Luda yã takada kũ Bisã yão MATIU 13

Yãlɛkↄ̃ana kũ pↄ́wɛfãriio

(Maa 4:1-20, Luk 8:4-15)

1 Gↄrↄ dokↄ̃nↄ pì zĩ Yesu bò bɛ à gɛ̀ɛ à vùtɛ sɛ̀bɛ lɛ́a. 2 Ò kàkarai dasidasi, akũ à gɛ̃̀ à vùtɛ gó'itɛn, gbɛ̃nↄ gↄ̃̀ sĩ̀sĩia ń pínki. 3 Akũ à yã lɛ̀kↄ̃ańnɛ dasi à pì: Búbari ke mɛ́ à bò à gɛ̀ɛ pↄ́wɛ fã. 4 Lákũ àtɛn fã nà, akũ a kenↄ lɛ̀tɛ zɛ́ gũn, bãnↄ sù ò blè. 5 A kenↄ lɛ̀tɛ gbɛ̀ sàraa musu, gu kũ à bùsu vĩ zↄ̃kↄ̃ro, akũ ò bↄ̀tɛ gↄ̃̀nↄ, kũ bùsuu gègete gwero yãi. 6 Kũ ifãntɛ̃ fùtɛ, akũ ò tɛ́ kũ̀ ò gàga, kũ ò zĩni vĩro yãi. 7 A kenↄ lɛ̀tɛ lɛ̀ɛ gũn, akũ lɛ̀ɛ fùtɛ à nàkaraḿma. 8 A kenↄ sↄ̃ ò lɛ̀tɛ zĩtɛ mana gũn, ò fùtɛ ò nɛ́ ì, a kenↄ wɛ́ basↄsↄↄro, a kenↄ baaakↄ̃kↄ̃, a kenↄ baraakurikuri. 9 Gbɛ̃ kũ à sã vĩ, à yã pì ma.

10 Akũ Yesu ìbanↄ nài, ò a là ò pì: Bↄ́yãi ntɛn yã ońnɛ kũ yãlɛkↄ̃anaao? 11 Akũ à wèḿma à pì: Luda á gbá zɛ́ à kpata kũ à bò a kĩnaa asirinↄ dↄ̃, ama adi ń gba zɛ́ro. 12 Zaakũ gbɛ̃ kũ à pↄ́ vĩn Luda ni karanɛ ari àgↄ̃ dasi. Gbɛ̃ kũ à pↄ́ke vĩro sↄ̃, bee a fíti kũ à vĩn Luda ni síamɛ. 13 Abire yãin matɛn yã ońnɛ kũ yãlɛkↄ̃anaao, de ò gu gwa pↄ́ke'enaa sari, òdi sã kpá yãmanaa sari, a dↄ̀rↄ dↄ̃naa sari.

14 Luda yã kũ annabi Isaya òo kɛ̀ḿma à pì:

onigↄ̃ sã kpá yãkemanaa sari,

onigↄ̃ gu gwa pↄ́ke'enaa sari.

15 Ò nɛ̀sɛ vĩro de òsun ↄ̃ndↄ̃ kũro yãi,

ń sã gbãna de òsun yã maro yãi,

ń wɛ́ kukurɛna de òsun gu ero yãi,

zaakũ ò ye ò arɛ dↄma mà ń gba aafiaro.

16 Arubarikadenↄmɛ á ũ kũ á wɛ́ tɛn gu e akũsↄ̃ á sã tɛn yã ma. 17 Yãpuran matɛn oárɛ, annabinↄ kũ gbɛ̃ mananↄn kun yã dasi, ò ye ò pↄ́ kũ átɛn enↄ e, odi ero, ò ye ò yã kũ átɛn manↄ ma, odi maro.

18 À pↄ́wɛfãri yã mì dↄ̃ sà. 19 Tó gbɛ̃ kpata kũ à bò Luda kĩnaa yã mà akũ adi dↄ̃ro, Setan dì su à pↄ́ kũ ò tↄ̃̀ a swɛ̃̀ɛ gũn pì síamɛ. Pↄ́wɛ kũ à lɛ̀tɛ zɛ́ gũn mìin gwe. 20 Pↄ́wɛ kũ à lɛ̀tɛ gbɛ̀ sàraaa sↄ̃, abirekũmɛ gbɛ̃ kũ à yã mà à sì gↄ̃̀nↄ kũ pↄnnao ũ. 21 Zaakũ à zĩni vĩro, àdi kɛ gↄrↄ plaro. Tó yã'ũmmana a lè ke tó ò wɛ́ tã̀a yã pì yãi, àdi fumɛ gↄ̃̀nↄ. 22 Pↄ́wɛ kũ à lɛ̀tɛ lɛ̀ɛ gũn de lán gbɛ̃ kũ à yã mà à sì bà, ama andunia yã damukɛna kũ yena aruzɛkɛiio dì nakaraa, akũ àdi gↄ̃ àree sari. 23 Pↄ́wɛ kũ à lɛ̀tɛ zĩtɛ mana gũn de lán gbɛ̃ kũ à yã pìi mà à a dↄ̀rↄ dↄ̃ bà. Àdi kɛ karana pↄ́ ũ, ń kenↄ basↄsↄↄro, kenↄ baaakↄ̃kↄ̃, kenↄ baraakurikuri.

Yãlɛkↄ̃ana kũ fↄ̃nↄo

24 Yesu yã pãnde lɛ̀kↄ̃ańnɛ à pì: Lákũ kpata kũ à bò Luda kĩnaa de nàn dí: Gbɛ̃ke ése mana tↄ̃̀ a bura. 25 Gↄrↄ kũ òtɛn i o, akũ a ibɛrɛɛ sù à fↄ̃nↄ wɛ́ fã̀ ése pìn, akũ à gɛ̃̀ zɛ́la. 26 Kũ ése nↄ̀ↄ sì, àtɛn pia, akũ fↄ̃nↄ pìi bò gupuraa. 27 Akũ burade zĩkɛrinↄ sù ò pìnɛ: Dikiri, pↄ́wɛ manan n tↄ̃̀ n buranloo? Fↄ̃nↄ gɛ̀ɛ à bò máa? 28 Akũ à pìńnɛ: Ibɛrɛ mɛ́ à abirekũ kɛ̀. Akũ zĩkɛrinↄ pìnɛ: Ń ye ò gɛ́ wotowoton yá? 29 Akũ à pì: Oi! Tó átɛn wotowoto, áni woto kũ éseomɛ. 30 À tó ò futɛ lɛɛlɛ ari pↄ́kɛ̃gↄrↄ. Mani o pↄ́kɛ̃rinↄnɛ ò fↄ̃nↄ pì kɛ̃ gĩa, ò a bàka yĩ tɛ́ pↄ́ ũ, gbasa ò ése kɛ̃ ò ká ma dↄ̃̀n.

Yãlɛkↄ̃ana kũ musadi wɛ́o

(Maa 4:30-32, Luk 13:18-19)

31 Yesu yã pãnde lɛ̀kↄ̃ańnɛ à pì: Kpata kũ à bò Luda kĩnaa de lán musadi wɛ́ kũ gbɛ̃ sɛ̀ à tↄ̃̀ a buraa bàmɛ. 32 A wɛ́ kete de pↄ́wɛnↄla pínki, ama tó à fùtɛ, àdi kɛ zↄ̃kↄ̃ de dò pↄ́nↄla pínki. Àdi lí kɛ ari bãnↄ dì su ò didi a gã̀nↄa.

Yãlɛkↄ̃ana kũ lùbɛnɛɛo

(Luk 13:20-21)

33 Yesu yã pãnde lɛ̀kↄ̃ańnɛ à pì: Kpata kũ à bò Luda kĩnaa de lán lùbɛnɛ kũ nↄgbɛ̃ sɛ̀ à kà flawa zaka lɛ́ aakↄ̃ gũn à yã̀katɛ pínki bà.

Pↄ́ kũ à tò Yesu yã lɛ̀kↄ̃ańnɛ

(Maa 4:33-34)

34 Yesu yã birenↄ ò gbɛ̃nↄnɛ kũ yãlɛkↄ̃anaao. Adi yãke ońnɛ yãlɛkↄ̃anaa sariro, 35 de yã kũ annabii ò kɛ yãi, zaakũ à pì:

Mani lɛ́ wɛ̃ mà yãlɛkↄ̃ana ońnɛ,

mani yã kũ à utɛna zaa anduniakatɛna gↄrↄ ońnɛ.

Fↄ̃nↄ yã bↄkↄtɛnaa

36 Akũ Yesu gbɛ̃nↄ tò gwe à tà bɛ. A ìbanↄ nài ò pì: Ǹ bura fↄ̃nↄ yã bↄkↄtɛ kɛwɛrɛ. 37 Akũ à pìńnɛ: Pↄ́wɛmanatↄ̃ri bi Bisãsiri Nɛ́mɛ. 38 Bura bi anduniamɛ. Pↄ́wɛ mana bi kpata kũ à bò Luda kĩnaa gbɛ̃nↄmɛ. Fↄ̃nↄ bi Setan gbɛ̃nↄmɛ. 39 Ibɛrɛ kũ à ń tↄ̃ bi Ibilisimɛ. Pↄ́kɛ̃na bi andunialakagↄrↄmɛ. Pↄ́kɛ̃rinↄ bi malaikanↄmɛ. 40 Lákũ òdi fↄ̃nↄ kɛ̃ ò ká tɛ́n nà, lɛn ani kɛ lɛ andunialakagↄrↄa. 41 Bisãsiri Nɛ́ ni a malaikanↄ gbarɛ ò gbɛ̃kɛkɛrinↄ kũ yãvãnikɛrinↄ bↄtɛ a kpata gbɛ̃nↄ tɛ́ ń pínki, 42 ò ń ká tɛ́ pãsĩ gũn. Gwen oni ↄ́ↄ dↄn ò ↄ di ń mìia. 43 Akũ gbɛ̃ mananↄ nigↄ̃ tɛ́ kɛ lán ifãntɛ̃ bà kpata kũ à bò ń De kĩnaa gũn. Gbɛ̃ kũ à sã vĩ à yã pì ma.

Yãlɛkↄ̃ana kũ aruzɛkɛo

44 Kpata kũ à bò Luda kĩnaa de lán aruzɛkɛ kũ à utɛna zĩtɛ gũn bàmɛ. Kũ gbɛ̃ke bòa, à kɛ̀kɛ à ùtɛ, akũ pↄnna gũnn à tà à pↄ́ kũ à vĩnↄ yìa pínki, akũ à zĩtɛ pìi lù.

Yãlɛkↄ̃ana kũ gbɛ̀ bɛ̀ɛrɛdeo

45 Lákũ kpata kũ à bò Luda kĩnaa de nàn dí dↄ. Lagatari mɛ́ àtɛn òso mananↄ wɛtɛ. 46 Kũ à òso ↄgↄde lè, akũ à tà à pↄ́ kũ à vĩnↄ yìa pínki, akũ à òsoo pìi lùo.

Yãlɛkↄ̃ana kũ táaruo

47 Lákũ kpata kũ à bò Luda kĩnaa de nàn dí dↄ. Ò táaru kpà sɛ̀bɛn, à kpↄ̀ buri sĩnda pínki kũ̀. 48 Kũ à pà, ò gàtɛ ò bikũ̀o bara, akũ ò vùtɛ ò a mananↄ plɛ̀plɛ ò kà tãnkon, ò a vãninↄ kↄ̀tɛ. 49 Lɛn anigↄ̃ de lɛ andunialakagↄrↄ. Malaikanↄ ni su gbɛ̃ vãninↄ sɛ́tɛ ò ń bo gbɛ̃ mananↄ tɛ́, 50 oni ń ká tɛ́ pãsĩ gũn. Gwen oni ↄ́ↄ dↄn ò ↄ di ń mìia. 51 Akũ Yesu ń lá à pì: A yã birenↄ mìi dↄ̃̀ sà pínki yá? Ò wèa ò pì: Ee! 52 Akũ à pìńnɛ: Tó yãdannɛri kpata kũ à bò Luda kĩnaa yã dàda, anigↄ̃ de lán bede kũ àdi pↄ́ dufu kũ a zĩo bo a laasii gũn bàmɛ.

Nazɛradenↄ gina Yesui

(Maa 6:1-6, Luk 4:16-30)

53 Kũ Yesu yã birenↄ lɛ̀kↄ̃ańnɛ à làka, à bò gwe, 54 à gɛ̀ɛ a bɛ wɛ̃tɛn, akũ èe yã daańnɛ ń aduakɛkpɛn. A yã bò ń sarɛ ò pì: Mákpan gↄ̃gbɛ̃ pì ↄ̃ndↄ̃ kũ daboyã birenↄ lènn? 55 Lí'ari nɛ́n díroo? A da tↄ́n Mariamaroo? A dakũnanↄn Yamisi kũ Yusufuo kũ Simↄo kũ Yudao ũroo? 56 A dãrenↄ kú kũoo laroo? À yã birenↄ lè mámɛ pínkii? 57 Akũ ò gìi. Yesu pìńnɛ: Annabii dìgↄ̃ bɛ̀ɛrɛɛ sariro, sé a bɛ wɛ̃tɛn kũ a ↄnnwo. 58 Adi daboyã kɛ gwe dasiro, kũ òtɛni a náani kɛro yãi.

MATIU
<
13
>