2 U nɛɛ, Yinni Gusunɔ, nɑ nuɑ ye ɑ geruɑ.

Mɑ nɑ nɑndɑ.

A de yu koorɑ wɔ̃ɔ sini sɔɔ.

A de tɔmbu bu ye wɑ bɛsɛn wɑɑti yeni sɔɔ.

Adɑmɑ wunɛn mɔru ye sɔɔ, ɑ yɑɑyo ɑ sun wɔnwɔndu kuɑ.

3 Gusunɔ, ɑ nɑ sɑɑ Edɔmun di.

Wunɛ, Dɛɛro, ɑ nɑ Pɑrɑnin guurun di.

Wunɛn yiiko yɑ wɔllu yɑm bururɑsie.

Mɑ tem kpuro mu nun siɑrɑmɔ.

4 A nɑ, mɑ yɑm mu bururɑ.

Sɔ̃ɔ yɑ̃nɑ yɑrɑ wunɛn nɔmɑn di,

mi wunɛn dɑm mu wɑ̃ɑ.

5 A derɑ bɑrɑnu nu pusimɔ.

A nu derimɔ mi ɑ sɑrɑ kpuro.

6 À n yɔ̃rɑ, tem mu rɑ yĩiriwɑ.

À n bwesenu mɛɛrɑ, nu rɑ diiriwɑ.

Guu ni nu wɑ̃ɑ sɑɑ yee yellun di, nu wɔrukɑ,

gunguu ni nu wɑ̃ɑ sɑɑ tɛɛbun di, nu kɔsikirɑ,

domi niyɑ nu rɑɑ sɑ̃ɑ wunɛn swɑɑ ye ɑ rɑ sĩ.

7 Nɑ Kusɑnigibun weeweenu nɔɔmɔ.

Nɑ mɑɑ wɑ mɑ Mɑdiɑnibɑ bɑ bɛrum soore.

8 Yinni Gusunɔ, ɑ kɑ dɑɑnu mɔru mɔ̀wɑ?

Nge nim wɔ̃kuwɑ ɑ kɑ mɔru mɔ̀.

Wee ɑ yɔɔwɑ guru winu wɔllɔ

nge wi u yɔɔwɑ tɑbu kɛkɛn wɔllɔ,

mɑ yɑ nùn nɑsɑrɑ wɛ̃.

9 A wunɛn tɛndu bɛri.

Wunɛn bɔ̃ri yi sɑ̃ɑwɑ nge sɛ̃ɛnu.

A tem bɛrɑ mɑ dɑɑnu kokɑ min di.

10 Guunu nù n nun wɑ, nu rɑ diiriwɑ.

Gurɑ yɑ nɛmɔ kɑ dɑm, mɑ nim wɔ̃kun nim mu wɔki,

mu nim kurenu kɔ̃ɔmɔ sere wɔllɔ.

11 Sɔ̃ɔ kɑ suru bɑ yɔ̃rɑ ye bɑ wunɛn guru mɑɑkinu wɑ

nu bɑllimɔ nge yɑɑsɑ, mɑ nu dɔɔ nge sɛ̃ɛnu.

12 Wee ɑ tem bukiɑnɑmɔ,

ɑ bwesenu kɔsukumɔ kɑ mɔru bɑkɑ.

13 Wee ɑ yɑrɑ

ɑ wunɛn tɔmbu kɑ wunɛn sunɔ wi ɑ gɔsɑ somiru nɑ.

A tɔn kɔ̃sobun sunɔ go.

A win bwɑ̃ɑbu kpeerɑsiɑ mɑm mɑm.

14 A yibɛrɛbɑn sinɑmbun winu yɑburɑ kɑ ben tiin sɛ̃ɛnu.

Bɑ rɑɑ sun wɔrim wee kɑ sɛndɑru nge woo bɔkɔ,

bu kɑ sun yɑrinɑsiɑ.

Bɑ nuku dobun kuuki mɔ̀.

Bɑ sɔɔru sɑ̃ɑ bu kɑ sun go bɛsɛn kuku yenɔ.

15 Yinni Gusunɔ, ɑ sɔ̃ wunɛn dumin wɔllɔ,

ɑ nim wɔ̃ku tɑɑkumɔ

ge gɑ nim kɔ̃ɔmɔ gɑ wɔki.

16 Nɑ gen wɔkinu nɔɔmɔ too.

Mɑ nɑ nɑndɑ gem gem,

nɛn nɔɔ gɑ diirimɔ bɛrum sɔ̃.

Mɑ nɛn wɑsi yi wɔkɔnu wɔrimɔ,

nɑ yɔ̃ sɛ̃ɛ nɑ nuku sɑnkirɑnun tɔ̃ru mɑrɑ

te tɑ wee bwese ni nu koo sun dɑm dɔren sɔ̃.

17 Figien dɑ̃nu nu ǹ ko n binu mɔ.

Resɛm dɑ̃nu nu ǹ mɑɑ mɑrumɔ.

Olifin dɑ̃nu nu ǹ mɑɑ binu mɑrumɔ.

Gbeɑ kun mɑɑ dĩɑnu wɛ̃ɛmɔ.

Yɑ̃ɑnu kɑ kɛtɛ kun ko n mɑɑ wɑ̃ɑ gɔ̃ɔwɔ.

18 Adɑmɑ nɛ, nɛn nuku dobu weewɑ wunɛ Yinni Gusunɔn min di.

Nɑ nuku dobu mɔ yèn sɔ̃ ɑ rɑ mɑn fɑɑbɑ ko.

19 Wunɑ ɑ sɑ̃ɑ nɛn dɑm.

A rɑ de nɑ n sɑ̃u nge nɛmu.

Kpɑ nɑ n sĩimɔ guunu wɔllɔ.