1 Isirelibɑ bɑ rɑ n mɑn weesu kuɑmmɛwɑ,

kpɑ bɑ n mɑn nɔni wɔ̃kumɔ.

Adɑmɑ Yudɑbɑ bɑ kɑ nɛ, Yinni Gusunɔ Dɛɛro sĩimɔ dee dee.

2 Isirelibɑ bɑ Egibitigibu gum wɛ̃ɛmɔ.

Mɑ bɑ kɑ Asirigibu ɑrukɑwɑni bɔkumɔ.

Nge mɛyɑ bɑ kɑ kpɑɑsibu kɑsu be bɑ ǹ sɑ̃ɑ gɑ̃ɑnu.

N sɑ̃ɑre bɑ woo nɑɑ gire.

Bɑ ben weesu dɑbiɑsiɑmɔ tɔ̃ɔ bɑɑtere.

Mɑ bɑ dɑɑ bɔɔbɔyɑ mɔ̀ bɑ dɔɔ.

3 Nɛ, Yinni Gusunɔ nɑ Yudɑbɑ siribu sokumɔ.

Kon be Yɑkɔbun bweseru wɔrimɑ ben dɑɑ kɔ̃sɑn sɔ̃.

Kpɑ n bu ben kɔ̃sɑn ɑre kɔsiɑ.

4 Ben bɑɑbɑ Yɑkɔbu u win mɔɔn nɑɑ tokuru nɛnuɑ

sɑɑ win mɛron nukurun di.

Ye bɑ nùn mɑrɑ u kpɛ̃ɑ,

mɑ u kɑ nɛ Gusunɔ wɔri kuɑ kɑ win dɑm kpuro.

5 U kɑ nɛn gɔrɑdo wɔri kuɑ, mɑ u kɑmiɑ.

U swĩ, mɑ u gɔrɑdo wi kɑnɑ u nùn domɑru kuɑ.

Betɛli miyɑ u kɑ nɛ Gusunɔ yinnɑ.

Mɑ nɑ kɑ nùn gɑri kuɑ.

6 Nɛnɑ Gusunɔ wɔllu kɑ tem Yinni.

Nɛn yĩsirɑ Wi u rɑ n wɑ̃ɑ.

7 Bɛɛ Isirelibɑ, i de i wurɑmɑ nɛ bɛɛn Yinnin mi.

I de i geɑ ko kpɑ i n mɑn nɑɑnɛ sɑ̃ɑ bɑɑdommɑ.

8 Bɛɛ Isirelibɑ i sɑ̃ɑwɑ nge tenku be bɑ kilo weesugiɑ nɛni.

Bɑ rɑ gbɛnɑ kɑ̃.

9 Kpɑ i nɛɛ, kɑ gem i gobi wɑ, i dukiɑ bɑkɑ gurɑ.

Kɔ̃sɑ gɑɑ sɑri ye sɔɔ. Bɛɛn sɔmburun ɑreyɑ.

10 Adɑmɑ nɛ, Gusunɔ nɑ sɑ̃ɑwɑ bɛɛn Yinni

sɑɑ mìn di i wɑ̃ɑ Egibitiɔ.

Kon mɑɑ de i wurɑ i n wɑ̃ɑ kuu bekuruginu sɔɔ

nge sɑnɑm mɛ nɑ bɛɛ yɑrɑmɑ Egibitin di i wɑ̃ɑ gbɑburɔ.

11 Nɛn sɔmɔbɑ nɑ kɑ gɑri kuɑ kɑ̃sinu sɔɔ,

kpɑ be, bu mɑɑ kɑ bɛɛ gɑri ko.

Beyɑ bɑ mɑɑ bɛɛ nɛn himbɑ sɔ̃ɔsi yɑ kɑ gisɔ girɑri.

12 Kɑ mɛ, Gɑlɑdigibu bɑ kuɑ tɔn kɔ̃sobu.

Mɑ bɑ koo kɑm ko.

Bɑ rɑ kɛtɛ kinɛ dɑbinu go Giligɑliɔ.

Adɑmɑ ben yɑ̃ku yenu nu koo ko kpee subenu gbɑɑnun kpĩi sɔɔ.

13 Yɑkɔbu u kpikiru dɑ Arɑmuɔ.

Miyɑ u sɔmburu kuɑ u yɑ̃ɑnu kpɑrɑ u kɑ kurɔ wɑ.

14 Adɑmɑ sɔmɔ goowɑ Yinni Gusunɔ u gɔrɑ

u dɑ u win bweseru Isirelibɑ yɑrɑmɑ Egibitin di.

Sɔmɔ wiyɑ u bu kpɑrɑ.

15 Adɑmɑ yenibɑ kpuro sɔɔ,

Isirelibɑ bɑ Yinni Gusunɔ nuki sɑnkɑ too too.

Yen sɔ̃, u koo de yɛm mɛ bɑ yɑri mi, mu wɔri ben wiru wɔllɔ.

U koo de bu yen sekuru wɑ.