Luda yã takada kũ Bisã yão NARONAA 12

Miriamu kũ Harunao Musa taari'enaa

1 Miriamu kũ Harunao Musa taari è Etiopia nↄ kũ à sɛ̀ yã musu, zaakũ à Etiopia nↄ sɛ̀. 2 Ò pì: Musa adon Dikiri dìtɛ à yã ò a gãi yá? Adi o ó gãi seroo? Dikiri yã pìi mà. 3 Musa bi gbɛ̃ busɛɛmɛ, a sára kú andunia gũnlo. 4 Gwe gↄ̃̀nↄ Dikiri pì Musa kũ Harunao kũ Miriamuoonɛ: À bↄtɛ à gɛ́ dakarɛki kuta kia á gbɛ̃nↄn aakↄ̃. Akũ ò gɛ̀ɛ ń gbɛ̃nↄn aakↄ̃ ń pínki. 5 Dikiri kìpa tɛ́luku gũn à zɛ̀ kuta pì kpɛ́lɛlɛa. À Haruna kũ Miriamuo sìsi, akũ ò nài ń pla ń pínki. 6 À pìńnɛ: À ma yã ma. Tó ma annabi ke kú á tɛ́, madì bo mà sua wɛ́gupu gũn madì yã onɛ nana gũmmɛ. 7 Ama à de lɛ kũ ma zↄ̀bleri Musaoro. Zĩkɛri náanidemɛ ma ↄn gbɛ̃nↄ tɛ́ ń pínki. 8 Odì yã bo kↄ̃ lɛ́n. Madì yã onɛ mà a ke utɛnɛro. Àdi wɛ́ si ma takalɛ. À kɛ̀ dera ádi ma zↄ̀bleri Musa taari'ena vĩna kɛroo? 9 Akũ Dikiri pↄ fɛ̃̀ńyĩ à a tá o.

10 Kũ tɛ́luku pìi gò kuta pìla, kusu dà Miriamula gↄ̃̀nↄ, à pura kũ̀ lán buu bà. Kũ Haruna lìtɛ à a gwà, à è kusu dàala, 11 akũ à pì Musanɛ: N yã nna Baa! Ǹsun tó ò yↄ̃nkↄyã taarikɛnaa gbɛ̀ lero. 12 Ǹsun tó àgↄ̃ de lán nɛ́ kũ ò ì gɛ̀ ũ a mɛ̀ kpado yàkanaa bàro. 13 Musa ↄ́ↄ dↄ̀ Dikirinɛ à pì: Luda, n yã nna! Ǹ a werekↄ̃a. 14 Akũ Dikiri pìnɛ: Tó a de mɛ́ à lɛ́'i fã̀ a ãnnwa, ani kɛnɛ wé'iyã ũ ari gↄrↄ supplaroo? Ò bo kãao bùra kpɛ gↄrↄ suppla gĩa, gbasa ò a sí. 15 Miriamu kú bùra kpɛ ari gↄrↄ suppla. Isarailanↄ dí da zɛ́nlo sé kũ ò ɛ̀ra ò a sì. 16 Abire gbɛra ò fùtɛ Azero ò gɛ̀ɛ ò bùraa kàtɛ Parani gbárannan.