɛnɛ yã, akũ Luda lìtɛ a mana ũ, de à le à gbɛ̃nↄ sura ba dasi lán àtɛn kɛ nà tera. 21 Àsun vĩna kɛro. Mani á gwa kũ á nɛ́nↄ. Akũ à náani kpàḿma à ń laakarii kpàtɛ.

Yusufu ganaa

22 Yusufu kú Misila kũ a de bedenↄ ari à kà wɛ̃̀ basↄↄro akuri. 23 À wɛ́ sì Ɛflaimu sãkpɛnↄlɛ, akũ à wɛ́ sì Manase nɛ́ Maki nɛ́nↄlɛ dↄ. 24 Akũ Yusufu pì a gbɛ̃nↄnɛ: Ma ka gana. Luda mɛ́ ani su kpáái à bo kãáo bùsu dín à gɛ́ kãáo bùsu kũ à a lɛ́ sɛ̀ Ibrahĩnɛ kũ Isaakuo kũ Yakubuoo gũn. 25 Akũ Yusufu tò Isarailanↄ la dàarɛ à pì: Gↄrↄ kũ Luda ni su kpáái, à ma wánↄ sɛ́tɛ à boo gu dín. 26 Yusufu wɛ̃̀ basↄↄro akuriden à gà. Akũ ò ɛzɛ kũ àdi tó gɛ̀ vãro màma a gɛ̀ɛa ò dà àkpatii gũn Misila.