5
Yesu ìba káakunↄ sisinaa
(Mat 4:18-22, Maa 1:16-20)
1 Zĩkea Yesu zɛna Gɛnɛsarɛti sɛ̀bɛɛ bara, akũ gbɛ̃nↄ kàkarai dasi de ò Luda yã ma yãi, òtɛn nakaraa. 2 Akũ à gó'itɛ è katɛna bara mɛ̀n pla, sↄrↄkↄnↄ bↄ̀tɛn òtɛni ń táarunↄ pípi. 3 Akũ à gɛ̃̀ gó pìnↄ do gũn kũ à de Simↄ pↄ́ ũ, à wɛ́ kɛ̀a à a yĩpa fíti, à go baraa fíti. Akũ à vùtɛ gó pìi gũn, à yã dà gbɛ̃nↄnɛ.
4 Kũ à yã ò à làka, akũ à pì Simↄnɛ: Ǹ gɛ́ kũ góo í lòkoto kpa, à birigi fã á kpↄ̀ kũ. 5 Simↄ wèa à pì: Dannɛri, o zĩ kɛ̀ ari gu gɛ̀ɛ à dↄ̀o, ódi pↄ́ke kũro, ama lákũ n ò nà, mani fã. 6 Kũ ò kɛ̀ lɛ, ò kpↄ̀ↄ kàkara yↄ̃nkↄyↄ̃nkↄ ari ń biriginↄ ye ò kɛ̃kɛ̃. 7 Akũ ò ↄ kɛ̀ yáku ń gbɛ̃dake kũ ò kú gó pì do gũnnↄnɛ, ò su ò kpáńyĩ. Kũ ò sù, ò kpↄ̀ↄ kà gó mɛ̀n pla pìnↄ pà ari ò ye ò kpátɛ. 8 Kũ Simↄ Pita è lɛ, à kùtɛ Yesu gbá sarɛ à pì: Ǹ go ma sarɛ Dikiri, zaakũ durunnakɛrin ma ũ. 9 Simↄ bídi kɛ̀ kũ gbɛ̃ kũ ò kú lɛɛlɛnↄ ń pínki kpↄ̀ dasi kũ ò kũ̀u pì yãi. 10 Lɛmɛ dↄ Yamisi kũ Yuhanao, Zebedi nɛ́ kũ ò de kↄ̃ gbɛ̃nna ũ kũ Simↄo bídi kɛ̀ se. Akũ Yesu pì Simↄnɛ: Ǹsun tó vĩna n kũro. Zaa gbãra bisãsirin ĩnigↄ̃ wɛtɛ. 11 Kũ ò kà kũ ń góo bara, akũ ò pↄ́ sĩnda pínki tòn ò tɛ̀i.
Kusu werekↄ̃anaa
(Mat 8:1-4, Maa 1:40-45)
12 Zĩkea Yesu kú wɛ̃tɛ ke gũn, akũ gↄ̃gbɛ̃ kũ kusu dàala sù. Kũ à Yesu è, à wùtɛ a kùaa, à wɛ́ kɛ̀a à pì: Dikiri, tó ń yei, ĩni fↄ̃ ǹ ma werekↄ̃a swáswa. 13 Akũ Yesu ↄ bò à nàa à pì: Má yei, ǹ gↄ̃ swáswa. Zaa gwe gↄ̃̀nↄ a kusu làka. 14 Akũ Yesu pìnɛ: Ǹsun o gbɛ̃ke maro. Ǹ gɛ́ ǹ n zĩda mↄ sa'oriinɛ, ǹ sa'opↄ kũ Musa dìtɛ kpá n werekↄ̃ana sèeda ũ gbɛ̃nↄnɛ.
15 Yesu baaruu dàgula de yãla. Gbɛ̃nↄ dìgↄ̃ kakara dasi ò a yã ma, de à ń werekↄ̃a kũ ń gyãnↄ dↄ. 16 Akũ Yesu dìgↄ̃ bo ń tɛ́ àgↄ̃ gɛ́ adua kɛ gusarɛ.
Kↄ̃̀nↄde werekↄ̃anaa
(Mat 9:1-8, Maa 2:1-12)
17 Zĩkea Yesu tɛn yã dańnɛ. Farisi kenↄ kũ ludayãdannɛri kenↄ vutɛna gwe. Ò bò Galili kũ Yudea wɛ̃tɛnↄ gũn pínki kũ Yurusalɛmuo. Luda gbãna kú kãao, akũ àtɛn gyãrenↄ werekↄ̃a. 18 Akũ gbɛ̃kenↄ sù, ò kↄ̃̀nↄde sɛna kũ wútɛbↄↄo, òtɛn zɛ́ wɛtɛ ò gɛ̃ kãao ò a ditɛ Yesu arɛ. 19 Kũ odi gɛ̃ki ero pari yãi, akũ ò dìdi kãao kpɛ́ musu, ò kpɛ́ fↄ̃̀, akũ ò a kìpa kũ a wútɛbↄↄo zàa gũn Yesu arɛ. 20 Kũ Yesu è ò a náani vĩ, à pì: Ma gbɛ̃, n durunnanↄ kɛ̃̀mma. 21 Ludayãdannɛrinↄ kũ Farisi pìnↄ ò ń nɛ̀sɛɛ gũn: Dín gbɛ̃ kũ àtɛn dↄkɛ kũ Ludao dí ũu? Dí mɛ́ ani fↄ̃ à durunna kɛ̃ḿma, tó adi kɛ Luda ado baasiroo? 22 Yesu ń laasun dↄ̃̀, akũ à ń lá à pì: Bↄ́yãi átɛn laasun bire taka lɛ́ á nɛ̀sɛɛ gũnn? 23 Tó ma pì a durunnanↄ kɛ̃̀a, ke tó ma pì à futɛ à táa o, a kpate mɛ́ à aragaa? 24 Ma ò lɛ de àgↄ̃ dↄ̃ kũ Bisãsiri Nɛ́ durunnakɛ̃mmana iko vĩ zĩtɛ lamɛ. Akũ à pì kↄ̃̀nↄde pìinɛ: Ma ònnɛ, ǹ futɛ ǹ n wútɛbↄ sɛ́ ǹ tá bɛ. 25 Gwe gↄ̃̀nↄ à fùtɛ à zɛ̀ ń wára, à a wútɛbↄↄ pìi sɛ̀ à tà bɛ, àtɛn Luda sáabu kpá. 26 Gbɛ̃ sĩnda pínki lɛ́ àtɛ, akũ ò Luda tↄ́ bↄ̀. Vĩna gũn ò pì: O daboyã è gbãra.
Levi sisinaa
(Mat 9:9-13, Maa 2:13-17)
27 Abire gbɛra Yesu bò, akũ à bɛ'ↄgↄsiri kũ òdi pinɛ Levi è vutɛna a bɛ'ↄgↄsikin. À pìnɛ: Ǹ mↄ́ ǹ tɛ́mai. 28 Akũ à fùtɛ, à pↄ́ sĩnda pínki tòn à tɛ̀i.
29 Akũ à pↄ́ble zↄ̃kↄ̃ↄ kɛ̀ a bɛa à Yesu sìsia, bɛ'ↄgↄsirinↄ kũ gbɛ̃ pãndenↄ tɛn pↄ́ ble kũńwo dasi. 30 Akũ Farisinↄ kũ ń ludayãdannɛrinↄ yãkete kà a ìbanↄi ò pì: Bↄ́yãi átɛn pↄ́ ble, átɛn í mi kũ bɛ'ↄgↄsirinↄ kũ kifirinↄoo? 31 Akũ Yesu wèḿma à pì: Gbɛ̃ kũ à aafia vĩ bàka kú kũ likita yãoro, sé gyãre. 32 Mádi su gbɛ̃ mananↄ sísi ò ń nɛ̀sɛ litɛro, sé kifirinↄ.
Lɛ́yĩna yã
(Mat 9:14-17, Maa 2:18-22)
33 Akũ ò pìnɛ: Yahaya ìbanↄ dìgↄ̃ lɛ́ yĩ, ògↄ̃ adua kɛ baala'i. Lɛmɛ kũ Farisi ìbanↄ dↄ. Ama n gbɛ̃nↄ dìgↄ̃ pↄ́ ble òdigↄ̃ í mi. 34 Akũ Yesu wèḿma à pì: Áni fↄ̃ à pi nↄsɛri gbɛ̃nↄ lɛ́ yĩ gↄrↄ kũ à kú kũńwo yá? 35 A gↄrↄ ni su kũ oni nↄsɛrii pì bo ń tɛ́. Zĩ pìian oni lɛ́ yĩ sà. 36 Yesu yã lɛ̀kↄ̃ańnɛ dↄ à pì: Gbɛ̃ke dì uta dufu li ò dì a zĩlaro. Tó ò kɛ̀ lɛ, uta dufu ni yakamɛ, a zĩ ni kↄ̃ sɛ́ kũ uta dufu nambataoro. 37 Òdi sèwɛ̃ dufu ká tùru zĩ gũnlo. Tó ò kɛ̀ lɛ, wɛ̃ dufu pì ni tùru pũtãmɛ, ani kↄ́tɛ, tùru ni yaka. 38 Oi, òdi sèwɛ̃ dufu ká tùru dufu gũmmɛ. 39 Gbɛ̃ kũ à kↄ̃ dↄ̃̀ kũ wɛ̃ zĩ minaao dì a dufu sáabu kpáro, àdi pi a zĩ mɛ́ à nna.