Luda yã takada kũ Bisã yão NARONAA 20

Í bona gbɛ̀n

(Bon 17:1-7)

1 Isarailanↄ kà Zini gbárannan ń pínki mↄ káaku gũn, akũ ò vùtɛ Kadɛsi. Gwen Miriamu gàn, ò a vĩ̀. 2 Í kun ò miro, akũ ò kàkara Musa kũ Harunaoi. 3 Ò zuka kà Musai ò pì: Tó o gaga yã kũ gbɛ̃ kũ ò gàga Dikiri arɛnↄ, de abire sã̀na. 4 Bↄ́yãi a su kũoo gbáranna díkĩnan de ò gaga la kũ ó pↄ́kãdenↄoo? 5 Bↄ́yãi a bↄtɛ kũoo Misila a su kũoo gu vãni díkĩna gũnn? Pↄ́blewɛ ke kaka lí ke geepi nɛ́ ke bísi kú laro, akũsↄ̃ í kú la ò miro. 6 Musa kũ Harunao gò paria ò gɛ̀ɛ dakarɛki kpɛ́lɛlɛa ò wùtɛ ń nɛ̀sɛlɛ kutɛna, akũ Dikiri gakuri bò à sùḿma. 7 Dikiri yã ò Musanɛ à pì: 8 Ǹ gò sɛ́, mↄkↄ̃n kũ n vĩ̀ni Harunao à gbɛ̃ pìnↄ kakara à yã o gbɛ̀si direnɛ ń wára, í ni bon. Lɛn ĩni í bońnɛ gbɛ̀ pìn ò mi lɛ kũ ń pↄ́kãdenↄ.

9 Musa gòo sɛ̀ Dikiri arɛ lákũ à ònɛ nà. 10 Musa kũ Harunao ń kákara gbɛ̀si pì arɛ, akũ à pìńnɛ: À ma á sãgbãnadenↄ! Á ye ò í boárɛ gbɛ̀ dínn yá? 11 Akũ Musa ↄ sɛ̀ musu à gbɛ̀ɛ pìi lɛ̀ kũ a gòoo gɛ̃̀n pla. Í bò manamana, akũ ò mì kũ ń pↄ́kãdenↄ. 12 Akũ Dikiri pì Musanɛ kũ Harunao: Zaakũ ádi ma náani kɛ a ma tↄ́ bò Isarailanↄnɛro, áni gɛ̃ kũńwo bùsu kũ matɛn kpáḿmanlo. 13 Mɛriba ísɛ̃bokin gwe, gu kũ Isarailanↄ zuka kàn Dikirii, akũ à a ludakɛnaa mↄ̀ńnɛ.

Ɛdↄmunↄ gina Isarailanↄnɛ ò gɛ̃tɛ ń bùsula

14 Musa gbɛ̃nↄ zĩ̀ ò bò Kadɛsi ò gɛ̀ɛ Ɛdↄmunↄ kína kĩnaa ò pì: Ókↄ̃nↄ n danɛ Isarailanↄ pì, ń wari kũ à ó lénↄ dↄ̃ pínki. 15 Ó dizinↄ gɛ̀ɛ Misila, akũ o gìi kɛ̀ gwe. Misilanↄ wari dↄ̀wá kũ ó dizinↄ. 16 O wiki lɛ̀ Dikiria, akũ à yã sì kũoo. À a Malaikaa zĩ̀ à bò kũoo Misila. Tera sà ó kú Kadɛsi, n bùsu lɛ́zɛkin. 17 Ǹ ó gba zɛ́ ò gɛ̃tɛ n bùsuua. Óni gɛ̃tɛ buranↄ ke geepi búnↄaro, óni á lↄ̀gↄ'i miro. Ónigↄ̃ tɛ́ kína zɛ́da gũmmɛ. Óni litɛ ↄplai ke ↄzɛiro ari ò gɛ́ gɛ̃tɛo n bùsula. 18 Akũ Ɛdↄmunↄ pìńnɛ: Áni le à gɛ̃tɛ ó bùsuuaro. Tó a gi, óni bo ò daálɛ kũ fɛ̃nɛdao. 19 Isarailanↄ pìńnɛ: Óni gɛ̃tɛ zɛ́daamɛ. Tó ókↄ̃nↄ ke ó pↄ́kãdenↄ á í mì, óni a fĩna bo. Gɛ̃tɛnaan ótɛn wɛtɛ ado. 20 Ɛdↄmunↄ pì: Áni le à gɛ̃tɛro. Akũ ń zĩ̀karinↄ bↄ̀tɛ dasidasi ò sù dańlɛ kũ gbãnao. 21 Zaakũ Ɛdↄmunↄ gì Isarailanↄnɛ ò gɛ̃tɛ ń bùsuua, akũ Isarailanↄ pã̀ńnɛ.

Haruna ganaa

22 Isarailanↄ bò Kadɛsi ń pínki ò kà Oru kpia 23 Ɛdↄmu bùsu lɛ́zɛkin. Gwen Dikiri yã òn Musanɛ kũ Harunao à pì: 24 Haruna ni ká a dizinↄla tera, ani gɛ̃ bùsu kũ matɛn Isarailanↄ gba gũnlo, kũ á gbɛ̃nↄn pla a gi ma yã ma zaa Mɛriba yãi. 25 Ǹ Haruna kũ a nɛ́ Ɛlɛazao sɛ́ ǹ didi kũńwo Oru kpia 26 ǹ Haruna pↄ́kasanↄ bↄtɛa ǹ da a nɛ́ Ɛlɛazanɛ gwe. Gwen Haruna ni gan à ká a dizinↄla.

27 Musa kɛ̀ lákũ Dikiri ònɛ nà. À dìdi Oru kpia gbɛ̃ sĩnda pínki wára 28 à Haruna pↄ́kasanↄ bↄ̀tɛa à dà a nɛ́ Ɛlɛazanɛ, akũ Haruna gà kpi pìi musu gwe. Kũ Musa kũ Ɛlɛazao kìpa kpi pìia 29 akũsↄ̃ Isarailanↄ mà kũ Haruna gà, akũ ò a gɛ̀ wɛ̃nda kɛ̀ gↄrↄ baraakuri.