bɛɛ yɑ̃ku kowobu, i yenibɑ swɑɑ dɑkio.

Bɛɛ Isirelibɑ, i swɑɑ dɑkio i nɔ.

Bɛɛ sinɑ kpɑɑrugibu, i swɑɑ tem kpĩiyɔ i nɔ.

Bɛɛyɑ siri bini bu kɑ yɑ̃.

Domi i kuɑ tɔmbun yinɑ Misipɑɔ,

mɑ i kuɑ ben tɑɑ Tɑboriɔ.

2 Mɑ bɑ mɑn biru kisi bɑ numɑ durum sɔɔ.

Yen sɔ̃, kon bɛɛ kpuro sɛɛyɑsiɑ.

3 Nɑ Isirelibɑ yɛ̃wɑ sɑ̃ɑ sɑ̃ɑ.

Ben goo kun mɑn berue.

Wee bɑ dɑ bɑ bũnu gɑsirɑ

bɑ tii disi doke.

bɑ ǹ kpɛ̃ bu mɑɑ wurɑmɑ ben Yinnin mi ben kookoosun sɔ̃.

Domi bũu sɑ̃ɑrun gɑsiribu ginɑ wɑ̃ɑ ben gɔ̃ru sɔɔ.

Mɛyɑ bɑ ǹ mɑɑ wi, Yinni Gusunɔ yɛ̃.

5 Isirelibɑn tii suɑbu bu sɔ̃ɔsimɔ mɛ bɑ sɑ̃ɑ.

Bɑ koo wɔrumɑ ben durum sɔ̃.

Yudɑbɑn tii bɑ koo wɔrumɑ kɑ be sɑnnu.

6 Sɑnɑm gɑm sisi

mɛ̀ sɔɔ bɑ koo bikiɑru dɑ Yinni Gusunɔn mi,

kpɑ bu kɑ nùn yɑ̃ɑnu kɑ kɛtɛbɑ yɑ̃kuru kuɑ.

Adɑmɑ bɑ ǹ nùn wɑsi,

domi u bu deri.

7 Beyɑ bɑ nùn tɔnu kɑndu kuɑ.

Domi bɑ dɑ bɑ bii seegebɑ mɑrɑ be bɑ ǹ nùn yɛ̃.

Tɛ̃, n ǹ tɛɛmɔ u kɑ bu kɑm koosiɑ be kɑ ben ɑrumɑni.

8 Yinni Gusunɔ u nɛɛ,

i tɑbun kɔbɑ soowo Gibeɑɔ kɑ Rɑmɑɔ.

I tɑbun wurenu koowo Betɛli Afɛniɔ.

Bɛɛ Bɛnyɑmɛɛbɑ, tɑbu durɔbɑ wee bɛɛn birun di.

9 Gɑri geeyɑ nɑ Isirelibɑ sɔ̃ɔmɔ.

Dɔmɑ te kon bu sɛɛyɑsiɑ, bɑ koo kɑm kowɑ.

10 Wee Yudɑbɑn wirugibu bɑ sɑ̃ɑwɑ nge be bɑ rɑ tem gbɛni

bu kɑ ben tiin tem sosi.

Yen sɔ̃, kon bu nɛn mɔru wisi nge nim torɑ.

11 Siribu bu Isirelibɑ di, mɑ bɑ bu dɑm dɔremɔ

yèn sɔ̃ bɑ kɑm nɑɑ gire.

12 Nɑ kon bu di nge gɛmi.

Kpɑ nɑ n Yudɑbɑ wɑhɑlɑ mɔ̀ nge bɑrɑ te tɑ kukunu temmɔ.

13 Mɛyɑ Isirelibɑ bɑ tii bɑrɑru wɑɑsi.

Mɑ Yudɑbɑ bɑ ben bosu wɑ.

Mɑ Isirelibɑ bɑ gɔrɑ Asiriɔ

bu kɑ sinɑ boko Yɑrɛbu somiru kɑnɑ.

Adɑmɑ u ǹ kpɛ̃ u bu bɛkiɑ

u sere nɛɛ, u koo ben bosu kpeesiɑ.

14 Nɑ ko n sɑ̃ɑwɑ nge gbee sunɔ Isirelibɑ kɑ Yudɑbɑn sɔ̃.

Kon bu wɔri n yɑɑku kpɑ n bu suɑ n kɑ doonɑ.

Goo sɑri wi u koo bu wɔrɑ sɑɑ nɛn nɔmɑn di.

ǹ n mɛn nɑ, kon bu biru kisi

kpɑ n wurɑ nɛn wɑ̃ɑ yerɔ

sere bu kɑ tubu mɑ bɑ torɑ.

Ben nɔni swɑ̃ɑru tɑ koo de bu mɑn kɑsu

kpɑ bu mɑn somiru kɑnɑ.