1 Ninifugibɑ kuɑ bɔ̃rurobu.

Domi bɑ sɑ̃ɑwɑ tɔn gowobu.

Bɑ weesu yibɑ.

Mɑ bɑ kuurɑmɔ kɑ gbɑnɑ.

Bɑ rɑ n tɔmbun yɑ̃nu gurɑmɔwɑ.

2 Wee sɛnɑn dɑmusu nɔɔrɑmɔ wuu ge sɔɔ.

Wee tɑbu kɛkɛbɑn uruun wɔkinu nɔɔrɑmɔ,

mɑ dumi yi yi gɑwe yi yɔ̃ɔkumɔ.

3 Mɑɑsɔbu bɑ wee,

bɑ tɑkobibɑ kɑ yɑɑsi nɛni yi bɑllimɔ.

Wee bɑ tɔmbu mɛɛrɑ kuɑ,

mɑ gonu tɛrie bɑɑmɑ, nu ǹ gɑrirɔ.

Mɑ bɑ nu wɔrikimɔ.

4 Ninifu yɑ sɑ̃ɑwɑ nge kurɔ sɑkɑrɑ kowo kpoko.

Yɑ bwese dɑbinu yoru diisiɑ yen burɑm kɑ yen sɔrorun sɔ̃.

5 Yen sɔ̃nɑ nɛ Gusunɔ, wɔllu kɑ tem Yinni, kon ye wɔrimɑ.

Kon yen yɑberu gbɑbiɑ n kɑ yen wuswɑɑ wukiri,

kpɑ n yen tereru bwesenu sɔ̃ɔsi,

kpɑ yu sekuru wɑ.

6 Kon ye kubɑnu sure, kpɑ tɔmbu bu ye kɑ.

7 Sɑɑ yerɑ wi u ye wɑ u koo dukɑ su,

kpɑ u nɛɛ, Ninifu yɑ kuɑ bɑnsu.

Wɑrɑ u koo ye wɔnwɔndu kuɑ.

Mɑnɑ kon bu wɑ be bɑ koo ye nukuru yɛmiɑsiɑ.

8 Tebɛsi yɑ wɑ̃ɑ Nilun nim swɛɛ yi bɑ gbɑn bɔkuɔ.

Nim mu kɑ ye sikerenɛ.

Mɑ mu sɑ̃ɑ yen gbɑ̃rɑru.

Ninifu, ɑ tɑmɑɑ ɑ Tebɛsi ye sɑnɔ kere?

9 Etiopigibu kɑ Egibitigibɑ bɑ sɑ̃ɑ yen dɑm.

Putigibu kɑ Libigibu bɑ sɑ̃ɑwɑ yen somiɔbu.

10 Kɑ mɛ kpuro, yen tii yɑ yoru dɑ.

Bɑ ye mwɑ mɑ bɑ yen bibu go swɛɛ kpuro sɔɔ.

Bɑ yen wirugibu tɛtɛ toosi,

mɑ bɑ yen dɑmgibu mwɛɛrɑ bɑ yɔni doke.

11 Wunɛ Ninifu, kɑɑ nɔni sɔ̃ɔrɑwɑ,

kpɑ ɑ n sɑ̃ɑ nge wi u tɑm goore,

kpɑ ɑ kuku yeru kɑsu yibɛrɛbɑn sɔ̃ ɑ kuke.

12 Sɑɑ ye sɔɔ, wunɛn gbɑ̃rɑnu kpuro nu ko n sɑ̃ɑwɑ nge dɑ̃ɑ nìn mɑrum mu ye.

Bɑ̀ n mu sirɑ kpɑ mu wɔri wi u koo mu din nɔɔwɔ.

13 Wee wunɛn tɔmbu bɑ sɑ̃ɑ nge tɔn kurɔbu wunɛn suunu sɔɔ.

Wunɛn tem wusun kɔnnɔsu su kɛniɑrɑ mɑm mɑm yibɛrɛbɑn wuswɑɑɔ.

Mɑ dɔ̃ɔ u sin kɔkɔrɔbɑ di.

14 Bɛɛ Ninifugibu, i nim tɑkirio i yi.

Domi bɑ koo bɛɛn wuu tɑrusi.

I bɛɛn gbɑ̃rɑrun dɑm sosio.

I birikibɑ muro kpɑ i sɔndu tɑɑku i kɑ tu bɑni.

15 Bɑɑ ì n yebɑ kpuro kuɑ,

kɑ mɛ, dɔ̃ɔ u koo nɑ u bɛɛ di,

ǹ kun mɛ bu bɛɛ go kɑ tɑkobi.

Bɑ koo bɛɛ kpeerɑsiɑwɑ nge mɛ twee yi rɑ dɑ̃ɑ wurusu di.

Wee, i dɑbiɑ nge twee.

16 Bɛɛn tenkubɑ bɑ kperi dɑbiru kere.

Adɑmɑ be kpuro bɑ doonɑ

nge twee yi yi yɔ̃ɔwɑ.

17 Bɛɛn kɔ̃sobu bɑ dɑbi nge gbɑbu swɛ̃ɛ.

Bɛɛn sɔm kowobu bɑ dɑbi nge twee

yi yi sinɑ dɑ̃ɑ kikisɔ bururu.

Adɑmɑ ye sɔ̃ɔ u yɑrɑ mɑ yi yɔ̃ɔwɑ yi doonɑ,

bɑ ǹ tubɑ mi yi dɑ.

18 Wunɛ Asirin sinɑ boko,

wee wunɛn kpɑrobu bɑ dom yĩbirimɔ.

Wunɛn tɑbu durɔ dɑmgibu bɑ ǹ mɑɑ wɑsi.

Mɑ wunɛn tɔmbu bɑ yɑrinɛ yɑm kpuro guunu wɔllɔ,

goo sɑri wi u koo bu kpɑɑsinɑ.

19 Goo kun wunɛn mɛɛrɑ ye nɔɔrimɔ.

Yɑ koo nun gowɑ.

Wi u nuɑ ye yɑ nun deemɑ, u koo tɑkɑ kowɑ nuku dobun sɔ̃.

Domi goo sɑri wi ɑ ǹ nɔni sɔ̃ɔwɑ.