Luda yã takada kũ Bisã yão EBERUNƆ 13

Lɛ́dammanaa

1 À wɛ́ tã àgↄ̃ gbɛ̃kɛ vĩ kũ kↄ̃o. 2 À laakari dↄ nibↄkũnaaa, zaakũ lɛn gbɛ̃kenↄ malaikanↄ yàrii kɛ̀ dↄ̃naa sari lɛ. 3 À tó gbɛ̃ kũ ò ń ká kpɛ́sira gũnnↄ yã dↄágu, lákũ á kú kũńwo kpɛ́siran bà, kũ gbɛ̃ kũ òtɛn wɛ́ tãḿmanↄ, lákũ ákↄ̃nↄmɛ òtɛn wɛ́ tãáwa bà. 4 Baadi gↄ̃ nↄsɛna da yã bɛ̀ɛrɛde ũ. Òsun ń wútɛki gbãsĩ kpáro, zaakũ Luda ni yãkpatɛ kɛ kũ zinakɛrinↄ kũ pãpãkɛrinↄo. 5 Yena ↄgↄi sún doárɛ arɛro. À zɛ kũ pↄ́ kũ á vĩo, zaakũ Luda pì:

Mani n tónlo,

mani pã kpányĩ zikiro.

6 Abire yãi odì kùgbãna kɛ ò pi:

Dikirimɛ ma kpanyĩri ũ,

vĩna ni ma kũro.

Bↄ́n bisãsiri ni fↄ̃ à kɛmɛnɛɛ?

Sa yãpura onaa

7 À tó á don'arɛde kũ ò Luda yã òárɛnↄ yã dↄágu. À ń kunna tàasi ká ari a lɛ́a, á Luda náani kɛ lán ń bà. 8 Yesu Kirisi dokↄ̃nↄ gĩa kũ gbãrao ari gↄrↄ sĩnda pínki. 9 Àsun tó ò á sãtɛ kũ yã nibↄ dasi dannɛnanↄoro. À mana ó swɛ̃̀ gbãna le Luda gbɛ̃kɛ gũn, adi kɛ sa'opↄ́ble kũ àdi àre ke kɛ gbɛ̃ kũ ò zɛ̀onↄnɛronlo. 10 Bizakuta sa'orinↄ zɛ́ vĩ ò sa'oki kũ ó vĩ pↄ́ble blero. 11 Sa'oriki dì gɛ̃ Ludakukin kũ pↄ́kãde aruo durunnanↄ kɛ̃mmana yãi, akũ òdi a gɛ̀ kpata bùra kpɛ. 12 Abire yãi Yesu gà wɛ̃tɛ kpɛ se, à gbã̀ bò gbɛ̃nↄnɛ kũ a zĩda aruo. 13 Ò bo ò gɛ́ a kĩnaa bùra kpɛ, wé'i ó kũ kãao se. 14 Zaakũ ó wɛ̃tɛ kũ anigↄ̃ kun vĩ laro, wɛ̃tɛ kũ àtɛn sun ó wɛ́ dↄi. 15 Abire yãi ògↄ̃ Luda sáabu kpá lakanaa sari kũ Yesu gbãnao ó sa'ona ũ. Gba kũ a sìsirinↄ dì suon gwe. 16 À laakari dↄ yãmanakɛna kũ kↄ̃gbɛ̃kɛnaaoa. Sa bire taka ona mɛ́ àdi ká Ludagu. 17 À á don'arɛdenↄ yã ma, à mì natɛńnɛ, de ò le ò zĩ kɛ kũ pↄnnao, zaakũ ò de gbɛ̃ kũ oni ń zĩ yã baba Ludanɛnↄ ũ. Tó òtɛn zĩ kɛ kũ lɛ́suruo, ani àre kɛárɛro.

Lɛ́zammanaa

18 À adua kɛwɛrɛ. Yãke tɛni ó swɛ̃̀ vĩro, odìgↄ̃ ye ògↄ̃ kú ó dↄ̀rↄↄa yã sĩnda pínki gũn. 19 Ma wɛ́ kɛáwa à adua kɛmɛnɛ, atɛ̃nsa mà le mà su á kia likalika.

20 Luda aafiade kũ ó Dikiri Yesu fùtɛ bona gan sãdãriki ũ a bàka kunna kũoo gↄrↄ sĩnda pínki aru gãi, 21 à á kɛkɛ kũ mana pínkio, de à a pↄyenyĩna kɛ, à yã kũ à kàagu kɛ ó gũn Yesu Kirisi gãi. Àkũ mɛ́ à gakuri vĩ gↄrↄ sĩnda pínki, aami.

22 Ma gbɛ̃nↄ, ma wɛ́ kɛ̀áwa, àgↄ̃ lɛ́damma yã pì kũna kũ mɛnao, zaakũ takada kũ ma kɛ̃̀árɛ zↄ̃kↄ̃ro. 23 Àgↄ̃ dↄ̃ kũ ò ó gbɛ̃ do Timↄti gbàrɛ. Tó à kà la tera, óni su á gwa lɛɛlɛ. 24 À fↄ kpá á don'arɛdenↄa ń pínki kũ Luda gbɛ̃nↄ pínki. Itali bùsudenↄ fↄ kpàáwa. 25 Luda gbɛ̃kɛ kɛárɛ á pínki.