Luda yã takada kũ Bisã yão FILIPIDENƆ 3

Kirisi dↄ̃naa

1 Ma gbɛ̃nↄ, yã kũ à gↄ̃̀n dí: À pↄnna kɛ Dikiri gũn. Mani gí yã kũ ma òárɛ gbɛ̀ sísiiro. Àkũmɛ aafia ũárɛ. 2 À laakari kɛ lɛwanna kũ̀nↄi, yãvãnikɛri kũ òdi ń kɛ yákiyaki pìnↄ! 3 Ókↄ̃nↄ kũ odì donyĩ kɛ Ludanɛ kũ a Nini gbãnao, odì ĩa dã Kirisi Yesu gũn, odì náani kpá ó zĩda yãaro, ókↄ̃nↄ mɛ́ ó tↄ̃̀zↄ̃nade yãpuranↄ ũ. 4 Makũ, má zɛ́ vĩ mà náani kpá ma zĩdaa. Tó gbɛ̃ tɛn da a a zĩda náani kɛ̀, ma a pↄ́ kɛ̀ deala. 5 Ma tↄ̃̀ↄ zↄ̃̀ ma gↄrↄ sↄraakↄ̃de zĩ. Isarailan ma ũ inaa gũn, Biliaminu buri, Eberu buri yãpura. Musa doka musu má kú Farisinↄ gã̀a gũn. 6 Ma ania kɛ̀, ma wɛ́ tã̀ sↄsi gbɛ̃nↄa. Yãkɛna a zɛ́a Musa doka gũn, gbɛ̃ke dí fↄ̃ à ma taari èro. 7 Ama yã kũ má kũna àre ũ yã pìnↄ gↄ̃̀mɛnɛ àree sari tera Kirisi yãi. 8 A kũ à deńla ma yã sĩnda pínki dìtɛ àree sari ma Dikiri Kirisi Yesu dↄ̃na kũ à de a pínkila yãi. Kirisi pì yãi ma ↄ gbàrɛ yã sĩnda pínkii bìsa ũ, de màgↄ̃ a vĩ, 9 màgↄ̃ kú a gũn kũ yã kũ dì tó ò kɛ nna kũ Ludao a náanikɛna yãiio. Luda dì tó yã bo kũńwo nna dokakũna yãinlo, àdi tó yã bo kũńwo nna Kirisi náanikɛna yãimɛ. 10 Yã kũ má yei mɛ́ à de mà Kirisi dↄ̃ kũ gbãna kũ à fùtɛo bona ganwo, de ma bàka gↄ̃ kú a warikɛnaa gũn, mà gↄ̃ lákũ a bà a ganaa gũn 11 gbasa mà gↄ̃ gàavu ũ.

Pↄ́ kũ ntɛn pɛ́a lenaa

12 Adi kɛ ma lè pínkinlo akũsↄ̃ má papana gĩaro. Matɛn pɛ́amɛ, de mà yã kũ Kirisi Yesu ma sɛ a pↄ́ ũ yãi sí ma pↄ́ ũ. 13 Ma gbɛ̃nↄ, mádi sí ma lè kↄ̀ro. Yã mɛ̀n don matɛn kɛ, madì nↄnↄ pↄ́ kũ à kú ma arɛi, pↄ́ kũ à kú ma kpɛ laasunlɛnaa sari. 14 Matɛn pɛ́ pↄ́ kũ ma wɛ́ dↄiia, de mà àre kũ Luda ó sísia gɛna musu le Kirisi Yesu gãi. 15 Ókↄ̃nↄ gbɛ̃ papananↄ, ògↄ̃ laasun bire vĩ. Tó á laasun pãnde vĩ, Luda ni á wɛ́ kɛ̃árɛ yã bire musu. 16 A pínki dé, gu kũ o kan dí, ò gɛ́ arɛ zɛ́ dokↄ̃nↄ pìi gũn.

17 Ma gbɛ̃nↄ, à ma ágba sɛ́, lákũ o a taka kɛ̀árɛ nà, á wɛ́ gↄ̃ pɛ́ gbɛ̃ kũ ń kunna kↄ̃ sìonↄi. 18 Madìgↄ̃ oárɛ yã gɛ̃̀n baaakↄ̃, akũsↄ̃ ma ɛra matɛn oárɛ tera dↄ kũ wɛ́'io, gbɛ̃nↄn kun dasi kũ ń yãkɛna ń kɛ́ Kirisi gana lía ibɛrɛnↄ ũ. 19 Ò mìi pɛ̀ kakatɛnaaa. Ń gbɛrɛmɛ ń dikiri ũ, wé'iyãmɛ ń ĩadãbↄ ũ, andunia yãn ń laasun dìgↄ̃ kúa. 20 Ókↄ̃nↄ sↄ̃, ludambɛ gbɛ̃nↄn ó ũ, ó wɛ́ dↄ Surabari kũ ani bo gwea, àkũmɛ Dikiri Yesu Kirisi ũ. 21 Ani ó mɛ̀ gbãnasarinↄ li lán a mɛ̀ gakuride bà kũ a gbãna kũ ani fↄ̃ à tó pↄ́ sĩnda pínki mì natɛarɛo.