Luda yã takada kũ Bisã yão MAAKU 16

Yesu vunaa

(Mat 28:1-10, Luk 24:1-12, Yuh 20:1-10)

1 Kámmabogↄrↄ lakanaao ↄkↄsi Mariama Magadalɛni kũ Mariama Yamisi dao kũ Salomɛo nísi gbĩ nna lù, de ò gɛ́ ò kú Yesu mɛ̀ɛa yãi. 2 Azumanɛnna zĩ kↄnkↄkↄnkↄ ò bò òtɛn gɛ́ mira pì kĩnaa. 3 Ò kↄ̃ là zɛ́n ò pì: Dí mɛ́ ani gbɛ̀ɛ kũ̀ gbigiri kɛ à gowɛrɛ mira lɛ́a sↄ̃ↄ? 4 Zaakũ gbɛ̀ɛ pì zↄ̃kↄ̃ manamana. Kũ ò wɛ́ sɛ̀ ò gwà, akũ ò è ò gbɛ̀ɛ pì gbigiri kɛ̀ ò gò mira pì lɛ́a. 5 Kũ ò gɛ̃̀ mira pìi gũn, akũ ò kɛfɛnna ke è vutɛna ↄplai à utagyaba pura dana. Akũ ò kɛ̀ gìri. 6 À pìńnɛ: Àsun kɛ gìriro, Yesu Nazɛra kũ ò pà lían átɛn wɛtɛroo? À vù, à kú laro. À gu kũ ò a wùtɛn gwa, 7 áni gɛ́ à o a ìbanↄnɛ kũ Pitao kũ àtɛn dońnɛ arɛ gɛna Galili. Gwen oni a en lákũ à òńnɛ nà. 8 Òtɛn lukaluka, yã pìi bò ń sarɛ, akũ ò bò miran ò bàa lɛ̀. Odi yãke o gbɛ̃kenɛro kũ vĩna ń kũ yãi.

Yesu bo à suna a ìbanↄnɛ

(Mat 28:16-20, Luk 24:36-53, Yuh 20:11-23)

9 Kũ Yesu fùtɛ azumanɛnna zĩ kↄnkↄkↄnkↄ, à a zĩda mↄ̀ Mariama Magadalɛninɛ káaku. Nↄgbɛ̃ pìi gũnn Yesu pɛ̀ tãna mɛ̀n supplanↄa. 10 Akũ nↄgbɛ̃ pìi gɛ̀ɛ à ò gbɛ̃ kũ ò kú kãao yãnↄnɛ. Ń nɛ̀sɛɛ yakana òtɛn ↄ́ↄ dↄ. 11 Kũ ò mà kũ Yesu kú kũ wɛ̃̀ndiio ari nↄgbɛ̃ pì a è kũ wɛ́o, odi síro.

12 Abire gbɛra gↄrↄ kũ ń gbɛ̃nↄn planↄn tɛ́ zɛ́ gũn òtɛn gɛ́ wɛ̃tɛ gũn, à bò à sùḿma lán gbɛ̃ pãnde bà. 13 Kũ ò ɛ̀ra ò sù, ò ò gbɛ̃ kparanↄnɛ, ama odi ń yã síro. 14 Kũ à kɛ̀ saa à bò à sù a ìba gbɛ̃nↄn kuri awɛɛdonↄnɛ kũ òtɛn pↄ́ ble. Akũ à kpã̀kɛ̃ńyĩ ń sãgbãna yãi, zaakũ odi a náani kɛro akũsↄ̃ odi gbɛ̃ kũ ò a è à vùnↄ yã síro. 15 Akũ à pìńnɛ: À gɛ́ andunia gu sĩnda pínkia à ma baaru nna kpá gbɛ̃nↄnɛ ń pínki. 16 Gbɛ̃ kũ à sì akũ à da'itɛ kɛ̀ mɛ́ ani surabana le. Gbɛ̃ kũ adi sí sↄ̃ro, yã ni bo adenɛ vãni. 17 Gbɛ̃ kũ ò baaruu pìi sìnↄ yãkɛnanↄn dí: Oni tãnanↄ goḿma kũ ma tↄ́o, oni yãke buri o. 18 Oni mlɛ̃̀ sɛ́ kũ ↄo. Bee tó ò sɛwɛ mì, pↄ́ke ni ń lero. Oni ↄ na gyãrenↄa ò gbãna kũ.

Tana kũ Yesuo ludambɛ

(Luk 24:50-53, Zĩr 1:9-11)

19 Kũ Dikiri Yesu yã òńnɛ à làka, akũ Luda a sɛ̀ à tà kãao musu, akũ à vùtɛ Luda ↄplai. 20 Akũ a ìbaa pìnↄ gɛ̀ɛ ò waazi kɛ̀ gu sĩnda pínkia. Dikiri zĩ kɛ̀ kũńwo à a yã zĩni pɛ̀tɛ kũ daboyã kũ ò tɛ́inↄ.

MAAKU
<
16
>