1 Azumanɛnna zĩ kↄnkↄkↄnkↄ nↄgbɛ̃ pìnↄ bò ò gɛ̀ɛ mira pì kĩnaa kũ nísi gbĩ nna kũ ò a soru kɛ̀ɛo. 2 Ò lè ò gbɛ̀ɛ gò mira lɛ́a. 3 Kũ ò gɛ̃̀, odi Dikiri Yesu gɛ̀ ero. 4 Ò kú bídi gũn, akũ gↄ̃gbɛ̃ gbɛ̃nↄn pla kenↄ bò ò sùḿma kũ pↄ́kasa kũ òtɛn tɛ́ kɛnↄo dana. 5 Vĩna ń kũ ò ń mìi nàtɛ, akũ gↄ̃gbɛ̃ pìnↄ pìńnɛ: À kɛ̀ dera átɛn gbɛ̃ bɛ̃nɛ wɛtɛ gɛ̀nↄ tɛ́ɛ? 6 À kú laro, à vù. À tó yã kũ à òárɛ gↄrↄ kũ à kú Galili dↄágu 7 à pì, séto ò Bisãsiri Nɛ́ kpá kifirinↄa ò a pá lía, a gↄrↄ aakↄ̃de zĩ ani vu. 8 Akũ a yã pìi dↄ̀ńgu. 9 Bona mira kĩnaa, ò gɛ̀ɛ ò yã pì baaruu kpà zĩ̀ri gbɛ̃nↄn kuri awɛɛdonↄnɛ kũ gbɛ̃ kparanↄ. 10 Mariama Magadalɛni kũ Yoanao kũ Yamisi da Mariamao kũ nↄgbɛ̃ kpara kũ ò kú kũńwonↄ mɛ́ ò yã pìi ò zĩ̀rii pìnↄnɛ. 11 Akũ nↄgbɛ̃ pìnↄ yã pìi kɛ̀ńnɛ lán fàai yã bà, odi síro. 12 Akũ Pita fùtɛ à bàa sì à gɛ̀ɛ mira pì kĩnaa. Kũ à wɛ́ kpàtɛ mira pìn, adi pↄ́ke ero, sé táaru bizanↄ, akũ à ɛ̀ra à tà laasun gũn, yã pì a kũ̀ gbãna.

13 Gↄrↄ dokↄ̃nↄ pì zĩ Yesu ìba gbɛ̃nↄn pla kenↄ tɛn gɛ́ lakutu kũ òdi pi Ɛmausi. À zã̀ kũ Yurusalɛmuo lán kiloo kuri awɛɛdo bà. 14 Òtɛn yã kũ à kɛ̀ pínki fàai bokↄ̃nɛ, 15 akũ gↄrↄ kũ òtɛni a fàai bo òtɛni a laasun lɛ́, Yesu ń lé zɛ́n, akũ òtɛn táa o lɛɛlɛ. 16 Akũ ń wɛ́ sìsi odi a dↄ̃ro. 17 Akũ à ń lá à pì: Bↄ́ yãn á tɛ́ átɛn o kũ kↄ̃oo? Akũ ò zɛ̀ ń ãn sisina. 18 Ń gbɛ̃ do kũ òdi pinɛ Keleopa wèa à pì: Mↄkↄ̃n nibↄↄmɛ n ũ ndo Yurusalɛmu gwɛɛ, kũ ńdi yã kũ à kɛ̀ gↄrↄ pla dia dↄ̃roo? 19 Akũ à ń lá à pì: Yã kpatemɛɛ? Ò wèa ò pì: Yesu Nazɛra yãmɛ. Annabi zↄ̃kↄ̃ↄmɛ. Gbɛ̃ sĩnda pínki dↄ̃ kũ a yãkɛna kũ a yã'onaao bò Luda kĩnaamɛ. 20 Akũ sa'orikinↄ kũ ó gbãnadenↄ dake kpàḿma, de ò ga yãkpatɛ kɛnɛ yãi, akũ ò a pà lía ò a dɛ̀. 21 Ókↄ̃nↄ sↄ̃, daken ótɛn da ani Isarailanↄ mì sí. Abire gbɛra yã pì kɛna gↄrↄ aakↄ̃den gbãra. 22 Akũ yã kũ ó nↄgbɛ̃ kenↄ òo bò ó sarɛ. Kũ ò gɛ̀ɛ a mira kĩnaa kↄnkↄala káakukaaku, 23 odi a gɛ̀ lero. Ò sù ò pì malaikanↄ bò ò sùḿma ò pìńnɛ à kú wɛ̃̀ndiio. 24 Akũ ó gbɛ̃kenↄ gɛ̀ɛ ò mira pìi gwà, ò è lákũ nↄgbɛ̃ pìnↄ òńnɛ nà, à kú gwero. 25 Akũ Yesu pìńnɛ: Laasunsaridenↄ, adì yã kũ annabinↄ ò sí likalikaro. 26 Luda dí ditɛ Arumasihu wɛ́tãmma le lán dí bà gbasa à gɛ̃ a gakuri gũnloo? 27 Naana zaa Musa takadaa ari à gɛ̀ɛ pɛ́ annabinↄ pↄ́a pínki, Yesu yã kũ à kɛ̃na Luda yãn a musu bↄ̀kↄtɛńnɛ pínki.

28 Kũ ò kà kãni kũ lakutu kũ òtɛn gɛ́nwo, Yesu kɛ̀ lákũ áni gɛ̃ zɛ́la bà. 29 Akũ ò a kũ̀kũ ò pì: Ǹ gↄ̃ kũoo la. Ɔkↄsi kɛ̀, gu tɛn si. Akũ à gɛ̃̀ ↄnn à gↄ̃̀ kũńwo. 30 Gↄrↄ kũ àtɛn pↄ́ ble kũńwo, akũ à burodii sɛ̀ à arubarikaa dàn, akũ à lìkↄ̃rɛ à kpàḿma. 31 Akũ ń wɛ́ kɛ̃̀ ò a dↄ̃̀ sà, akũ ò kùrai. 32 Akũ ò òkↄ̃nɛ: Kũ àtɛn yã owɛrɛ zɛ́n àtɛn Luda yã bↄkↄtɛwɛrɛ, ó nɛ̀sɛɛ gũn tɛn puroo? 33 Akũ ò fùtɛ gwe gↄ̃̀nↄ ò ɛ̀ra ò gɛ̀ɛ Yurusalɛmu. Ò a zĩ̀ri gbɛ̃nↄn kuri awɛɛdonↄ è kakarana gwe kũ gbɛ̃ kũ ò nàḿmanↄo 34 òtɛn pi: Dikiri vù yãpuramɛ, à a zĩda mↄ̀ Simↄnɛ. 35 Akũ gbɛ̃nↄn pla pìnↄ zɛ́ gũn yã bàbańnɛ kũ deran ò a dↄ̃̀ nà burodi likↄ̃rɛnaa gũnwo.

36 Kũ òtɛn yã pì o lɛ, kãnto ò a è zɛna ń tɛ́, akũ à pìńnɛ: Àgↄ̃ kú kũ aafiaao! 37 Akũ swɛ̃̀ɛ kɛ̃̀ńgu ò kɛ̀ gìri, òtɛn da gyãwãnden ò è. 38 Akũ à pìńnɛ: À kɛ̀ dera á nɛ̀sɛɛ fùtɛɛ? À kɛ̀ dera á kú kũ nɛ̀sɛ plaoo? 39 À ma ↄnↄ kũ ma gbánↄ gwa, kũ makũmɛ. À ↄ nama à gwa. Gyãwãnde dìgↄ̃ mɛ̀ kũ wáo vĩ lákũ á èma nàro. 40 Kũ à ò lɛ, akũ à a ↄnↄ kũ a gbánↄ mↄ̀ńnɛ. 41 Pↄnna gũn odi we kãaoro, kũ à bò ń sarɛ yãi. Akũ à ń lá à pì: Pↄ́ble ke kun yá? 42 Akũ ò kpↄ̀ kpátɛana kↄ̃̀nↄↄ kpàa, 43 akũ à sì à sò ń wára. 44 Akũ à pìńnɛ: Yã kũ ma òárɛ gↄrↄ kũ má kú kãáo mɛ́ à kɛ̀. Ma pì séto yã kũ ò ò ma musu Musa doka takadan kũ annabinↄ takadao kũ Zabura takadao papa pínki. 45 Akũ à ń nɛ̀sɛɛ wɛ̃̀ńnɛ de ò yã kũ à kú takada pìnↄ gũn dↄ̀rↄ dↄ̃. 46 À pìńnɛ: Ò kɛ̃̀ Luda yãn ò pì Arumasihu ni wɛ́tãmma e, a gↄrↄ aakↄ̃de zĩ ani futɛ bona gan, 47 oni waazi kɛ buri sĩnda pínkinɛ kũ a tↄ́o naana zaa Yurusalɛmu, de ò nɛ̀sɛ litɛ ń durunnanↄ kɛ̃ḿma. 48 Ákↄ̃nↄ yã pì sèedadenↄ ũ. 49 Makũ sↄ̃, mani gba kũ ma De a lɛ́ sɛ̀ kpãzãárɛ. Àgↄ̃ kú wɛ̃tɛ gũn la ari gbãna bo ludambɛ à daála.

50 Kũ Yesu bò kũńwo wɛ̃tɛ kpɛ ari Bɛtani sarɛ, akũ à a ↄnↄ sɛ̀ lei à arubarikaa dàńgu. 51 Kũ àtɛn arubarika dańgu lɛ, akũ à kɛ̃̀ḿma, Luda a sɛ̀ à tà kãao a kĩnaa. 52 Akũ ò donyĩ kɛ̀nɛ ò ɛ̀ra ò tà Yurusalɛmu kũ pↄnna zↄ̃kↄ̃ↄo. 53 Òdigↄ̃ kú Luda ↄnn gↄrↄ sĩnda pínki ògↄ̃ Luda sáabu kpá.