Luda yã takada kũ Bisã yão EBERUNƆ 2

Surabana zↄ̃kↄ̃ↄ

1 Abire yãi ò yãpura kũ o mà kũ ↄplapla gíngin, de òsun kɛ̃ zɛ́aro yãi. 2 Zaakũ yã kũ Luda dìtɛ malaikanↄ gãi bi tilasimɛ, akũ ò fĩnaa bò gbɛ̃ kũ ò gì mai ò pã̀nɛnↄnɛ a zɛ́a, 3 tó ódi surabana zↄ̃kↄ̃ↄ pì yã da sↄ̃ro, óni bo yá? Surabana yã pìi bò Dikiri kĩnaamɛ, akũ gbɛ̃ kũ ò mànↄ yãpura kpàawɛrɛ. 4 Luda ɛ̀ra à yãpura kpà yã pìia kũ sèedanↄ kũ yãbonsarɛnↄ kũ daboyã dasi kɛnanↄ kũ a Nini gba kũ à kpàatɛtɛńnɛnↄ a pↄyenyĩnaaa.

Yesu gↄ̃na bisãsiri ũ lán ó bà

5 Adi kɛ malaikanↄn Luda andunia zia kũ ótɛni a yã o nàńnɛ ń ↄĩro. 6 À kú Luda yãn gukea ò pì:

Bↄ́n bisãsiri ũ kũ a yã dìgↄ̃ dↄnguu?

Bↄ́n a ũ kũ ndì laakari dↄaa?

7 N a kɛ̀ kĩana malaikanↄi féte,

n a kà kpatan kũ gakurio kũ bɛ̀ɛrɛɛo,

8 n tò pↄ́ sĩnda pínki mìi nàtɛnɛ.

Kũ Luda tò pↄ́ sĩnda pínki mìi nàtɛnɛ, adi a ke tó mìnatɛnanɛɛ sariro. Tera lán dí bà, ódi e kũ pↄ́ sĩnda pínki mìi nàtɛnɛ gĩaro, 9 ama o è kũ Yesun ò tɛ́a. Luda a kĩ̀a malaikanↄi ari gↄrↄ pla, de Luda gbɛ̃kɛ gũn à ga gbɛ̃ sĩnda pínki gɛ̃nɛ ũ, akũ à a kà kpatan kũ gakurio kũ bɛ̀ɛrɛɛo ga wari kũ à kɛ̀ yãi.

10 Lákũ pↄ́ sĩnda pínki bò Luda kĩnaa nà, akũsↄ̃ pↄ́ sĩnda pínki de a pↄ́ ũ, kũ à ye à gɛ̃ kũ gbɛ̃nↄ dasi a gakuri gũn a nɛ́nↄ ũ, à kↄ̃ sì kãao à gbɛ̃ kũ à surabana zɛ́ bóńnɛ papa warikɛnaa gũn. 11 Gbɛ̃ kũ ò gↄ̃̀ Luda gbɛ̃nↄ ũ kũ gbɛ̃ kũ àdi ń kɛ Luda gbɛ̃nↄ ũo, ń pínki de dokↄ̃nↄmɛ. Abire yãi ń sísina a gbɛ̃nↄ ũ dì a wé'i kũro. 12 À pì:

Mani n tↄ́ bo ma gbɛ̃nↄ tɛ́,

mani n sáabu kpá kↄ̃kakaranaa gũn.

13 À pì dↄ:

Mani a náani kɛ.

À pì dↄ:

Makũmɛ la kũ nɛ́ kũ Luda kpàmanↄ.

14 Zaakũ nɛ́ pìnↄ bi bisãsirinↄmɛ, akãa se à gↄ̃̀ bisãsiri ũ lán ń bà, de à ga à Ibilisi kũ àdi su kũ gao kakatɛ, 15 à gbɛ̃ kũ òtɛn vĩna kɛ ganɛ òtɛn zↄ̀ ble ari ń wɛ̃̀ndi lɛ́nnↄ bo. 16 Yãpura gũn malaikanↄn àtɛn ↄ daḿmaro, Ibrahĩ burinↄmɛ. 17 À kↄ̃ sìo à gↄ̃ lán a dakũnanↄ bà yã sĩnda pínki gũn, de à gↄ̃ Sa'oriki sùrude náanide ũ Luda zĩ gũn, gbɛ̃nↄ durunna kútɛkɛbↄ ũ dↄ. 18 Lákũ à wari kɛ̀ à yↄ̃ogwanaa fↄ̃̀ nà, ani fↄ̃ à gbɛ̃ kũ òtɛni ń yↄ̃ ò ń gwanↄ faaba kɛ.