1 Yesu ɛ̀ra à yã lɛ̀kↄ̃ańnɛ à pì: 2 Lákũ kpata kũ à bò Luda kĩnaa de nàn dí dↄ. Kína ke mɛ́ àtɛn nↄsɛ pↄnna kɛ a nɛ́nɛ, 3 akũ à a zĩ̀rinↄ zĩ̀ ò o gbɛ̃ kũ à ń sísi ò mↄ́ pↄ́ blenↄnɛ ò mↄ́, ama ò ye ò suro. 4 Akũ à ɛ̀ra à zĩ̀ri pãndenↄ zĩ̀ à pìńnɛ: À gɛ́ à o gbɛ̃ kũ ma ń sísinↄnɛ ma sorumii mà, ma zùsanↄ kũ pↄ́kãde mɛ̀kpananↄ dɛ̀ ma kɛ̀kɛ kↄ̀. Ò mↄ́ nↄsɛpↄblekia. 5 Akũ odi laakari dↄ yã pìiaro, ń baadi gɛ̀ɛ a bↄkↄtɛ kɛ̀. Gbɛ̃kenↄ gɛ̀ɛ ń bura, gbɛ̃kenↄ gɛ̀ɛ laga tá. 6 Gbɛ̃ kparanↄ zĩ̀rii pìnↄ kũ̀kũ, ò wé'i dàḿma, ò ń dɛdɛ. 7 Akũ kína pì pↄ fɛ̃̀, à a sozanↄ gbàrɛ, ò gɛ̀ɛ ò gbɛ̃dɛrii pìnↄ dɛ̀dɛ, akũ ò tɛ́ sↄ̃̀ ń wɛ̃tɛa. 8 Akũ kína pìi pì a zĩ̀rinↄnɛ: Nↄsɛpↄble mà, ama gbɛ̃ kũ ma ń sísinↄ dí kↄ̃ síoro. 9 À gɛ́ zɛ́rankpakↄ̃anↄ gũn, à gbɛ̃ kũ a lè sĩnda pínki sísi nↄsɛpↄblea. 10 Akũ zĩ̀rii pìnↄ fùtɛ ò gɛ̀ɛ zɛ́nↄ gũn, ò gbɛ̃ kũ ò ń lénↄ kàkara, gbɛ̃ vãninↄ kũ gbɛ̃ mananↄ ń pínki. Lɛn nↄsɛ pↄnnakɛrinↄ gu pà lɛ.

11 Kũ kína pìi gɛ̃̀ à pↄnnakɛrii pìnↄ gwa, à gↄ̃gbɛ̃ ke è gwe, à nↄsɛ pↄnna uta danaro, 12 akũ à pìnɛ: Ma gbɛ̃, à kɛ̀ dera n gɛ̃ la nↄsɛ pↄnna uta danaa sarii? Akũ à yĩtɛna kítikiti. 13 Akũ kína pì a dogarinↄnɛ: À a ↄnↄ yĩ kũ a gbánↄ, à a zu bàai gusiran. Gwen oni ↄ́ↄ dↄn ò ↄ di ń mìia. 14 Zaakũ gbɛ̃ kũ Luda ń sísinↄn dasi, ama gbɛ̃ kũ à ń sɛ́nↄn dasiro.

15 Abire gbɛran Farisinↄ bò ò gɛ̀ɛ ò yã gↄ̃̀gↄ̃ lákũ oni kɛ nà ò Yesu kũ a yã'onaa gũn. 16 Akũ ò ń ìbanↄ zĩ̀a kũ Hɛrↄdu gbɛ̃nↄ ò pì: Dannɛri, ó dↄ̃ kũ gbɛ̃ yãpurademɛ n ũ. Ndì Luda zɛ́ dańnɛ súsu, ndì gbɛ̃ wɛ́ gwaro, ndì gbɛ̃ gwena gwaro. 17 Lákũ n è nà ǹ owɛrɛ. À zɛ́ vĩ ò bɛ'ↄgↄ kpá Sizaa yá, ke à zɛ́ vĩro? 18 Yesu ń nɛ̀sɛ vãni dↄ̃̀ḿma, akũ à pì: Manafikidenↄ! Bↄ́yãi átɛni ma yↄ̃ à gwaa? 19 À ↄgↄ kũ òdi bɛ'ↄgↄ kpáo mↄmɛnɛ. Akũ ò ↄgↄ pì do kpàa. 20 Akũ à ń lá à pì: Dí mì wãnzãn dí kũ a tↄ́oo? 21 Ò wèa ò pì: Siza pↄ́mɛ. Akũ à pìńnɛ: Ɛ̃hɛ̃ à pↄ́ kũ à de Siza pↄ́ ũ kpá Sizaa, á pↄ́ kũ à de Luda pↄ́ ũ kpá Ludaa. 22 Kũ ò yã pìi mà, à bò ń sarɛ, akũ ò tà ò a tò gwe.

23 Gↄrↄ dokↄ̃nↄ pì zĩ Sadusi kũ òdi pi gɛ̀nↄ dì ga à vuronↄ sù Yesu kĩnaa., akũ ò a gbɛ̀ka ò pì: 24 Dannɛri, Musa òwɛrɛ tó gↄ̃gbɛ̃ gà nɛ́'isari, a dakũna a vĩ̀ni gyaanↄ sɛ́ de à nɛ́ buri dato a vĩ̀ninɛ. 25 Tↄ̀. Dedokↄ̃nↄdenↄn kú ó tɛ́ yã gbɛ̃nↄn suppla. Woru nↄ sɛ̀, akũ à gà à nↄ pìi tò nɛ́'isari, akũ gyaanↄ gↄ̃̀ Sabinɛ. 26 À kɛ̀ Sabinɛ lɛ dↄ kũ Biↄo ari à gɛ̀ɛ pɛ́ ń suppladea. 27 Ń pínki gbɛran nↄ pìi gà se. 28 Tↄ̀! Gɛ̀nↄ vuna gↄrↄ zĩ ń gbɛ̃nↄn suppla pìnↄ tɛ́ dí mɛ́ anigↄ̃ nↄ pì vĩi? Zaakũ ń pínki ò a dↄ̃̀ nↄ ũ. 29 Akũ Yesu wèḿma à pì: A sãtɛ á Luda takada kũ a gbãnao dↄ̃naa sari yãi. 30 Tó gɛ̀nↄ vù, ò nↄ sɛ́ro, ò zã kɛro, onigↄ̃ kun lán malaikanↄn kun nà ludambɛmɛ. 31 Gɛ̀nↄ vuna yã musu ádi yã kũ Luda òárɛ kyó kɛroo? À pì 32 akãamɛ Ibrahĩ kũ Isaakuo kũ Yakubuo Luda ũ. Luda dì kɛ gɛ̀nↄ Luda ũro, gbɛ̃ bɛ̃nɛnↄ Ludamɛ. 33 Kũ gbɛ̃nↄ yã pìi mà, a yãdannɛnaa bò ń sarɛ.

34 Kũ Farisinↄ mà Yesu Sadusinↄ fù, ò kↄ̃ kàkara. 35 Akũ ń dokadↄ̃rinↄ do a yↄ̃̀ à gwa, à a là à pì: 36 Dannɛri, dokayã kpate mɛ́ à de a kparanↄlaa? 37 Yesu wèa à pì: Ǹgↄ̃ ye Dikiri n Ludai kũ nɛ̀sɛ mɛ̀n doo kũ n ninio pínki kũ n laasunnwo pínki. 38 Dokayã kũ à bɛ̀ɛrɛ vĩ de a kparanↄlan gwe. 39 A plade kũ à bòkↄ̃aon dí: Ǹgↄ̃ ye n gbɛ̃dakei lán n zĩda wɛ̃̀ndii bà. 40 Musa doka pínki kũ annabinↄ yãoo lokona dokayã mɛ̀n pla dínↄamɛ.

41 Lákũ Farisinↄ kakarana nà, Yesu ń lá à pì: 42 A è dera Arumasihu yã musuu? Dí burin a ũu? Ò wèa ò pì: Dauda burimɛ. 43 Akũ Yesu pìńnɛ: À kɛ̀ dera Luda Nini dìdi Daudaa, akũ Dauda Arumasihu sìsi Dikirii? À pì,