1 Yesu pì a ìbanↄnɛ: Yã kũ àdi tó gbɛ̃nↄ fu dìgↄ̃ sariro, ama waiyoo gbɛ̃ kũ ani bo a kĩnaa. 2 Anigↄ̃ sã̀na adenɛ ò wísilↄgbɛ zↄ̃̀kↄ̃ dↄ a wakalɛ, ò a zu sɛ̀bɛɛ gũn de à tó nɛ́ dínↄ do fula. 3 Àgↄ̃ kú kũ laakariio. Tó n gbɛ̃ndo durunna kɛ̀, ǹ gɛ́ ǹ a le. Tó à a nɛ̀sɛɛ lìtɛ, ǹ sùru kɛnɛ. 4 Tó à durunna kɛ̀nnɛ gↄrↄ do gɛ̃̀n suppla, akũ à ɛ̀ra à pìnnɛ gɛ̃̀n suppla a nɛ̀sɛɛ lìtɛ, ǹ sùru kɛnɛ. 5 Dikiri zĩ̀rinↄ pìnɛ: Ǹ ó ludanaanikɛna karawɛrɛ. 6 Dikiri pì: Bee tó á Luda náani vĩ fíti lán ɛfↄ wɛ́ bà, áni o síri lí dínɛ à a zĩda wo à gɛ́ pɛ́ sɛ̀bɛɛ gũn, ani á yã ma.

7 Tó á gbɛ̃ke zↄ̀ vĩ, àtɛn sɛ̃̀ wa ke àtɛn sãnↄ dã, tó à sù kũ burao, a dikiri ni pinɛ à su à pↄ́ ble gↄ̃̀nↄn yá? 8 Oi, ani pinɛ à pↄ́ble kɛarɛ, à a uta litɛ, à suarɛ kũ pↄ́bleo kũ pↄ́minaao, àpii ni gbasa à pↄ́ ble, à í mi. 9 Òdi zↄ̀ sáabu kpá, kũ à yã kũ ò dànɛɛ kɛ̀ yãin yá? 10 Lɛmɛ ákↄ̃nↄ se, tó a yã kũ Luda dàárɛ kɛ̀ pínki, à pi: Zↄ̀nↄn ó ũ, ó zĩn o kɛ̀.

11 Kũ Yesu tɛn gɛ́ Yurusalɛmu, àtɛn kure Samaria bùsu lɛ́a kũ Galilio. 12 Kũ àtɛn gɛ̃ lakutu ken, akũ gↄ̃gbɛ̃ kusu gbɛ̃nↄn kurinↄ dàalɛ. Ò zɛ dire, 13 ò lɛ́ zùi ò pì: Dikiri Yesu, ǹ ó wɛ̃nda gwa. 14 Kũ à ń é, akũ à pìńnɛ: À gɛ́ à á zĩda mↄ sa'orinↄnɛ. Kũ òtɛn gɛ́, akũ ò wèrekↄ̃a. 15 Kũ ń gbɛ̃ do è a werekↄ̃a, akũ à ɛ̀ra à sù, àtɛn Luda sáabu kpá kũ kòto gbãnao. 16 À wùtɛ a kùaa Yesu arɛ à fↄ kpàa. Gbɛ̃ dí bi Samaria gbɛ̃mɛ. 17 Akũ Yesu pì: Gbɛ̃nↄn kurinↄ mɛ́ ò wèrekↄ̃aroo? Gbɛ̃nↄn kɛ̃ndonↄn kú máa? 18 Ń gbɛ̃ke dí ɛra à sù Luda sáabu kpáro, sé gbɛ̃ zĩ̀tↄ dí yá? 19 Akũ Yesu pìnɛ: Ǹ futɛ ǹ tá, ma náani kũ n kɛ̀ mɛ́ à n werekↄ̃a.

20 Farisinↄ Yesu là kpata kũ à bò Luda kĩnaa bona gupuraai, akũ à wèḿma à pì: Kpata kũ à bò Luda kĩnaa dì bo gupuraa ò e kũ wɛ́oro. 21 Oni pi à gwa la ke à gwa direro. Kpata kũ à bò Luda kĩnaa pì kú á tɛ́ lamɛ.

22 Akũ à pì a ìbanↄnɛ: A gↄrↄ tɛn su kũ áni Bisãsiri Nɛ́ sugↄrↄ pìnↄ doke ena ni dɛ, áni ero. 23 Oni piárɛ à kú dire ke à kú la, ama àsun gɛ́ro, àsun tɛ́ńyĩro. 24 Lákũ legũpinaa dì gupura kũ ludambɛ lɛ́ gu dín kũ a lɛ́ direkũo nà, lɛn anigↄ̃ de lɛ Bisãsiri Nɛ́ sugↄrↄa. 25 Séto à wɛ́tãmma è manamana gĩa, gbãragbɛ̃nↄ ni gíi. 26 Lákũ à de nà Nuhu gↄrↄa, lɛn anigↄ̃ de lɛ se Bisãsiri Nɛ́ sugↄrↄa. 27 Gbɛ̃nↄ tɛn pↄ́ ble, òtɛn í mi, òtɛn nↄ sɛ́, òtɛn zã kɛ ari Nuhu gɛ̀ɛ à gɛ̃̀ gó'itɛ gũn, akũ í dà anduniala, ò gàga pínki. 28 Lɛmɛ dↄ Lutu gↄrↄa, òtɛn pↄ́ ble, òtɛn í mi, òtɛn pↄ́ lú, òtɛn pↄ́ yía, òtɛn pↄ́ tↄ̃, òtɛn kpɛ́ bobo. 29 Gↄrↄ kũ Lutu bò Sↄdↄmu, tɛ́ kũ ifãntɛ̃gbↄ̃ↄo kↄ̀tɛ bona ludambɛ, akũ ò gàga pínki. 30 Lɛn anigↄ̃ de lɛ gↄrↄ kũ Bisãsiri Nɛ́ ni bo gupuraa.

31 Gↄrↄ birea gbɛ̃ kũ à kú a kpɛ́ musu sún kipa à gɛ̃ kpɛ́ gũn à pↄ́nↄ sɛ́tɛ à booro. Lɛn dↄ gbɛ̃ kũ à kpɛ́ bura sún ɛra à pↄ́ sɛ́ bɛro. 32 À tó Lutu nanↄ yã dↄágu. 33 Gbɛ̃ kũ à ye àgↄ̃ a wɛ̃̀ndi kũna ni kurai. Gbɛ̃ kũ à gì a wɛ̃̀ndiii sↄ̃, ade nigↄ̃ wɛ̃̀ndi vĩ. 34 Matɛn oárɛ, gwãani birea gbɛ̃nↄn planↄ nigↄ̃ wútɛna kↄ̃ sarɛ, oni gbɛ̃ do sɛ́ ò gbɛ̃ do tón. 35 Nↄgbɛ̃ gbɛ̃nↄn planↄ nigↄ̃ pↄ́ lↄ́lↄ gu dokↄ̃nↄa, oni gbɛ̃ do sɛ́ ò gbɛ̃ do tón. 36 Gↄ̃gbɛ̃ gbɛ̃nↄn planↄ nigↄ̃ kú bura, Luda ni gbɛ̃ do sɛ́ à gbɛ̃ do tón. 37 Akũ ò a là ò pì: Dikiri, má kpaa? À wèḿma à pì: Gu kũ gɛ̀ kún, gwen yumburukunↄ ni kↄ̃ kakaran.