Luda yã takada kũ Bisã yão NARONAA 23

Balamu yã káaku kũ à è onaa

1 Balamu pì Balakinɛ: Ǹ gbagbaki bomɛnɛ la mɛ̀n suppla, ǹ sumɛnɛ kũ zùsanↄ mɛ̀n suppla kũ sãkaronↄ mɛ̀n suppla. 2 Balaki kɛ̀ lákũ Balamu ònɛ nà, akũ ò sa ò kũ zùsaao kũ sãkarooo gbagbaki pìnↄa pínki. 3 Akũ Balamu pìnɛ: Ǹ zɛ n sa'opↄi. Mani gɛ́ mà gwa tó Dikiri ni su yã omɛnɛ, mani yã kũ ani omɛnɛ onnɛ. Akũ à gɛ̀ɛ à zɛ̀ gulei gbáagbaaa. 4 Luda sù à a lè, akũ Balamu pìnɛ: Ma gbagbaki bò mɛ̀n suppla, akũ ma sa òḿma pínki kũ zùsaao kũ sãkarooo. 5 Dikiri yã dànɛ a lɛ́n, akũ à pì: Ǹ ɛra ǹ gɛ́ ǹ Balaki le ǹ onɛ lákũ ma dànnɛ nà. 6 Akũ à ɛ̀ra à gɛ̀ɛ à a lè zɛna a sa'opↄi kũ Mↄabu kínanɛnↄ ń pínki, 7 akũ à yã kũ à èe ò à pì:

Mↄabunↄ kína Balaki ma sisi Siria bùsun,

akũ ma bo ifãboki kpa kpinↄ kĩnaa ma su.

À pì mà boarɛ Isarailanↄ kpɛ,

mà su mà sa vãni oarɛ Yakubu buri pìnↄnɛ.

8 Mani kɛ dera mà gbɛ̃ kũ Luda dí ń káronↄ káa?

Mani kɛ dera mà bo gbɛ̃ kũ Dikiri dí bo ń kpɛronↄ kpɛɛ?

9 Zaa kpi mìsↄ̃ntɛa matɛni ń e,

zaa gu lei musu matɛn wɛ́ sińlɛ.

Gbɛ̃ pìnↄn kú ńdona,

ò ń zĩda dìtɛ ńdona kũ buri pãndenↄ.

10 Yakubu burinↄn dasi lán bùsu'atɛ̃ bà,

oni fↄ̃ ò Isarailanↄ naro ò ń lɛ́ dↄ̃ro.

Luda tó ma ga gↄ̃ de lán a gbɛ̃nↄ pↄ́ bà,

ma lakana gↄ̃ de lán ń pↄ́ bà.

11 Akũ Balaki pìnɛ: N kɛ̀mɛnɛ deran gwee? Ma su kũnwo de ǹ ma ibɛrɛnↄ kámɛnɛ, akũ sa manan n òńnɛ yá? 12 À wèa à pì: Yã kũ Dikiri dàmɛnɛ ma lɛ́nn mani oroo?

Balamu yã plade kũ à è onaa

13 Balaki pìnɛ: Ǹ mↄ́ ò gɛ́ gu pãndea, gu kũ ĩni ń en. Ǹ ń kámɛnɛ gwe, zaakũ ń kpadomɛ ĩni e, ĩni ń e ń pínkiro. 14 Akũ à gɛ̀ɛ kãao gudãkpãrinↄ buran Pisiga kpi mìsↄ̃ntɛa. À gbagbaki bò gwe mɛ̀n suppla, akũ à sa òḿma pínki kũ zùsaao kũ sãkarooo. 15 Akũ Balamu pìnɛ: Ǹ zɛ n sa'opↄi la, mani gɛ́ mà a le gwe. 16 Akũ Dikiri sù à yã dànɛ a lɛ́n, akũ à pìnɛ: Ǹ ɛra ǹ gɛ́ ǹ Balaki le ǹ onɛ lákũ ma dànnɛ nà. 17 Akũ à ɛ̀ra à gɛ̀ɛ à a lè zɛna a sa'opↄi kũ Mↄabu kínanɛnↄo. Balaki a là à pì: Dikiri pì deramɛɛ? 18 Akũ à yã kũ à èe ò à pì:

Zipo nɛ́ Balaki,

ǹ sã kpá ǹ ma yã ma!

19 Luda bi bisãsirinlo kũ à gbasa à ɛ́kɛ to,

àdi nɛ̀sɛ litɛ lán bisãsiri bàro.

Ani gí yã kũ à ò kɛi yá?

Ani gí lɛ́ kũ à gbɛ̃̀ńnɛ papai yá?

20 À pìmɛnɛ mà sa mana ońnɛmɛ.

À arubarikaa dàńgu, mani fↄ̃ mà gíro.

21 Mádi yã vãni ke e Yakubu burinↄaro,

mádi yã'ũmmana ke e Isarailanↄaro.

Dikiri ń Luda kú kũńwo,

òdi a kíkɛ tↄ́ sɛ́ lei ń tɛ́.

22 Luda ń bↄ́tɛ Misila,

ò gbãna vĩ lán zùsɛ̃ntɛ bà.

23 Oni fↄ̃ ò pↄ́ da Yakubu burinↄaro,

oni fↄ̃ ò àlesi bɛ̃̀nɛ kpá Isarailanↄnɛro.

Zaa gbãra onigↄ̃ o ń yã musu,

yã kũ Luda kɛ̀n gwe.

24 Buri pìi dì futɛ lán músuda bà,

àdi a zĩda bi lán músusaa bà.

Àdi wútɛro ari à gɛ́ pↄ́ kũ à só,

ari à gɛ́ pↄ́ kũ à dɛ̀nↄ aru mi.

25 Balaki pìnɛ: Ǹsun ń káro. Ǹsun sa mana ońnɛ sero. 26 Balamu pìnɛ: Mádi onnɛ kũ yã kũ Dikiri dàmɛnɛn mani oroo?

Balamu yã aakↄ̃de kũ à è onaa

27 Balaki pì Balamunɛ: Ǹ mↄ́ sà, mani gɛ́ kũnwo gu pãnden. Òdigↄ̃ dↄ̃ro tó ani kɛ Ludanɛ ǹ gbɛ̃ pìnↄ kámɛnɛ gwe sà. 28 Akũ Balaki gɛ̀ɛ kãao Peo kpi musu kũ à arɛ dↄ gbárannaa. 29 Balamu pìnɛ: Ǹ gbagbaki bomɛnɛ la mɛ̀n suppla, ǹ mↄmɛnɛ kũ zùsanↄ mɛ̀n suppla kũ sãkaronↄ mɛ̀n suppla. 30 Balaki kɛ̀ lákũ à ònɛ nà à sa òḿma kũ zùsaa pìnↄ kũ sãkaroo pìnↄo.