1 Yↄsua Isaraila burinↄ kàkara Sɛkɛmu. À Isaraila gbɛ̃ zↄ̃kↄ̃nↄ kũ ń mìdenↄ kũ ń yãkpatɛkɛrinↄ kũ ń don'arɛdenↄ sìsi, akũ ò sù ò zɛ̀ Luda arɛ. 2 Akũ Yↄsua pìńnɛ: Yã kũ Dikiri Isarailanↄ Luda òon dí: Á dizinↄ kú Yuflati bara dire yã, ò dò tãnanↄi. Ibrahĩ kũ Naonↄ de Tera kú ń tɛ́. 3 Akũ ma á dizi káaku Ibrahĩ sɛ̀ zaa Yuflati bara dire, ma gɛ̃tɛ kãao Kanaanↄ bùsun pínki, akũ ma tò a buri kↄ̃̀. Ma a gbà Isaaku, 4 akũ ma Isaaku gbà Yakubu kũ Isauo. Ma Isau gbà Sei gusĩsĩde. Yakubu kũ a nɛ́nↄ sↄ̃ ò tà Misila.

5 Ma Musa kũ Harunaoo zĩ̀, akũ ma wɛ́ tã̀ Misilanↄa kũ yã kũ ma kɛ̀ ń tɛ́nↄ, akũ ma á bↄ́tɛn. 6 Kũ ma á dizinↄ bↄ̀tɛ Misila, kũ a ka ísirai, akũ Misilanↄ pɛ̀tɛái kũ sↄ̃gonↄ kũ sↄ̃denↄ ari Isira Tɛ̃rai. 7 Kũ a ↄ́ↄ dↄ̀mɛnɛ, akũ ma gusira dà á dagura kũ Misila pìnↄ, akũ ma tò ísira dàńla míↄmiↄ. Á wɛ́ yã kũ ma kɛ̀ Misilanↄnɛ è. Abire gbɛra a gↄrↄ pla kɛ̀ gbárannan.

8 Ma su kãáo Amↄri kũ ò kú Yoda ifãboki kpanↄ bùsun. Kũ ò fùtɛái kũ zĩ̀io, akũ ma ń náárɛ á ↄĩ. Ma ń kákatɛ, akũ ń bùsuu gↄ̃̀ á pↄ́ ũ. 9 Kũ Zipo nɛ́ Balaki, Mↄabunↄ kína fùtɛái kũ zĩ̀io, à Bɛↄ nɛ́ Balamu sìsi à láari boáwa. 10 Akũ ma gi Balamu yã mai ma tò à sa mana òárɛ, ma á bó Balaki ↄĩ. 11 Abire gbɛra a bikũ Yodaa a ka Yɛriko. Akũ Yɛrikodenↄ zĩ̀i kà kãáo. Amↄrinↄ kũ Pɛrizinↄ kũ Kanaanↄ kũ Itinↄ kũ Gigasinↄ kũ Ivinↄ kũ Yebusinↄ zĩ̀i kà kãáo dↄ, akũ ma ń náárɛ á ↄĩ. 12 Ma zúmantɛ̃nↄ gbàrɛ á arɛ, ò pɛ̀árɛ Amↄrinↄ kína gbɛ̃nↄn planↄa. Adi kɛ á fɛ̃nɛda ke á kà mɛ́ à pɛ̀ḿmaro. 13 Ma zĩtɛ kũ ákↄ̃nↄ mɛ́ a a zĩ kɛ̀ro kpàáwa kũ wɛ̃tɛ kũ ákↄ̃nↄ mɛ́ a kàtɛronↄ, akũ á kú wɛ̃tɛ pìnↄ gũn. Átɛn geepi lí kũ kù lí kũ ákↄ̃nↄ mɛ́ a bàronↄ bɛ ble.

14 Akũ Yↄsua pì: Àgↄ̃ Dikiri vĩna vĩ àgↄ̃ doi yãpura kũ nɛ̀sɛɛo mɛ̀n do. À tãna kũ á dizinↄ dòńyĩ Yuflati bara dire kũ Misilaonↄ bo á tɛ́ à do Dikirii. 15 Tó zↄ̀blena Dikirinɛ dí kɛárɛro, à zɛ kũ tãna kũ á ye à doiio gbãra, tãna kũ á dizinↄ dòńyĩ Yuflati bara direnↄn, Amↄri kũ á kú ń bùsunnↄ pↄ́n yá. Makũ kũ ma bedenↄ sↄ̃, Dikirin ónigↄ̃ doi. 16 Akũ gbɛ̃nↄ wèa ò pì: Gyam! Óni fↄ̃ ò pã kpá Dikirii ò do tãnanↄiro. 17 Dikiri ó Luda mɛ́ à ó bó zↄ̀blen Misila bùsun kũ ó denↄo. Àkũ mɛ́ à daboyã zↄ̃kↄ̃ↄ pìnↄ kɛ̀ ó wára, à ó dãkpã ó táa'onaa gũn pínki à ó bó buri kũ ó gɛ̃tɛ ń gũnnↄ ↄĩ ń pínki. 18 Dikiri mɛ́ à pɛ̀wɛrɛ Amↄrinↄa kũ buri kũ ò kú bùsu díkĩnannↄo. Abire yãi ónigↄ̃ do Dikirii se, zaakũ àkũmɛ ó Luda ũ.

19 Akũ Yↄsua pì gbɛ̃nↄnɛ: Áni fↄ̃ à do Dikiriiro. Zaakũ à kú adona, Luda nɛ̀sɛgↄ̃bademɛ. Ani á taarinↄ kũ á durunnanↄ kɛ̃áwaro. 20 Bee kũ à yã mana kɛ̀árɛ yã, tó a pã kpài a do buri zĩ̀tↄnↄ tãnanↄi, ani ɛra à kisira zĩáwa à á kakatɛ. 21 Akũ gbɛ̃nↄ pì Yↄsuanɛ: Lɛnlo! Dikirin ónigↄ̃ doi. 22 Akũ Yↄsua pìńnɛ: Ákↄ̃nↄmɛ á zĩda sèedadenↄ ũ, kũ a zɛo àgↄ̃ do Dikirii. Akũ ò pì: Ee! A sèedadenↄmɛ ó ũ. 23 Akũ Yↄsua pì: Tó lɛmɛ, à buri zĩ̀tↄnↄ tãna kũ ò kú kãáonↄ bo á tɛ́ à á swɛ̃̀ kpá Dikiri Isarailanↄ Ludaa. 24 Akũ gbɛ̃nↄ pìnɛ: Dikiri ó Ludan ónigↄ̃ doi ògↄ̃ a yã ma.

25 Zĩ birean Yↄsua ɛ̀ra à Dikiri bàka kunna kũńwo yã kɛ̀kɛ gbɛ̃nↄnɛ. Zaa Sɛkɛmu gwe à dokayãnↄ kũ yãditɛnanↄ zɛ́ kpàtɛńnɛ, 26 akũ à yã pìnↄ kɛ̃̀ Luda doka takadan. Akũ à gbɛ̀ gbɛ̃̀ntɛ̃ɛ sɛ̀ à pɛ̀tɛ gbiri lí gbáru Dikiri gbagbakia gwe. 27 Akũ à pì gbɛ̃nↄnɛ: À gwa! Gbɛ̀ díkĩna mɛ́ anigↄ̃ dewɛrɛ sèedade ũ. Gbɛ̀ɛ pì yã kũ Dikiri òwɛrɛ mà pínki. Anigↄ̃ deárɛ sèedade ũ de àsun manafiki kɛ á Ludanɛro. 28 Yↄsua gbɛ̃nↄ gbàrɛ, akũ baadi tà a bùsu kũ ò kpàa túbi ũ gũn.

29 Yã birenↄ gbɛra Dikiri zↄ̀bleri Yↄsua, Nuni nɛ́ gà. À kɛ̀ wɛ̃̀ basↄↄro akuri. 30 Ò a vĩ̀ gu kũ à de a túbi ũ gũn Timina Sɛra, Ɛflaimunↄ gukpiden Gaasi kpi gugbãnduru kpa. 31 Isarailanↄ zↄ̀ↄ blè Dikirinɛ Yↄsua gↄrↄa pínki kũ gbɛ̃ zↄ̃kↄ̃ kũ ò kun a gbɛranↄ gↄrↄaao dↄ. Gbɛ̃ zↄ̃kↄ̃ↄ pìnↄ wɛ́ sì yã kũ Dikiri kɛ̀ Isarailanↄnɛlɛ pínki.

32 Yusufu wánↄ kũ Isarailanↄ bòo Misila sↄ̃, ò vĩ̀ Sɛkɛmu zĩtɛ gũn, kũ Yakubu lù Sɛkɛmu de Amↄ nɛ́nↄa andurufu mɛ̀n basↄↄro. Zĩtɛ pì kú Yusufunↄ túbi gũmmɛ. 33 Kũ Haruna nɛ́ Ɛlɛaza gà, akũ ò a vĩ̀ zaa Gibɛa, wɛ̃tɛ kũ ò kpà a nɛ́ Finɛasia túbi ũ Ɛflaimunↄ gukpiden.