Luda yã takada kũ Bisã yão MATIU 15

Futɛokarayã

(Maa 7:1-13)

1 Farisinↄ kũ ludayãdannɛri kenↄ bò Yurusalɛmu ò sù Yesu kĩnaa, akũ ò a là ò pì: 2 Bↄ́yãi n ìbanↄ dìgↄ̃ ó dizinↄ futɛokarayã kũnaroo? Òdi ↄ pípi gbasa ò pↄ́ blero. 3 Akũ Yesu wèḿma à pì: Bↄ́yãin adì pã kpá Luda yãditɛnanↄa de àgↄ̃ a futɛokarayã kũnaa? 4 Zaakũ Luda pì, à á de kũ á dao bɛ̀ɛrɛ dↄ̃. À pì dↄ, gbɛ̃ kũ à a de ke a da kpe bò, ò ade dɛ. 5 Ákↄ̃nↄ sↄ̃ adì pi, tó gbɛ̃ pì a de ke a danɛ, pↄ́ kũ á vĩ à ń kpe tao gↄ̃̀ Luda pↄ́ ũ, 6 àton a de kpe taoro. Lɛmɛ adì Luda yã kɛ pã lɛ, de àgↄ̃ á futɛokarayã kũna yãi. 7 Á manafikidenↄ! Isaya annabikɛyã ò á yã musu swáswa à pì:

8 Buri bire dì bɛ̀ɛrɛ limɛnɛ kũ lɛ́omɛ,

ń swɛ̃̀ dↄmaro.

9 Òdigↄ̃ donyĩ kɛmɛnɛ pãmɛ,

bisãsiri yãzɛkpatɛn òdi dańnɛ.

Yã kũ àdi tó ò gↄ̃ gbãsĩ

(Maa 7:14-23)

10 Akũ Yesu pari sìsiai à pì: À sã kpá à yã ma. 11 Adi kɛ pↄ́ kũ àdi gɛ̃ lɛ́n mɛ́ àdi tó gbɛ̃ gↄ̃ gbãsĩro. Yã kũ àdi bo lɛ́n mɛ́ àdi tó gbɛ̃ gↄ̃ gbãsĩ. 12 Akũ a ìbanↄ nài ò pì: Ń dↄ̃ kũ Farisinↄ yã pìi mà à ń zↄ̃ ń swɛ̃̀ɛaroo? 13 Yesu wèḿma à pì: Pↄ́ kũ ma De kũ à kú musu dí tↄ̃ro oni wutɛmɛ. 14 À ń tó gwe. Vĩ̀na don'arɛdenↄmɛ! Tó vĩ̀naa gò kũna vĩ̀naanɛ, ń pla ń pínki ni zu wɛ̀ɛmmɛ. 15 Pita pìnɛ: Ǹ yã pì bↄkↄtɛwɛrɛ. 16 Akũ Yesu pì: Á laasun kpɛ́ yĩda se yá? 17 Á dↄ̃ kũ pↄ́ kũ à gɛ̃̀ lɛ́n dì tá gbɛrɛn gbasa a bo mɛ̀ gũnloo? 18 Yã kũ àdi bo lɛ́n sↄ̃ àdi bo swɛ̃̀ɛ gũmmɛ. Àkũ mɛ́ àdi tó gbɛ̃ gↄ̃ gbãsĩ. 19 Zaakũ zaa swɛ̃̀ɛ gũnn laasun vãni dì bon: Gbɛ̃dɛnaa, zinakɛnaa, pãpãkɛnaa, kpãni'onaa, ɛ́kɛtona kũ gbɛ̃sↄ̃sↄ̃naao. 20 Yã birenↄ mɛ́ àdi tó gbɛ̃ gↄ̃ gbãsĩ. Pↄ́blena ↄpipisari dì tó gbɛ̃ gↄ̃ gbãsĩro.

Nↄgbɛ̃ zĩ̀tↄ wɛ́kɛnaa

(Maa 7:24-30)

21 Akũ Yesu bò gwe, à gɛ̀ɛ Taya kũ Sidↄ̃o bùsun. 22 Kanaa nↄgbɛ̃ ke kú bùsuu pìn, à sù à wiki lɛ̀a à pì: Dikiri, Dauda Buri, ǹ ma wɛ̃nda gwa. Tãna tɛn wɛ́ tã ma nɛ́nↄkparea manamana. 23 Akũ Yesu dí wearo. A ìbanↄ nài, ò wɛ́ kɛ̀a ò pì: Ǹ pɛ́ nↄgbɛ̃ pìia, zaakũ àdigↄ̃ tɛ́wái kũ wikiomɛ. 24 Yesu wèḿma à pì: Isarailanↄ sãtɛna lán sãnↄ bàmɛ. Ń kĩnaan Luda ma zĩn ado. 25 Akũ nↄgbɛ̃ pìi sù à donyĩ kɛ̀nɛ à pì: Dikiri, ǹ kpámai. 26 Yesu pìnɛ: À mana ò nɛ́nↄ pↄ́ble sɛ́ ò zu gbɛ̃danↄnɛro. 27 Akũ nↄgbɛ̃ pìi pì: Yãpuramɛ Dikiri! Ama bee gbɛ̃danↄ dì pↄ́ble bùru kũ ò lɛ̀tɛ ń dikiri teburuu zĩtɛnↄ sɛ́sɛ. 28 Akũ Yesu wèa à pì: Nↄgbɛ̃, ń ma náani vĩ zↄ̃kↄ̃. À kɛnnɛ lákũ ń yei nà. Akũ a nɛ́nↄkpare pìi aafiaa lè gↄrↄ birea gↄ̃̀nↄ.

Yesu gyãrenↄ werekↄ̃anaa

29 Yesu bò gwe à gɛ̀ɛ àtɛn do Galili sɛ̀bɛɛi, akũ à bikũ̀ à vùtɛ sĩ̀sĩia. 30 Ò sùnɛ kũ ɛrɛnↄ kũ vĩ̀nanↄ kũ kↄ̃̀nↄdenↄ kũ sãto kpáturukunↄ kũ gyãre pãndenↄ dasidasi. Ò ń kátɛ a arɛ, akũ à ń wérekↄ̃a. 31 Kũ gbɛ̃nↄ è sãto kpáturukunↄ tɛn yã o, kↄ̃̀nↄdenↄ tɛn gↄ̃ swáswa, ɛrɛnↄ tɛn táa o, vĩ̀nanↄ tɛn gu e, yã pìi bò ń sarɛ, akũ ò Isarailanↄ Luda sáabu kpà.

Yesu pↄ́blekpana gbɛ̃nↄn dúbu siikↄ̃nↄa

(Maa 8:1-10)

32 Yesu a ìbanↄ sìsiai à pìńnɛ: Gbɛ̃ dínↄ kɛ̀mɛnɛ wɛ̃nda, zaakũ ò gĩnakɛ ò kú kũmao gↄrↄ aakↄ̃, akũ ò pↄ́ke vĩ ò blero. Má ye mà ń gbarɛ kũ nàaoro, de gu sún liḿma zɛ́nlo yãi. 33 Akũ a ìbanↄ a là ò pì: Mákpan óni pↄ́ble len sɛ̃̀ntɛpↄrↄtu la, à pari dí taka kãa? 34 Akũ Yesu ń lá à pì: Burodi mɛ̀n ũgban á vĩi? Ò pì: Mɛ̀n supplamɛ kũ kpↄ̀ kete kenↄ. 35 Akũ à pì pari vutɛ zĩtɛ. 36 Akũ à burodi mɛ̀n suppla pìnↄ sɛ̀ kũ kpↄ̀nↄ, à sáabu kɛ̀, akũ à lìlikↄ̃rɛ à kpà a ìbanↄa, ò kpà gbɛ̃nↄa. 37 Gbɛ̃ sĩnda pínki pↄ́ blè ò kã̀. Ò a kpara kũ à gↄ̃̀nↄ sɛ̀tɛ ari tãnko mɛ̀n suppla pà. 38 Gↄ̃gbɛ̃ kũ ò pↄ́ blènↄ kà gbɛ̃nↄn dúbu siikↄ̃, nↄgbɛ̃nↄ kũ nɛ́nↄ baasi. 39 Kũ Yesu gbɛ̃nↄ gbàrɛ, akũ à gɛ̃̀ gó'itɛ gũn, à gɛ̀ɛ Magadã bùsun.

MATIU
<
15
>