1 Abire gbɛra Yesu kurè wɛ̃tɛ kũ wɛ̃tɛo, lakutu kũ lakutuo, àtɛn waazi kɛ, àtɛn kpata kũ à bò Luda kĩnaa baaru nna kpáńnɛ. A zĩ̀ri gbɛ̃nↄn kuri awɛɛplanↄ gɛ̀ɛ kãao 2 kũ nↄgbɛ̃ kũ à tãnanↄ bò ń gũn à ń wérekↄ̃a kũ ń gyãnↄo. Mariama kũ òdi pinɛ dↄ Mariama Magadalɛni kũ Yesu tãna mɛ̀n supplanↄ bↄ̀tɛ a gũn kú ń tɛ́ 3 kũ Hɛrↄdu bɛgwari Kuza nanↄ Yoanao kũ Suzanao kũ nↄgbɛ̃ pãndenↄ dasi. Òdigↄ̃ Yesu kũ a ìbanↄ gwa kũ pↄ́ kũ ò vĩo.

4 Ò bò wɛ̃tɛ kũ wɛ̃tɛo ò kàkara Yesui, akũ à yã lɛ̀kↄ̃ańnɛ à pì: 5 Búbari ke mɛ́ à bò à gɛ̀ɛ pↄ́wɛ fã. Lákũ àtɛn fã nà, a kenↄ lɛ̀tɛ zɛ́ gũn ò táa òa, akũ bãnↄ sù ò blè. 6 A kenↄ lɛ̀tɛ gbɛ̀ sàraa musu. Kũ ò bùtɛ, akũ ò gàga, kũ odi mↄtↄ lero yãi. 7 A kenↄ lɛ̀tɛ lɛ̀nↄ gũn, akũ lɛ̀ɛ fùtɛ kũńwo lɛɛlɛ à nàkaraḿma. 8 A kenↄ sↄ̃ à lɛ̀tɛ zĩtɛ mana gũn, akũ ò bùtɛ ò nɛ́ ì lɛu basↄↄro. Kũ à ò lɛ, à pũ̀tã à pì: Gbɛ̃ kũ à sã vĩ à yã pì ma.

9 A ìbanↄ a là yã pì bↄkↄtɛnaai. 10 Akũ à pì: Luda á gbá zɛ́ à kpata kũ à bò a kĩnaa asirinↄ dↄ̃, ama madì o gbɛ̃ kparanↄnɛ kũ yãlɛkↄ̃anaaomɛ, de ò gu gwa pↄ́ke'enaa sari, ò yã ma a dↄ̀rↄ dↄ̃naa sari. 11 Yã pì bↄkↄtɛnaan dí: Pↄ́wɛ pì bi Luda yãmɛ. 12 Zɛ́ gũn pↄ́nↄ de lán gbɛ̃ kũ òdi Luda yã manↄ bà, akũ Ibilisi dì su à yã pìi bo ń swɛ̃̀ɛ gũn, de òsun Luda náani kɛ à ń sura baro yãi. 13 Gbɛ̀ sàraa musu pↄ́nↄ de lán gbɛ̃ kũ òdi Luda yã ma ò sí kũ pↄnnaonↄ bà, ama ò zĩni vĩro. Òdi Luda náani kɛ gↄrↄ pla, ama tó ò ń yↄ̃ ò gwà, òdi fumɛ. 14 Pↄ́wɛ kũ ò lɛ̀ɛ lɛ̀nↄ gũnnↄ de lán gbɛ̃ kũ òdi Luda yã manↄ bà, ama andunia damukɛna kũ aruzɛkɛ yão kũ pↄnnakɛnaaoo dì nakaraḿma, òdi fↄ̃ ò nɛ́ i à màro. 15 Zĩtɛ mana pↄ́nↄ de lán gbɛ̃ kũ òdi Luda yã ma kũ nɛ̀sɛpurao òdi sí kũ nɛ̀sɛmanaonↄ bà, akũ òdi mɛna fↄ̃ ari ò gɛ́ karana kɛo.

16 Òdi fitila na ò ta kútɛa ke ò ditɛ gádo gbáruro. Òdi di a dibↄↄ musumɛ, de gbɛ̃ kũ òtɛn gɛ̃nↄ gupura e yãi. 17 Pↄ́ke kú utɛna kũ oni gí boo gupurairo. Asiriyã ke kun kũ oni ma ò gí o gupuraairo. 18 Abire yãi à yã ma kũ laakariio. Gbɛ̃ kũ à pↄ́ vĩn Luda ni karanɛ. Gbɛ̃ kũ à pↄ́ke vĩro sↄ̃, bee pↄ́ kũ àtɛn da á vĩ Luda ni sía.

19 Yesu da kũ a dakũnanↄ sù a kĩnaa, akũ odi le ò nàiro pari yãi. 20 Akũ ò pìnɛ: N da kũ n dakũnanↄ kú bàai, ò ye n enaai. 21 Akũ à wèḿma à pì: Gbɛ̃ kũ òdi Luda yã ma ò zĩ kɛanↄmɛ ma da kũ ma dakũnanↄ ũ.

22 Zĩkea Yesu gɛ̃̀ gó'itɛ gũn kũ a ìbanↄ, akũ à pìńnɛ: Ò bikũ sɛ̀bɛɛ bara. Akũ ò dà zɛ́n. 23 Gↄrↄ kũ òtɛn gɛ́, i Yesu sɛ̀. Akũ zàga'ĩa fùtɛ sɛ̀bɛla, í tɛn ká gó gũn, ò kú kari gũn. 24 Akũ a ìbanↄ nài ò a vù ò pì: Dannɛri! Dannɛri! Ótɛn ká í tɛ́! Akũ à fùtɛ à gì ĩanɛ kũ í kũ àtɛni ń gó yĩpayĩpao, akũ à zɛ̀, gu kɛ̀ kítikiti. 25 Akũ à pìńnɛ: Á ma náani vĩroo? Akũ yã pìi bò ń sarɛ, vĩna ń kũ, akũ ò òkↄ̃nɛ: Dín gbɛ̃ dí ũ sɛ́ɛ? Bee ĩa kũ ío, àdi yã ditɛńnɛ, akũ àdi a yã mamɛ.

26 Akũ ò kà Gadara bùsun sɛ̀bɛɛ bara, Galili bùsu ifãboki kpa. 27 Kũ Yesu bikũ̀ í bara, à dàkarɛ kũ wɛ̃tɛ pì gↄ̃gbɛ̃ kũ à tãna vĩo. À gↄrↄ pla kɛ̀ adi pↄ́kasa naawaro. Àdigↄ̃ kú bɛro, sé miranↄ tɛ́. 28-29 Òdi a yĩ kũ mↄ̀kakↄ̃ananↄ, òdi a da lín a kũna yãi, ama àdi mↄ̀kakↄ̃anaa pìnↄ kɛ̃kɛ̃mɛ, tãna pìi dì a si sɛ̃̀n. Kũ à Yesu è, akũ à wiki lɛ̀, à sù à kùtɛ a arɛ, akũ à pũ̀tã à pì: Yesu, Luda Musude Nɛ́, bↄ́n ó vĩ kↄ̃ ↄĩi? N yã nna! Ǹsun wɛ́ tãmaro. À ò lɛ kũ Yesu ò tãna pãsĩ pì bo a gũn yãimɛ. 30 Akũ Yesu a là à pì: N tↄ́n deraa? Akũ à wèala à pì: Ma tↄ́n Dasi. Zaakũ tãnanↄn kú a gũn dasimɛ. 31 Akũ tãna pìnↄ kútɛ kɛ̀ Yesunɛ manamana ò pì, àsun ń gbarɛ ò si Zĩngo wɛ̀ɛ lòkotoo gũnlo.

32 Alɛdɛ kpàsa zↄ̃kↄ̃ kú gwe, òtɛn pↄ́ ble sĩ̀sĩgɛrɛɛi. Akũ tãna pìnↄ wɛ́ kɛ̀ Yesua à ń gba zɛ́ ò gɛ̃ ń gũn. Yesu ń gbá zɛ́, 33 akũ tãnanↄ gò gbɛ̃ pìia ò gɛ̃̀ alɛdɛnↄ gũn. Akũ alɛdɛ kpàsaa pìi wì kũ bàao, ò sòro sĩ̀sĩgɛrɛɛi ò sì sɛ̀bɛn ò gàga gwe. 34 Kũ alɛdɛdãrinↄ è lɛ, ò bàa lɛ̀ ò gɛ̀ɛ ò yã pìi bàbańnɛ wɛ̃tɛ gũn kũ buranↄ. 35 Akũ ò bↄ̀tɛ de ò yã kũ à kɛ̀ɛ pì gwa. Kũ ò sù Yesu kĩnaa, ò gbɛ̃ kũ tãnanↄ gòaa pìi è vutɛna Yesu gbá sarɛ kũ pↄ́kasao dana, à kú a laakariia. Akũ vĩna ń kũ. 36 Kũ gbɛ̃ kũ ò yã pìi è kũ wɛ́onↄ òńnɛ deran ò tãnade pìi wèrekↄ̃a nà, 37 akũ Gadara bùsu gbɛ̃nↄ pínki kútɛ kɛ̀ Yesunɛ à bo ń bùsun, zaakũ vĩna ń kũ manamana. Akũ à gɛ̃̀ gó'itɛ gũn, àtɛn tá. 38 Gbɛ̃ kũ tãnanↄ gòaa pì kútɛ kɛ̀nɛ de à tá kãao, ama Yesu gìnɛ à pì: 39 Ǹ ɛra ǹ tá n bɛa, ǹ yã kũ Luda kɛ̀nnɛ ońnɛ pínki. Akũ à tà, à yã kũ Yesu kɛ̀arɛ kpàkpaa kɛ̀ wɛ̃tɛ pìi gũn pínki.

40 Kũ Yesu ɛ̀ra à sù, akũ gbɛ̃nↄ gbãnakɛ kpài, zaakũ gbɛ̃ sĩnda pínki tɛni a dãmɛ. 41 Akũ gↄ̃gbɛ̃ kũ à de aduakɛkpɛ gbɛ̃ zↄ̃kↄ̃ ũ kũ òdi pinɛ Yairu sù à wùtɛ a kùaa Yesu gbá sarɛ, à kútɛ kɛ̀nɛ de à gɛ́ a bɛa, 42 kũ a nɛ́ mɛ̀n do légelege tɛn ga yãi. Nɛ́nↄgbɛ̃ pìi kà wɛ̃̀ kuri awɛɛpla. Kũ Yesu tɛn gɛ́, akũ pari tɛn nakaraa.

43 Nↄgbɛ̃ ke kú gwe, aru dì bↄtɛa à kà wɛ̃̀ kuri awɛɛpla. Pↄ́ kũ à vĩ pínki à dɛ̀ ɛzɛdenↄ kĩnaa, ama gbɛ̃ke dí fↄ̃ à a wèrekↄ̃aro. 44 Kũ à nà Yesui kpɛ kpa, akũ à ↄ nà a uta lɛ́a. Zaa gwe gↄ̃̀nↄ a arubↄtɛnaa zɛ̀. 45 Akũ Yesu pì: Dí mɛ́ à ↄ nàmaa? Akũ ń gbɛ̃ sĩnda pínki pì á a yã dↄ̃ro. Akũ Pita pì: Dannɛri, gbɛ̃nↄ likanyĩ òtɛn nakaramma. 46 Akũ Yesu pì: Gbɛ̃ke ↄ nàma, zaakũ má dↄ̃ kũ gbãna bò ma mɛ̀ɛ gũn. 47 Kũ nↄgbɛ̃ pìi è ò a yã dↄ̃̀, akũ à sù àtɛn lukaluka, à wùtɛ a kùaa a gbá sarɛ, akũ à yã kũ à tò à ↄ nàaa ò gbɛ̃ sĩnda pínki wára kũ lákũ à aafiaa lè nà gↄ̃̀nↄ. 48 Yesu pìnɛ: Nↄgbɛ̃, ma náani kũ n kɛ̀ mɛ́ à n werekↄ̃a. Ǹ tá bɛ aafia.

49 Kũ Yesu kpɛ́ àtɛn yã o, ò bò aduakɛkpɛ gbɛ̃ zↄ̃kↄ̃ↄ pì bɛa, ò sù ò pìnɛ: N nɛ́ pìi kɛ̀ sari, ǹsun wari dↄ dannɛriia doro. 50 Yesu yã pìi mà, akũ à pì Yairunɛ: Ǹsun tó swɛ̃̀ kɛ̃nguro. Ǹ ma náani kɛ dé, ani werekↄ̃a. 51 Kũ à kà a bɛa, adi we gbɛ̃ke gɛ̃̀ kãaoro, sé Pita kũ Yuhanao kũ Yamisio kũ nɛ́ pì de kũ a dao. 52 Gbɛ̃ kũ ò kú gwenↄ tɛn ↄ́ↄ dↄ ń pínki, òtɛni ń zĩda kɛ̃kɛ̃. Akũ Yesu pì: Ásun ↄ́ↄ dↄro. Adi garo, àtɛn i omɛ. 53 Akũ ò a lalandi kɛ̀, zaakũ ò dↄ̃̀ kũ nɛ́ pìi gà kↄ̀. 54 Yesu a kũ̀ a ↄa, akũ à pũ̀tã à pì: Nɛ́nↄkpare, ǹ vu! 55 Akũ à wɛ̃̀ndii sù, à fùtɛ gↄ̃̀nↄ. Yesu pì ò pↄ́ble kpáa. 56 Yã pìi bò nɛ́ pì de kũ a daoo sarɛ, akũ Yesu òńnɛ òsun yã kũ à kɛ̀ɛ pì o gbɛ̃ke maro.