1 Buri kũ ò kú Yoda ifãlɛtɛ kpanↄ, sĩ̀sĩdenↄ kũ gusaradenↄ kũ ísiralɛdenↄ ari à gɛ̀ɛ pɛ́ Lɛbana bùsuua, Itinↄ kũ Amↄrinↄ kũ Kanaanↄ kũ Pɛrizinↄ kũ Ivinↄ kũ Yebusinↄo, kũ ń kínanↄ Ai yã pìi baaruu mà, 2 akũ ò kↄ̃ kàkara ń pínki de ò gɛ́ ò zĩ̀ ká kũ Yↄsuao kũ a gbɛ̃ Isarailanↄ.

3 Kũ Gibiↄ̃denↄ yã kũ Yↄsua kɛ̀ Yɛrikonɛ kũ Aio baaruu mà, 4 ò ↄ̃ndↄ̃ kpàtɛńyĩ. Ò kusuna kàka asasa zĩkũnanↄ gũn ò dìdi zaakinↄnɛ kũ sèwɛ̃ tùru zĩ parana nabinabinanↄo. 5 Ò kyate nambata nanananↄ kpákpana, ò uta kasanↄ dadana. Ń burodi kusuna korikũna akũsↄ̃ à pukpana.

6 Ò fùtɛ ò gɛ̀ɛ ò Yↄsua lè kũ a gbɛ̃nↄ Giligala bùran, akũ ò pìńnɛ: Bùsu kũ o bon zã̀. Ó ye à lɛ́dokↄ̃nↄ kɛ kũoo. 7 Akũ Isarailanↄ pì Ivi pìnↄnɛ: Tó á bɛ kú la kãnimɛ, óni lɛ́dokↄ̃nↄ kɛ kãáoro yoo! 8 Akũ ò pì Yↄsuanɛ: N zↄ̀blerinↄn ó ũ. Akũ Yↄsua ń lá à pì: Dínↄmɛ á ũu? A bo mámɛɛ? 9 Ò wèa ò pì: Ókↄ̃nↄ n zↄ̀blerinↄ, o bo bùsu zã̀zãmmɛ Dikiri n Luda tↄ́ kũ à dàgula yãi. O a baaruu mà kũ yã kũ à kɛ̀ Misilanↄ pínki 10 kũ yã kũ à kɛ̀ Amↄrinↄ kína gbɛ̃nↄn pla kũ ò kú Yoda bara direnↄnɛ, Ɛsɛbↄ̃ kína Siↄ̃ kũ Basã kína Ogu kũ à kú Asataroo. 11 Ó gbɛ̃ zↄ̃kↄ̃nↄ kũ ó bùsudenↄ pì ò kusuna sɛ́ ò su ò á le, ò piárɛ á zↄ̀blerinↄmɛ ó ũ. Abire yãi à lɛ́dokↄ̃nↄ kɛ kũoo. 12 Ó kusunan dí. O boo bɛ burodi wãna ũmɛ gↄrↄ kũ o da zɛ́n ótɛn su á kĩnaa. À gwa deran à kori kũ̀ nà à pùu kpà. 13 Ó wɛ̃ tùrunↄn dí. O wɛ̃ kàn tùru dufu ũmɛ. À gwa deran ò pàrapara nà. À ó utanↄ kũ ó kyatenↄ gwa. Ò yàkayaka tá gbã̀na kũ o ò yãi. 14 Akũ Isarailanↄ ń kusuna blè kũńwo Dikiri lɛ́ sari. 15 Yↄsua lɛ́dokↄ̃nↄ kɛ̀ kũńwo à pì áni ń dɛdɛro, akũ Isaraila don'arɛdenↄ la dà a yã musu.

16 Ń lɛ́dokↄ̃nↄkɛna kũńwoo gbɛra a gↄrↄ aakↄ̃de zĩ, akũ ò mà kũ ń bɛ zã̀ kũńworo, ò kú kↄ̃ sarɛmɛ. 17 Akũ Isarailanↄ dà zɛ́n, a gↄrↄ aakↄ̃de zĩ ò kà ń wɛ̃tɛnↄ kĩnaa, Gibiↄ̃ kũ Kɛfirao kũ Beroo kũ Kiriayarimuo. 18 Odi lɛ́tɛḿmaro, zaakũ ń don'arɛdenↄ la dàńnɛ kũ Dikiri ń Luda tↄ́omɛ. Gbɛ̃ sĩnda pínki tɛn yãkete ká ń don'arɛdenↄi, 19 akũ don'arɛde pìnↄ pìńnɛ: Ókↄ̃nↄ mɛ́ o la dàńnɛ kũ Dikiri ó Luda tↄ́o. Adi kũ ò ↄ naḿma doro. 20 Yã kũ óni kɛńnɛn dí. Óni ń tó gwe ladana kũ o kɛ̀ńnɛ yãi, de Dikiri sún pↄ fɛ̃ kũooro. 21 Akũ ò ɛ̀ra ò pì: Ò ń tó, onigↄ̃ de ó yàkawɛrinↄ ũ kũ ó ítↄtↄrinↄ. Akũ Isarailanↄ zɛ̀ kũ ń don'arɛdenↄ yã pìio.

22 Akũ Yↄsua Gibiↄ̃denↄ sìsi à pìńnɛ: Bↄ́yãi a ɛ́kɛ tòwɛrɛ lɛɛ? Ase ó katɛna kↄ̃ gbálamɛ, akũ a pì á kúki zã̀ kũoo yá? 23 Ma Luda láari bòáwa sà. Ánigↄ̃ de a kpɛ́ yàkawɛrinↄ ũ kũ a ítↄtↄrinↄo gↄrↄ sĩnda pínki. 24 Akũ ò pìnɛ: Ò pì ókↄ̃nↄ n zↄ̀blerinↄnɛ súsu lákũ Dikiri n Luda ò a zↄ̀bleri Musanɛ nà. À pì áni bùsu pì kpááwa pínki à gbɛ̃ kũ ò kunnↄ kakatɛárɛ ń pínki. Abire yãi vĩna ó kũ manamana ó wɛ̃̀ndi yã musu, akũ o yã pìi kɛ̀. 25 Ó kú n ↄĩmɛ sà. Yã kũ à kɛ̀nnɛ mana akũsↄ̃ à zɛ́ vĩn kɛwɛrɛ. 26 Lɛn Yↄsua kɛ̀ lɛ à ń bó Isarailanↄ ↄĩ, odi ń dɛdɛro. 27 Zĩ birean à ń dítɛ Isarailanↄ yàkawɛrinↄ kũ ń ítↄtↄrinↄ ũ, òdigↄ̃ yàka wɛ òdigↄ̃ í tↄ́tↄ Dikiri gbagbakinɛ gu kũ Dikiri ni ditɛn. Akũ ò kun lɛ ari kũ a gbãrao.