1 Yinni Gusunɔ u nɛɛ, yen tɔ̃ɔ te,

kon Yudɑbɑ kɑ ben wuu Yerusɑlɛmu wesiɑ nge yellu.

2 Kpɑ n bwese tukunu kpuro mɛnnɑ

n nu sure Yosɑfɑtin wɔwɑ sɔɔ.

Miyɑ kon nu siri

kɔ̃sɑ ye nu nɛn tɔmbu Isirelibɑ kuɑn sɔ̃.

Domi nu bu yɑrinɑsiɑ tem kpuro sɔɔ.

Mɑ nu ben tem bɔnu kuɑ.

3 Nu nɛn tɔmbu bɔnu kuɑ kɑ tɛtɛ.

Nu ben ɑluwɑɑsibɑ mwɛɛrɑ nu dɔrɑ

nu kɑ wɑ nu kurɔ tɑnɔbu dwe.

Mɑ nu wɔndiɑbɑ mwɛɛrɑ nu dɔrɑ nu kɑ tɑm nɔ.

4 Bɛɛ Tirigibu kɑ Sidonigibu kɑ sere be bɑ wɑ̃ɑ Filisitibɑn temɔ,

mbɑ i kĩ nɛn mi.

I kĩ i mɑn mɔru kɔsiɑwɑ?

Ǹ n mɛn nɑ, nɑ ǹ tɛɛmɔ n kɑ mɑɑ bɛɛ mɔru kɔsie.

5 Wee i nɛn sii geesu kɑ nɛn wurɑ

kɑ nɛn ɑrumɑni gurɑ.

Mɑ i dɑ i ye kpuro yi bɛɛn bũu sɑ̃ɑ yerɔ.

6 Mɑ i Yudɑbɑ kɑ Yerusɑlɛmugibu mwɛɛrɑ i Gɛrɛkibɑ dɔre.

Nge mɛyɑ i kɑ bu tondɑsiɑ ben tem di.

7 Adɑmɑ nɛ, kon kɑ bu wurɑmɑ mi bɑ rɑɑ wɑ̃ɑ.

Kon de kɔ̃sɑ ye i bu kuɑ mi,

yu wɔri bɛɛn wiru wɔllɔ.

8 Kon bɛɛn bibu Yudɑbɑ dɔre.

Kpɑ be mɑɑ, bu be Sɑbegibu dɔre,

be bɑ wɑ̃ɑ n tomɑ.

Yeniwɑ nɛ, Yinni Gusunɔ nɑ geruɑ.

i bwese tukunu nɔɔsio bu tɑbun sɔɔru ko.

Nu tɑbu durɔ dɑmgibu seesio, kpɑ bu swɑɑ wɔri,

tɑbu kowobu kpuro gesi.

10 Nu nin nɑɑ tebonu gɔsio tɑkobibɑ,

kpɑ nu nin kɔmbɔnu gɔsiɑ yɑɑsi.

Be bɑ rɑɑ sɑ̃ɑ bɛrurobu, bu tii koowo tɑbu durɔbu.

11 I seewo fuuku i nɑ.

Bɛɛ bwese ni i wɑ̃ɑ turuku, i mɛnnɑmɑ.

Yinni Gusunɔ, ɑ de wunɛn tɑbu kowobu bu nɑ.

12 Mɑ Yinni Gusunɔ u nɛɛ, bɛɛ bwesenu kpuro,

i seewo i nɑ Yosɑfɑtin wɔwɑ yen mi.

Domi miyɑ kon sinɑ

n bwese ni nu wɑ̃ɑ mi kpuro siri.

13 Domi ben nuku kɔ̃surɑ bɑndɑ.

I kɔmbɔnu suo i tɔn be gɛ̃ nge dĩɑ ni nu ye.

I nɑ i bu munku nge resɛm ye bɑ doke gɑmɑ yerɔ,

mɑ yen nim mu kotosu yibɑ.

14 Wee tɔn wɔru gɑ wee wɔwɑ yèn mi bɑ koo tɔmbu siri.

Domi nɛ, Yinni Gusunɔn tɔ̃ɔ te, tɑ turɑ

tè sɔɔ kon nɛn mɔru sɔ̃ɔsi.

15 Sɔ̃ɔ kɑ suru kun mɑɑ bɑllimɔ.

Mɑ kperi yi yɑm tĩrɑ.

16 Nɛ, Yinni Gusunɔ nɑ kukirimɔ Siɔnin guurun di.

Nɛn nɔɔ gɑ nɔɔrɑmɔ Yerusɑlɛmun di.

Wɔllu kɑ tem mu yĩirimɔ.

Adɑmɑ nɑ nɛn tɔmbu Isirelibɑ kɔ̃su.

Nɛnɑ nɑ sɑ̃ɑ ben kuku yeru.

17 Bɛɛ Isirelibɑ, i ko i giɑ

mɑ nɛ Gusunɔ nɑ sɑ̃ɑwɑ bɛɛn Yinni,

nɛ wi nɑ wɑ̃ɑ Siɔniɔ nɛn guu dɛɛrɑru mi.

Yerusɑlɛmu kpuro yɑ koo kpɑm ko nɛgiɑ.

Tɔn tukobu bɑ ǹ mɑɑ ye wɔrimɔ.

18 Sɑɑ gɑɑ wee yè sɔɔ resɛm yɑ koo geɑ ko

sere kɑ gungunu wɔllɔ.

Kpɑ sɑbenu nu di mi.

Kpɑ nu bom ko mu n kpɑ̃.

Yudɑn tem dɑɑnu kpuro nu koo nim koku.

Dɑru kokɑ gɑɑ koo yɑri

Yinni Gusunɔn sɑ̃ɑ yerun di,

kpɑ yen nim mu dɑ

sere Sitimun wɔwɑɔ.

19 Egibiti yɑ koo kɑm ko,

kpɑ Edɔmun tem mu ko bɑnsu.

Domi bɑ Yudɑbɑ dɑm dɔre,

mɑ bɑ tɑɑrɛ sɑrirugibu go.

20-21 Adɑmɑ kon be bɑ tɔmbun yɛm yɑri mi mɔru kɔsiɑ.

Kpɑ Yudɑbɑ kɑ Yerusɑlɛmugibu bɑ n wɑ̃ɑ ben temɔ

sere kɑ bɑɑdommɑɔ.

Kpɑ nɛ, Yinni Gusunɔ nɑ n wɑ̃ɑ Siɔniɔ.