48
Gɑri yi Yinni Gusunɔ u geruɑ
Mɔɑbubɑn sɔ̃
1 Wee ye Gusunɔ Isirelibɑn Yinni wi u wɔllu kɑ tem mɔ, u geruɑ Mɔɑbubɑn sɔ̃. U nɛɛ,
Nɛbo yɑ kɑm kuɑ
domi wee bɑ yen yɑ̃nu gurɑ.
Kiriɑtɑimu yɑ wɑ̃ɑ sekuru sɔɔ
domi bɑ ye mwɑ.
Misigɑbu yɑ wɑ̃ɑ sekuru sɔɔ,
domi bɑ ye kɔsukɑ.
2 Mɔɑbun bɛɛrɛ yɑ kpɑ.
Mɑ bɑ bwisikumɔ bu Hɛsiboni kɑm koosiɑ.
Bɑ mɔ̀, su dɑ su ye kɑm koosiɑ
kpɑ yɑ kun mɑɑ wɑ̃ɑ hɑnduniɑ sɔɔ.
Wunɛ Mɑdimɛni, kɑɑ ko bɑnsu,
domi wee bɑ nun tɑbu wɔrimɑm wee.
3 Bɑ fɑɑbɑ kɑnɑmɔ sɑɑ Koronɑimun di, bɑ mɔ̀,
wee bɑ bɛsɛn yɑ̃nu gurɑmɔ.
Wee bɑ kpuro kɔsukumɔ.
4 Bɑ Mɔɑbu kɑm koosiɑ.
Mɑ bibun nɔɔ gɑ nɔɔrɑmɔ.
5 Bɑ wuri wennɛ guu te bɑ mɔ̀ Lusitiɔ,
mɑ nuku sɑnkirɑnun kuuki yi sɑrɑmɑmɔ sɑɑ Koronɑimun guurun di.
6 Bɑ mɔ̀, i duki yɑkuro, i bɛɛn wɑ̃ɑru wɔrɑ,
kpɑ i dɑ i n wɑ̃ɑ nge gbeeku kɛtɛkunu gbɑburɔ.
7 Domi i bɛɛn nɑɑnɛ dokewɑ bɛɛn nɔmɑn sɔmburu kɑ bɛɛn ɑrumɑnibɑ sɔɔ.
Wee, tɛ̃ bɑ koo bɛɛn tii mwɛɛri
kpɑ bu bɛɛn bũu wi bɑ mɔ̀ Kemɔsi
kɑ win yɑ̃ku kowobu kɑ win wirugibu
yoru mwɑ bu kɑ doonɑ.
8 Be bɑ koo bu kɑm koosiɑ mi.
Bɑ koo duwɑ wuu bɑɑgere sɔɔ.
Gen gɑgɑ kun kisirɑmɔ ben nɔmɑn di.
Bɑ koo kpuro kɑm koosiɑwɑ wɔwi sɔɔ kɑ tem tɛɛri sɔɔ.
Yinni Gusunɔwɑ u yeni geruɑ.
9 U mɑɑ nɛɛ,
i Mɔɑbubɑn sikɑ sɔɔru koowo,
domi ben gɔɔ turuku kuɑ.
Ben wusu su koo ko bɑnsu.
Goo kun ko n mɑɑ wɑ̃ɑ si sɔɔ.
10 Be bɑ Gusunɔn sɔmburu mɔ̀ kɑ ɑtɑfiiru, u bu bɔ̃rusio.
Be bɑ yinɑmɔ bu tɔmbu go kɑ tɑkobi,
Gusunɔ u bu bɔ̃rusio.
11 Wee, sɑɑ yellun di, Mɔɑbubɑ bɑ wɑ̃ɑ bɔri yɛndu sɔɔ.
Bɑ ǹ yoru diire gɑm.
Bɑ sɔ̃wɑ kpɛtɛɛ nge tɑm kɔrɔru.
Bɑ ǹ bu gɔsiɑre gɑm sɔɔ nge tɑm.
Ben dobu kɑ ben wɑni kun kɔsɑ.
12 Yen sɔ̃nɑ nɛ, Yinni Gusunɔ nɑ nɛɛ, tɔ̃ru gɑrɑ sisi tè sɔɔ kon bu tɔmbu suremɑ bu bu gɔsie wekenu gɑnu sɔɔ, kpɑ bu weke ni kɔsuku. 13 Mɔɑbu be, bɑ koo sekuru wɑ ben bũu wi bɑ mɔ̀ Kemɔsin sɔ̃, nge mɛ Isirelibɑ bɑ sekuru wɑ bũu wi u wɑ̃ɑ Betɛliɔn sɔ̃, domi wi sɔɔrɑ bɑ ben nɑɑnɛ doke.
14 Bɛɛ Mɔɑbubɑ, ɑmɔnɑ i ko i kɑ kpĩ i gere i nɛɛ,
i sɑ̃ɑwɑ tɑbu durɔbu be bɑ wɑ̃ɑ tɑbun sɔ̃.
15 Domi wee, i kɑm kuɑ.
Bɛɛn wusu su dɔ̃ɔ mwɑɑrɑ.
Mɑ yibɛrɛbɑ bɑ bɛɛn ɑluwɑɑsi dɑmgibu mwɛɛrɑ bɑ sɑkirɑ.
Yeniwɑ sinɑ boko u geruɑ. Win yĩsirɑ Gusunɔ, wɔllu kɑ tem Yinni. U nɛɛ,
16 Mɔɑbun kɑm kobu turuku kuɑ.
Nɔni swɑ̃ɑ te bɑ koo wɑ, tɑ wee fuuku fuuku.
17 Bɛɛ be i wɑ̃ɑ ben turuku, i kɑ bu gɔɔ sinɔ.
Bɛɛ be i bu yɛ̃, i bu bikio i nɛɛ,
ɑmɔnɑ n koosinɑ bɑ kɑ bɑn tenin dɑm bɑkɑm mɛ kpeerɑsiɑ mɛ.
18 Bɛɛ mɑɑ Dibonigibu, i bɛɛn sin yee bɛɛrɛginu derio,
kpɑ i nɑ i sinɑ temɔ.
Domi be bɑ Mɔɑbubɑ kɑm koosiɑ,
bɑ wee bu bɛɛ wɔri,
kpɑ bu bɛɛn gbɑ̃rɑ dɑmginu kɔsuku.
19 Bɛɛ Aroɛɛgibu, i doo swɑɑɔ i mɛɛri,
kpɑ i Mɔɑbu be bɑ kpikiru suɑ bikiɑ i nɛɛ,
mbɑ n koorɑ.
20 Bɑ koo bɛɛ wisi bu nɛɛ,
bɑ wɑ̃ɑwɑ sekuru sɔɔ bɑ diirimɔ.
I kuuki koowo, i gbɑ̃rɑ,
kpɑ i bɑɑwure nɔɔsiɑ Aɑnɔɔwɔ
mɑ bɑ Mɔɑbubɑ gurɑ.
21 Yinni Gusunɔwɑ u bu sɛɛyɑsiɑmɔ be bɑ wɑ̃ɑ wɔwɑ sɔɔ kɑ yen wuu sini sɔɔ, si bɑ mɔ̀, Holoni kɑ Yɑhɑsi kɑ Mɛfɑti, 22 kɑ Diboni kɑ Nɛbo kɑ Bɛti Dibilɑtɑimu, 23 kɑ Kiriɑtɑimu kɑ Bɛti Gɑmulu kɑ Bɛti Mɛɔni, 24 kɑ Keriɔtu kɑ Botisirɑ, Mɔɑbubɑn wusu kpuro gesi, si su wɑ̃ɑ turuku kɑ tontondeɔ.
25 Bɑ Mɔɑbubɑn dɑm buɑ,
mɑ ben yiiko yɑ kpɑ.
Yinni Gusunɔwɑ u yeni geruɑ.
26 Mɔɑbubɑ bɑ tii suɑ Gusunɔn wuswɑɑɔ. Yen sɔ̃, bu bu tɑm tɑɑsio sere bu mu siruku kpɑ bu bu yɛ̃ɛ. 27 Bɛɛ Mɔɑbubɑ, i yɑɑyo mɑ i rɑɑ Isirelibɑ yɛ̃ɛ. I rɑɑ bu wii gimɑnu koosi nge be i gbɛnɑ mwɑ.
28 Tɛ̃, i yɑrio bɛɛn wusun di
kpɑ i dɑ i n wɑ̃ɑ kpee bɑɑbɑ sɔɔ,
kpɑ i kpee goominu sɑɑri,
i bɛɛn wɑ̃ɑ yenu ko kpee bɑɑbɑ sɔɔ.
29 Sɑ Mɔɑbubɑn tii suɑbun gɑri nuɑ, kɑ ben tɔn biɑru,
kɑ sere mɑɑ ben woo kɑnɑbu,
kɑ ben degɑngɑm, kɑ ben nɔni yɔnnu.
30 Yinni Gusunɔ u nɛɛ, nɛn tii, nɑ yɛ̃ mɑ bɑ rɑ tii sue ben gɑri gerubu sɔɔ. Adɑmɑ ye bɑ mɔ̀ kpuro, yɑ ku rɑ n ɑrufɑɑni gɑɑ mɔ.
31 Yen sɔ̃nɑ nɑ Mɔɑbubɑ kpuro gɔɔ swĩiyɑmmɛ.
Mɑ nɑ Kiri Herɛsigibu weeweenu kuɑmmɛ.
32 Sibimɑn resɛm gbɑɑru, nɑ wuri mɔ̀ wunɛn sɔ̃.
Nɛn wuri yi, yi Yɑsɛɛgibugii kere.
Yellu, wunɛn dɑ̃ɑ kɑ̃ɑsi yi nim wɔ̃ku sɑrɑmɔ.
Yi mɑm Yɑsɛɛn dɑɑrun nim dɛkɑmɔ.
Adɑmɑ wee, kɑm koosio u yin mɑrum wɔri u kɑm koosiɑ.
33 Nuku dobun womusu kun mɑɑ wɑ̃ɑ Mɔɑbubɑn gbeɑɔ.
Goo ku rɑ mɑɑ tɑm gɑmɛ mi.
Tɑm sɑri wekenu sɔɔ.
Nuku dobun kuuki kun mɑɑ nɔɔrɑmɔ mi,
mɑ n kun mɔ tɑbugii.
34 Hɛsibonigibu bɑ nɔɔgiru sue bɑ somiru kɑnɑmɔ. Bɑ ben nɔɔ nɔɔmɔ Eleɑleɔ, kɑ Yɑhɑsiɔ, kɑ Soɑriɔ, kɑ Koronɑimuɔ, kɑ Egɑlɑti Selɑsiɔ. Domi bɑɑ Nimurimun dɑɑru tɑ kɑm kuɑ.
35 Yinni Gusunɔ u nɛɛ, kon den Mɔɑbubɑ kpeerɑsiɑ, be, be bɑ yɔɔmɔ ben bũu turɑnɔ bɑ nu turɑre dɔ̃ɔ dokeɑmmɛ.
36 Yen sɔ̃nɑ nɛn gɔ̃ru gɑ sumɔ nge guuru Mɔɑbubɑ kɑ Kiri Herɛsigibun sɔ̃. Domi ben dukiɑ ye bɑ gurɑ kpuro yɑ kɑm kuɑ. 37 Tɔmbu kpuro bɑ ben seri kɑ ben tobɑ kɔnɑ, bɑ tii mururɑ nɔmɑ yiru kpuro, bɑ sɑɑki deewɑ ben nuku sɑnkirɑnun sɔ̃. 38 Bɑ gɔɔ wuri mɔ̀ yɛnu bɑɑgere sɔɔ kɑ sere mi bɑ rɑ mɛnnɛ kpuro gesi domi nɑ Mɔɑbubɑn tem kɔsukɑ nge weke te goo kun mɑɑ kĩ. Nɛ, Yinni Gusunɔwɑ nɑ yeni geruɑ. 39 I gɔɔ swĩiyɔ, Mɔɑbubɑ bɑ wɔrumɑ. Bɑ biruku yirɑ wurɑ. Annɑ ɑ sekuru wɑ. Be bɑ kɑ bu sikerenɛ kpuro, bɑ bu yɛ̃ɛmɔ.
40 Yinni Gusunɔ u nɛɛ, wee, yibɛrɛbɑ bɑ koo nɑ nge yɑberekunu ni nu bɛllimɔ wɔllɔ.
41 Kpɑ bu wuu ge bɑ mɔ̀ Keriɔtu mwɑ,
bu gen gbɑ̃rɑnu kɔsuku.
Mɔɑbun tɑbu durɔ dɑmgibu bɑ koo nɑndɑ nge tɔn kurɔ wi u yiire u kĩ u mɑ.
42 Bɑ koo Mɔɑbubɑ kpeerɑsiɑ.
Ben bweserɑ koo nɔru ko,
domi bɑ nɛ, Yinni Gusunɔ seesi.
43 Wee, bɑ bu yinɑ kɑ tɑɑ kɑ suurɑ bɛrie.
44 Wi u dukɑ mɔ̀ bɛrum sɔ̃,
u koo wɔriwɑ suurɑ ye sɔɔ.
Wi u mɑɑ yɑrɑ suurɑ yen di,
kpɑ u tɑɑ mwɑɑrɑ.
Domi kon de Mɔɑbun sɛɛyɑsiɑbun tɔ̃ru tu nɑ.
Nɛ, Yinni Gusunɔwɑ nɑ yeni geruɑ.
45 Be bɑ kpikiru suɑ bɑ ǹ mɑɑ dɑm tie,
bɑ wɛ̃rɑ yeru kɑsu Hɛsiboniɔ.
Adɑmɑ dɔ̃ɔ yɑri yi koo yɑri yen sinɑ boko Sihonin dirun di,
yi dɑ yi Mɔɑbubɑn tem nɔɔ burɑ yenu kɑ mɛn guunu di.
46 Bɛɛ, Mɔɑbubɑ, i kɑm kuɑwɑ.
Bɛɛ Kemɔsigibu, i kpeerɑwɑ.
Wee, bɑ koo bɛɛn bibu yoru mwɛɛri bu kɑ doonɑ.
47 Adɑmɑ sɑɑ gɑɑ sisi
yè sɔɔ kon kɑ Mɔɑbu be bɑ yoru mwɛɛrɑ mi wurɑmɑ ben temɔ.
Nɛ, Yinni Gusunɔwɑ nɑ yeni geruɑ.
Nge mɛyɑ kon kɑ Mɔɑbubɑ sɛɛyɑsiɑ.