1 Yinni Gusunɔ u Mɔwisi sɔ̃ɔwɑ u nɛɛ, 2 ɑ Isirelibɑ sɔ̃ɔwɔ ɑ nɛɛ, bu nùn olifin gum kɑsuo mɛ mu geɑ bo kpɑ fitilɑnu nu n kɑ sɔ̃re yokɑ bɑɑyere. 3 Aroni u koo kɑ gum mɛ dɑwɑ nɛ, Yinni Gusunɔn kuu bekurugii ten mi, beku kɑre ten wuswɑɑɔ te tɑ woodɑn kpɑkoro te gɑnuɑ. Kpɑ u de fitilɑ ni, nu n sɔ̃re yokɑn di sere yɑm mu kɑ sɑ̃rɑ. Yeni yɑ ko n sɑ̃ɑwɑ woodɑ sere kɑ ben bibun bweserɔ. 4 Aroni u koo fitilɑ ni sɔndiwɑ dɑbu wurɑguun wɔllɔ kpɑ nu n sɔ̃re wɔ̃kuru bɑɑtere sere yɑm mu kɑ sɑ̃rɑ.

5 Yinni Gusunɔ u Mɔwisi sɔ̃ɔwɑ u nɛɛ, ɑ pɛ̃ɛ wɔkurɑ yiru wɔ̃ɔwɔ yen bɑɑyere yɑ n sɑ̃ɑ kilo nɔɔbɑ tiɑ. 6 Kɑɑ ye yorewɑ nɛn wuswɑɑɔ tɑbulu wurɑgiɑ yen wɔllɔ sĩɑ yiru, yen bɑɑyere sɔɔ pɛ̃ɛ nɔɔbɑ tiɑ. 7 Sĩɑ bɑɑyeren wɔllɔ kɑɑ turɑre geɑ sɔndi kpɑ bu ye dɔ̃ɔ mɛni nɛn sɔ̃ pɛ̃ɛ yen ɑyerɔ kpɑ n bɛɛ yɑɑyɑ.

8 Tɔ̃ɔ wɛ̃rɑrugiru bɑɑtere, bɑ ko n dɑ mɑn pɛ̃ɛ yen bweseru yiiyewɑ kpɑ yɑ n yii mi bɑɑdommɑ. Yɑ ko n sɑ̃ɑwɑ woodɑ bɛɛn bibun bweseru sɔɔ sere kɑ bɑɑdommɑɔ. 9 Pɛ̃ɛ ye bɑ kɔsire kuɑ mi, yɑ ko n sɑ̃ɑwɑ Aroni kɑ win bibugiɑ. Bɑ koo ye diwɑ yɑm dɛɛrɑmɔ. Pɛ̃ɛ ye, yɑ sɑ̃ɑwɑ nɛnɛm domi nɛnɑ bɑ ye wɛ̃ sɑnɑm mɛ bɑ yɑ̃ku dɔ̃ɔ mwɑɑrɑrugiru mɔ̀. Aronin bweserɑ tɑ ko n dɑ ye di sere kɑ bɑɑdommɑɔ.

10-11 Sɔ̃ɔ teeru Isirelibɑn goo kɑ Egibitigii goon bii wì u kɑ Isireli tɔn kurɔ mɑrɑ bɑ sɑnnɑ. Kurɔ Isireli win yĩsirɑ Selomiti, Debirin bii, Dɑnun bweseru sɔɔ. Selomitin bii wi, u Gusunɔn yĩsiru gɑri kɑm gerusimɔ u bɔ̃rusimɔ. Yerɑ yɑnde bɑ kɑ nùn dɑ Mɔwisin mi. 12 Mɑ bɑ nùn yii bɑ kɑ mɑrɑ bu wɑ ye Yinni Gusunɔ u koo gere.

13 Yerɑ Yinni Gusunɔ u Mɔwisi sɔ̃ɔwɑ u nɛɛ, 14 i kɑ durɔ wi yɑrio sɑnsɑnin di. Be bɑ mɑɑ nuɑ u nɛ Yinni Gusunɔ gɑri kɑm gerusi mi, kpɑ bu ben nɔmɑ sɔndi win wirɔ bu kɑ seedɑ di kpɑ Isirelibɑ kpuro bu nùn kpenu kɑsuku bu go. 15 Yen biru woodɑ yeniwɑ kɑɑ Isirelibɑ wɛ̃ ɑ nɛɛ, wi u nɛ, Yinni Gusunɔ gɑri kɑm gerusi, yɛ̃ro u koo yen ɑre wɑ. 16 Wi u gesi nɛ, Yinni Gusunɔ gɑri kɑm gerusi, bɑ koo yɛ̃ro gowɑ. Isirelibɑ kpurowɑ bɑ koo nùn kpenu kɑsuku bu go. Bɑɑ ù n sɑ̃ɑn nɑ sɔɔ, bɑ koo nùn gowɑ yèn sɔ̃ u nɛ, Yinni Gusunɔ gɑri kɑm gerusi.

17 Goo ù n win winsim go, bɑ koo mɑɑ yɛ̃ro gowɑ. 18 Goo ù n win winsim yɑɑ sɑberu go, u koo ten kɔsire wɛ̃wɑ wɑsiru. Hundewɑ yɑ hunden kɔsire.

19 Goo ù n mɑɑ win winsim mɛɛrɑ kuɑ, mɛɛrɑ yen bweserɑ bɑ koo yɛ̃ro ko. 20 Wi u goo buɑ, bɑ koo mɑɑ yɛ̃ro buɑwɑ. Wi u goon nɔni wĩɑ, bɑ koo mɑɑ yɛ̃ron nɔni wĩɑwɑ. Wi u goon dondu buɑ, bɑ koo mɑɑ yɛ̃rogiru buɑwɑ. Kɔ̃sɑ ye tɔnu u win tɔnusi kuɑ kpuro, yerɑ bɑ koo mɑɑ nùn kɔsie.

21 Wi u yɑɑ sɑberu go, u koo ten kɔsire wɛ̃wɑ. Wi u mɑɑ tɔnu go, bɑ koo mɑɑ yɛ̃ro gowɑ.

22 Woodɑ tiɑ yerɑ bɑ koo kɑ bɛɛ kɑ bɛɛn sɔbu siri. Nɛ Gusunɔ bɛɛn Yinniwɑ nɑ ye geruɑ.

23 Mɑ Mɔwisi u Isirelibɑ kpuro ye sɔ̃ɔwɑ. Mɑ bɑ durɔ wi u Yinni Gusunɔ gɑri kɑm gerusi mi yɑrɑ sɑnsɑnin di bɑ nùn kpenu kɑsukɑ bɑ go. Nge mɛyɑ bɑ kɑ kuɑ ye Yinni Gusunɔ u Mɔwisi sɔ̃ɔwɑ.