1 Nɑ kon de bu Sɑmɑri sɛɛyɑsiɑ

yèn sɔ̃ yen tɔmbu bɑ nɛ Gusunɔ ben Yinni seesi.

Bɑ koo bu gowɑ tɑbu sɔɔ

kpɑ bu ben bii piiminu nɑm.

Kpɑ bu ben kurɔ be bɑ guri mɔn nukunu bɛsuku.

2 Osee u Isirelibɑ sɔ̃ɔwɑ u nɛɛ,

bu wurɑmɑ Gusunɔ ben Yinnin mi,

domi bɑ wɔrumɑ ben torɑnun sɔ̃.

3 Bu wurɑmɑ win mi bu kɑnɑ teni ko

te tɑ nɛɛ, Yinni Gusunɔ,

ɑ sun bɛsɛn torɑnu kpuro suuru kuo.

Kpɑ ɑ sun mɛɛri kɑ nɔnu geu.

Ye sɑ ko kɑ nun yɑ̃kuru kuɑ,

sɑ ko nun siɑrɑ.

4 Asirigii wi, u ǹ kpɛ̃ u sun fɑɑbɑ ko.

Sɑ mɑɑ yɛ̃ mɑ dumi kun sun fɑɑbɑ mɔ̀ tɑbu sɔɔ.

Sɑ ǹ mɑɑ bwɑ̃ɑroku ni sɑ tii kuɑ sokumɔ bɛsɛn yinnibu pɑi.

Domi wunɑ ɑ rɑ gobekubɑ wɔnwɔndu kue.

5 Yinni Gusunɔ u nɛɛ,

kon de nɛn tɔmbu bu kɑ den nɛ turo yɔ̃rɑ

kpɑ n bu kĩɑ too.

Nɑ ǹ mɑɑ kɑ bu mɔru mɔ̀.

6 Ko nɑ n sɑ̃ɑwɑ nge kɑkoru be, Isirelibɑn sɔ̃.

Bɑ ko n wɑ̃wɑ nge dɑ̃ɑ wɛ̃su,

kpɑ bu nuuru girɑ nge dɑ̃ɑ ni nu wɑ̃ɑ Libɑniɔ.

7 Ben kɑ̃ɑsi yi koo tɛriɑwɑ

kpɑ yi n wɑ̃ nge dɑ̃ɑ te bɑ mɔ̀ olifi,

kpɑ yi n nuburu do nge dɑ̃ɑ ni nu wɑ̃ɑ Libɑniɔ.

8 Bɑ koo gɔsirɑmɑ bu sinɑ nɛn kɔkɔrɔ

kpɑ bu mɑɑ ɑlikɑmɑ duure.

Bɑ koo kpɑrɑwɑ nge resɛm dɑ̃ɑ

kpɑ bu yĩsiru yɑri nge Libɑnin tɑm.

9 Sɑɑ ye, Isirelibɑ bɑ ǹ mɑɑ bũnu sɑ̃ɑmɔ.

Domi kon ben kɑnɑru nɔ,

kpɑ n bu nɔni doke.

Nɑ kon sɑ̃ɑwɑ nge dɑ̃ɑ ye yɑ ku rɑ gbere ben sɔ̃.

Nɛn min diyɑ bɑ koo domɑru wɑ.

10 Wi u lɑɑkɑri mɔ, u de u n tii sɛ gɑri yinin sɔ̃.

Wi u mɑɑ bwisi mɔ, u de yi nùn yeeri.

Domi Yinni Gusunɔn swɛɛ yi sɑ̃ɑwɑ dee dee.

Gemgibɑ bɑ koo sĩ yi sɔɔ.

Adɑmɑ be bɑ nùn seesimɔ, bɑ koo wɔrumɑ yi sɔɔ.