Luda yã takada kũ Bisã yão YAMISI 2

Gbɛ̃ wɛ́ gwanaa

1 Ma gbɛ̃nↄ, ákↄ̃nↄ kũ átɛni ó Dikiri gakuride Yesu Kirisi náani kɛnↄ, àsun gbɛ̃ wɛ́ gwaro. 2 Tó gbɛ̃ gɛ̃̀ á kↄ̃kakaranaa gũn wura tãnka kũ pↄ́kasa tɛ́kɛnaao dana, tó takaside kũ à bizakasa gbãsĩ danaa gɛ̃̀ se, 3 tó á wɛ́ tɛ́ gbɛ̃ kũ à pↄ́kasa tɛ́kɛna danaai, tó a pìnɛ à mↄ́ à vutɛ gu manan, tó a pì takasidenɛ à gɛ́ à zɛ dire, kesↄ̃ à mↄ́ à vutɛ á gbá sarɛ, 4 átɛn kↄ̃ tɛ̃̀ bomɛ, átɛn yã gwa kũ manafikion gweroo?

5 À ma, ma gbɛ̃ yenyĩdenↄ. Luda gbɛ̃ kũ ò de gbãnasaridenↄ ũ andunia gbɛ̃nↄnɛ sɛ̀ ògↄ̃ gbãna a náanikɛnaa gũn, de ò kpata kũ à a lɛ́ sɛ̀ gbɛ̃ kũ ò yeinↄnɛ ble. 6 Ákↄ̃nↄ sↄ̃, átɛn gbãnasaride pìnↄ kpe bo. Aruzɛkɛdenↄ mɛ́ òdi gbãna bleáwaroo? Mↄ́kↄ̃nↄ mɛ́ òdi á gátɛ ò gɛ́ kãáo yãkpatɛkɛkiaroo? 7 Mↄ́kↄ̃nↄ mɛ́ òdi tↄ́ nna kũ à kúáwa yakaroo? 8 Luda dokayã mìde pì, àgↄ̃ ye á gbɛ̃dakei lán á zĩda wɛ̃̀ndii bà. Tó á yã pì kũna yãpura, átɛn yã kɛ a zɛ́amɛ. 9 Tó átɛn kↄ̃ wɛ́ gwa sↄ̃, átɛn durunna kɛmɛ. Doka pìi vùtɛáwa, a gↄ̃ taaridenↄ ũn gwe. 10 Zaakũ tó gbɛ̃ doka kũna pínki, tó à fù mɛ̀n doa, à gↄ̃̀ taaride ũ a pínki gũmmɛ. 11 Luda pì, àsun zina kɛro. À pì dↄ, àsun gbɛ̃ dɛro. Bee tó ńdi zina kɛro, tó n gbɛ̃ dɛ̀, n gↄ̃ dokadarisari ũmɛ. 12 Ákↄ̃nↄ kũ Luda ni yã gↄ̃gↄ̃ kãáo doka kũ àdi tó ò gↄ̃ zĩdadenↄ ũ musu, àgↄ̃ yã o, àgↄ̃ yã kɛ lákũ à kↄ̃ sì kãáo nà. 13 Luda ni yãkpatɛ kɛ kũ sùrusaridenↄ sùruu sari, ama yã ni bo kũ sùrudeo nna.

Ludanaanikɛna kũ yãmanakɛnaao

14 Ma gbɛ̃nↄ, tó gbɛ̃ pì, átɛn Luda náani kɛ, tó àdi pↄ́ke kɛro, bↄ́ yãn gwee? Ludanaanikɛna bire taka ni fↄ̃ à a bo yá? 15 Tó á gbɛ̃ mɛ̀n do, gↄ̃gbɛ̃ ke nↄgbɛ̃ tɛn pↄ́kasa kũ pↄ́bleo takasi kɛ, 16 tó á gbɛ̃ke pìnɛ: Luda n gba aafiaa! Ǹsun tó ĩa n dɛro, ǹ pↄ́ ble ǹ kã, tó adi wɛ̃̀ndibadↄbↄ kpáaro, bↄ́n abire ũu? 17 Lɛmɛ se ludanaanikɛna ado pↄ́kekɛnaa sari bi yã gɛ̀ɛmɛ.

18 Tó gbɛ̃ n pì, ntɛn Luda náani kɛ, akũsↄ̃ matɛn yã kɛ, mani pinnɛ, ǹ n ludanaanikɛna pↄ́kekɛnasari mↄmɛnɛ, mani ma ludanaanikɛna mↄnnɛ ma yãkɛnaa gũn. 19 N sì kũ Luda mɛ̀n domɛ. À mana. Bee tãnanↄ se, ò dↄ̃ lɛ, akũ òdigↄ̃ lukaluka. 20 Yↄ̃nkↄ! Pↄ́ kũ à tò ludanaanikɛna pↄ́kekɛnasari pã, ń ye mà onnɛ yá? 21 Kũ ó dizi káaku Ibrahĩ a nɛ́ Isaaku kpà sa'opↄ ũ, yã dí bo kãao nna a yãkɛna yãiroo? 22 N è yá? A ludanaanikɛna kũ a yãkɛnaao kpákↄ̃imɛ. A yãkɛna mɛ́ à a ludanaanikɛna pàpai. 23 Akũ Luda yã díkĩna pàpa kũ à pì, Ibrahĩ Luda náani kɛ̀, akũ Luda tò yã bò kãao nna a náani kũ à kɛ̀ yãi. Akũ ò tↄ́ kpànɛ Luda gbɛ̃nna. 24 A è yá? Yãkɛna mɛ́ àdi tó yã bo kũ gbɛ̃o nna, adi kɛ ludanaanikɛna adonlo. 25 Lɛmɛ dↄ karua Rahabu kɛ̀ nna kũ Ludao a yãkɛna yãi, gↄrↄ kũ à gu'asirigwarinↄ dìtɛ à ń gbarɛ zɛ́ kpãni gũn. 26 Lákũ mɛ̀ ninisari de gɛ̀ ũ nà, lɛn ludanaanikɛna pↄ́kekɛnasari de gɛ̀ ũ lɛ se.

YAMISI
<
2
>