1 Su tɛ̃ nɛɛ, goo u bɔ̃ruɑ mɑ u koo seedɑ di gɑ̃ɑ ni u wɑn sɔ̃, ɑdɑmɑ u ǹ geruɑ ye u wɑ, ǹ kun mɛ ye u yɛ̃. Sɑɑ ye sɔɔ, yɛ̃ro u torɑwɑ mi.

2 Su tɛ̃ kpɑm nɛɛ, goo u gɑ̃ɑnu bɑbɑ ye yɑ disi mɔ u kun kɑ bɑɑru, ɑɑ, yɑɑ sɑbe te bɑ ku rɑ din gorɑ? Ǹ kun mɛ gbeeku yɑɑ ye bɑ ku rɑ din gorɑ? Ǹ kun mɛ yɑɑ ye yɑ rɑ kɑbirin gorɑ? Sɑɑ ye sɔɔ, yɛ̃ro u disi duurɑwɑ mi.

3 Su mɑɑ tɛ̃ nɛɛ, goo ù n win winsim bɑbɑ wi u disi gɛɛ mɔ yi yi koo nùn tiɑ, n deemɑ u ǹ yɛ̃, mɑ u rɑ ye tubɑ, yɛ̃ro u torɑwɑ mi.

4 Torɑru gɑru wee mɑɑ. Su tɛ̃ nɛɛ, goo u bɔ̃ruɑ u win winsim kɔ̃sɑ kuɑ ǹ kun mɛ u nùn geɑ kuɑ, u ǹ bwisikɑ, ù n deemɑ gɑri yi, gɑri giriyɑ u geruɑ, yɛ̃ro u torɑwɑ mi.

5 Goo ù n torɑ nin gɑru kuɑ, u koo yen tuubɑ kowɑ. 6 Adɑmɑ u sere torɑ ten suuru wɑ, u koo yɑ̃ɑ niru ǹ kun mɛ boo niu gowɑ u kɑ Yinni Gusunɔ yɑ̃kuru kuɑ. Yen biru yɑ̃ku kowo u koo nùn suuru kɑnɑbun wororu koosi, kpɑ u sere win torɑrun suuru wɑ.

7 Goo ù kun kpɛ̃ u yɑ̃ɑ niru ǹ kun mɛ boo niu wɑ u kɑ torɑrun yɑ̃kuru ko, u koo kpĩ u kpɑrukonu yiru ǹ kun mɛ totobɛrɛnu yiru kɑsu. Gunɔ gen teuwɑ bɑ koo kɑ torɑrun yɑ̃kuru ko. Kpɑ bu mɑɑ kɑ teu geni yɑ̃ku dɔ̃ɔ mwɑɑrɑrugiru ko. 8 Bɑ koo ginɑ yɑ̃ku kowo wi gunɔ ge wɛ̃wɑ ge bɑ kɑ torɑrun suuru kɑnɑbu nɑ mi, kpɑ u gen wĩiru buɑ u kun sɔsie. 9 Kpɑ u gen yɛm dɛkɑ u yɛ̃ke yɑ̃ku yerun nɔɔ bɔkɑɔ, mɛ mu tie kpɑ u wisi ten temɔ. Yɑ ko n sɑ̃ɑwɑ torɑrun yɑ̃kuru. 10 Yen biru yɑ̃ku kowo u koo gunɔ yiruse suɑ nge mɛ woodɑ yɑ geruɑ u kɑ yɑ̃ku dɔ̃ɔ mwɑɑrɑrugiru gɑru ko. Kpɑ u nùn suuru kɑnɑbun wororu koosi. Nge mɛyɑ Gusunɔ u koo kɑ yɛ̃ro suuru kuɑ.

11 Goo ù kun kpɛ̃ u kpɑrukonu yiru ye wɑ, ǹ kun mɛ totobɛrɛnu yiru ye, u kɑ som buuru kilo nnɛ nɑ u kɑ yɑ̃kuru ko kpɑ u kɑ win torɑrun suuru wɑ. Adɑmɑ u ku mu gum doke, u ku mɑɑ mu turɑre doke, domi u kɑ mu nɑwɑ u kɑ win torɑrun suuru wɑ. 12 U koo kɑ som mɛ dɑwɑ yɑ̃ku kowon mi kpɑ yɑ̃ku kowo wi, u mɛn nɔm kure teeru sɔkɑ u dɔ̃ɔ doke mi bɑ rɑ yɑ̃ku dɔ̃ɔ mwɑɑrɑrugiru ko. Som nɔm kure tee te, tɑ koo de Yinni Gusunɔ u n yɛ̃ro yɑɑye. Yɑ̃ku terɑ tɑ koo de u win torɑrun suuru wɑ. 13 Sɑɑ ye sɔɔ, yɑ̃ku kowo wi, u koo wi u torɑ suuru kɑnɑbun wororu koosi. Kpɑ Gusunɔ u nùn win torɑrun suuru kuɑ.

Kpɑ yɑ̃ku kowo u mɛ mu tie suɑ win tiin sɔ̃, nge gberun dĩɑnun yɑ̃kunu.

14 Yinni Gusunɔ u Mɔwisi sɔ̃ɔwɑ u nɛɛ, 15 goo ù n gɑ̃ɑnu nɛni ni n weenɛ u Yinni Gusunɔn wɛ̃, mɑ u ǹ yɛ̃ mɑ Yinni Gusunɔginɑ, wee ye u koo ko win torɑ ten sɔ̃. Kɑɑ nùn yɑ̃ɑ kinɛru te tɑ ǹ ɑlebu gɑɑ mɔn geeru burɑwɑ te u koo kɑsu u kɑ nɑ u kɑ torɑrun sɔmbun yɑ̃kuru ko. Kɑɑ ten gee te burɑwɑ kɑ sii geesun gobi yi bɑ rɑ di Yinni Gusunɔn kuu bekurugirɔ. 16 Kpɑ u kɑ gɑ̃ɑ ni u nɛni mi nɑ. Yen biruwɑ u koo mɑɑ kɑ nin bɔnu nɔɔbusen tiɑ nɑ. Yɑ̃ku kowowɑ u koo ye wɛ̃. Yɑ̃ku kowo wiyɑ u koo nùn torɑrun yɑ̃kuru kuɑ, kpɑ u sere suuru wɑ.

17 Goo ù n Yinni Gusunɔn woodɑ gɑɑ sɑrɑ, bɑɑ u kun yɛ̃, u torɑwɑ mi. Yen torɑrɑ ko n nùn wɑ̃ɑsiwɑ. 18 Yen sɔ̃, u koo kɑ yɑ̃ɑ kinɛru te tɑ ǹ ɑlebu gɑɑ mɔ dɑwɑ yɑ̃ku kowon mi, win torɑ ten sɔ̃ nge mɛ n weenɛ u kɔsiɑ. Kpɑ yɑ̃ku kowo u nùn suuru kɑnɑbun wororu koosi. Sɑɑ ye sɔɔrɑ Gusunɔ u koo nùn suuru kuɑ. 19 Yɑ ko n sɑ̃ɑwɑ torɑrun sɔmbun yɑ̃kuru. Domi yɛ̃ro u Yinni Gusunɔ torɑriwɑ.

20 Yinni Gusunɔ u kpɑm Mɔwisi sɔ̃ɔwɑ u nɛɛ, 21 goo ù n win winsim weesu kuɑ gɑ̃ɑ ni u nùn berusie sɔɔ, ǹ kun mɛ u bɔkurɑ, ǹ kun mɛ u gbɛnɑ, ǹ kun mɛ u kɑwɑ, 22 ǹ kun mɛ u gɑ̃ɑnu dɔbɑ mɑ u siki, ǹ kun mɛ u bɔ̃ri weesugii kuɑ, 23 tɔnu win bweseru u Yinni Gusunɔ torɑriwɑ mi. U koo gɑ̃ɑ ni u gbɛnɑ mi wesiɑ, ǹ kun mɛ ni u kɑwɑ mi, ǹ kun mɛ ye bɑ nùn berusiɑ mi, ǹ kun mɛ ye u dɔbɑ mɑ u siki, 24 ǹ kun mɛ yèn bɔ̃ri u kuɑ mi. Adɑmɑ n ǹ mɔ ye tɔnɑ u koo wesiɑ. U koo mɑɑ yen bɔnu nɔɔbusen tiɑ kɔsiɑwɑ dɔmɑ te u koo win torɑrun sɔmbun yɑ̃kuru ko. 25 U koo kɑ yɑ̃ɑ kinɛru dɑwɑ yɑ̃ku kowon mi, te tɑ gɑ̃ɑ nin gobin sɑkɑ turɑ bu kɑ ye Yinni Gusunɔ yɑ̃kuru kuɑ. 26 Yinni Gusunɔn wuswɑɑɔrɑ yɑ̃ku kowo u koo nùn suuru kɑnɑbun wororu koosi. Yen biru Gusunɔ u koo yɛ̃ro suuru kuɑ, bɑɑ ǹ n mɛren nɑ win torɑrɑ nɛ.