Luda yã takada kũ Bisã yão MATIU 3

Yahaya Da'itɛkɛri waazikɛnaa

(Maa 1:1-8, Luk 3:1-18, Yuh 1:19-28)

1 Abire gbɛra Yahaya Da'itɛkɛrii sù Yudea gbárannan, àtɛn waazi kɛ 2 à pì: À nɛ̀sɛ litɛ, kpata kũ à bò Luda kĩnaa kà kãni. 3 A yãn annabi Isaya ò yã à pì:

À baarukparii kòto ma dↄ gbárannan,

àtɛn pi à zɛ́ kɛkɛ Dikirinɛ,

à zɛ́ térerenↄ poronɛ súsu.

4 Yahaya dìgↄ̃ pↄ́kasa kũ ò tã̀ kũ lakumi kãonↄ dana, àdi bára asa dↄ a pi. Kwa kũ zↄ́'iomɛ a pↄ́ble ũ. 5 Òdigↄ̃ bↄtɛ Yurusalɛmu kũ Yudea bùsu gu sĩnda pínkio kũ Yoda dↄ̀rↄↄiio ògↄ̃ su a kĩnaa. 6 Òdi ń durunnanↄ o gupuraa, akũ àdi ń da'itɛ kɛ Yodan.

7 Kũ Yahaya è Farisinↄ kũ Sadusinↄ tɛn su a kĩnaa dasi ò da'itɛ kɛ, akũ à pìńnɛ: Bisãsiri pitikonↄ! Dí mɛ́ à lɛ́ dàáwa à bàa sí pↄfɛ̃ kũ Luda ni kipaḿmanɛɛ? 8 À nɛ̀sɛlitɛna yã kɛ, onigↄ̃ dↄ̃ kũ a litɛ. 9 Kũ Ibrahĩ de á dizi ũ, àsungↄ̃ da kũ abirekũ mɛ́ ani á boro. Matɛn oárɛ, Luda ni fↄ̃ à gbɛ̀ dínↄ kɛ Ibrahĩ burinↄ ũ. 10 Kpása ditɛna línↄi kↄ̀. Luda ni lí kũ àdi nɛ́ mana iro zↄ̃ à zu tɛ́ gũn. 11 Matɛni á da'itɛ kɛ á nɛ̀sɛlitɛna sèeda ũmɛ, ama gbɛ̃ke ni su ma gbɛra a gbãna demala, mádi ká mà a kyate sɛ́tɛnɛro. Àkũ mɛ́ ani á da'itɛ kɛ kũ Luda Ninio kũ tɛ́o. 12 À gbaka kũna a ↄĩ ésegbɛ̃kia. Tó à fã̀, ani a pↄ́blewɛ ká a dↄ̃̀n, ani a sàko ká tɛ́ kũ àdi garo gũn.

Yesu da'itɛkɛnaa

(Maa 1:9-11, Luk 3:21-22)

13 Akũ Yesu bò Galili bùsun, à sù Yahaya kĩnaa Yodai de à a da'itɛ kɛ. 14 Yahaya ye à gí à pì: Makũ kũ má de ǹ ma da'itɛ kɛn n su ma kĩnaa yá? 15 Akũ Yesu wèa à pì: Àgↄ̃ de lɛ gĩa, zaakũ à kↄ̃ sì kũoo lɛ yã sĩnda pínki kɛna a zɛ́a yãi. Akũ à wè. 16 Kũ Yesu da'itɛ kɛ̀, à bikũ̀ gↄ̃̀nↄ. Zĩ birea ludambɛ wɛ̃̀kↄ̃a, akũ à è Luda Nini tɛn su lán potɛ̃nɛ bà à dìawa. 17 Akũ ò kòtoo mà bona ludambɛ à pì: Ma nɛ́ mɛ̀n do légelege yenyĩden dí, kũ ma pↄ nnaa manamana.

MATIU
<
3
>