19
1 Kunna takaside taarisaride ũ mana
de kunna yↄ̃nkↄ yãvãni'ori ũla.
2 Kokari vĩna dↄ̃naa sari manaro,
wãna zↄ̃kↄ̃ↄ dì ń kɛ̃ zɛ́amɛ.
3 Bisãsiri fayasarikɛ dì zɛ́ yakanɛ,
akũ àdi Dikiri taari e.
4 Aruzɛkɛ dì tó ò gbɛ̃nna le dasi,
takaside gbɛ̃nna dì kɛ̃amɛ.
5 Sèeda ɛ́kɛde ni bo pãro,
ɛ́kɛde ni gí wɛ́tãmma leiro.
6 Gbɛ̃ daside dì kpatableri tↄ́ nna sí,
gbɛ̃ sĩnda pínki dìgↄ̃ ye gbadari gↄ̃ de a gbɛ̃ ũmɛ.
7 Takaside danɛnↄ dì pã kpáimɛ,
oni a gbɛ̃nnanↄ kɛ̃naa o doro.
Tó àtɛn wɛtɛ à yã o kũńwo,
òdigↄ̃ kú bɛro.
8 Gbɛ̃ kũ àtɛn ↄ̃ndↄ̃ kũ ye a zĩdaimɛ,
gbɛ̃ kũ à ye laakariii dì yã mana le.
9 Sèeda ɛ́kɛde ni bo pãro,
ɛ́kɛtori ni kakatɛ.
10 Lákũ nnamanaa dí kↄ̃ sí kũ yↄ̃nkↄoro nà,
lɛn zↄ̀ kíblena zĩdadenↄa dí kↄ̃ síoro lɛ.
11 Laakaride pↄ dì fɛ̃ likaro,
lákana taarilamɛ a ĩadãbↄ ũ.
12 Kína pↄfɛ̃na de lán músu pũtãnaa bà,
a manakɛnnɛna de lán mↄtↄpisina sɛ̃̀ɛa bàmɛ.
13 Nɛ́ yↄ̃nkↄmɛ a de yakana ũ,
nↄ fìtide de lán ítↄtↄna zɛnaa sari bàmɛ.
14 Òdi bɛ kũ a aruzɛkɛo le túbi ũmɛ,
ama nↄ laakaride lenaa dì bo Dikiri kĩnaamɛ.
15 Ma'ãkɛnaa dì ń da izↄ̃kↄ̃'onan,
nàa dì gbɛ̃ gina dɛ.
16 Gbɛ̃ kũ àdi yã'onnɛna da dì a wɛ̃̀ndi dãkpã,
gbɛ̃ kũ àdi a zĩda yãkɛna daro ni ga.
17 Gbɛ̃ kũ à wɛ̃nda dↄ̃̀ takasidenɛ pↄ́ sã̀kã Dikirinɛmɛ,
àkũ mɛ́ ani a yãkɛnanↄ fĩna bonɛ.
18 Ǹ n nɛ́ toto a gↄrↄa,
ama ǹsun tó à gɛ̃ ↄla ari à garo.
19 Pↄfɛ̃ri ni fĩna bomɛ,
tó n a bò, a bona nigↄ̃ lɛ́ vĩro.
20 Ǹ lɛ́damma ma ǹ totona da,
de ǹ ↄ̃ndↄ̃ kũ arɛ yãi.
21 Laasun kú bisãsiri nɛ̀sɛn dasi,
ama yã kũ Dikiri zɛ̀o mɛ́ àdi kɛ.
22 Gbɛ̃kɛn òdi wɛtɛ bisãsiria,
takaside mana de ɛ́kɛdela.
23 Vĩnakɛna Dikirinɛ dì su kũ wɛ̃̀ndiio,
gbɛ̃ kũ à vĩ dì i o laakariio kpatɛna,
yã vãni dì a lero.
24 Ma'ãde dì a ↄ da tan
à fu pↄ́blelinaa à da a lɛ́n.
25 Ǹ lalandide gbɛ̃, yↄ̃nkↄ ni gↄ̃ laakari vĩ,
ǹ kpãkɛ̃ laakaridei, ani yã dada.
26 Nɛ́ kũ àdi a de gbɛ̃ à pɛ́ a daa nɛ́
nɛ́ gina kũ àdi wé'i daḿmamɛ.
27 Ma nɛ́, tó n kámma bò kũ lɛ́dammamanaao,
n pã yãdↄ̃naanɛn gwe.
28 Sèeda vãnide dì yãzɛde fobo,
yãvãnikɛrii dì yã vãni mↄ́mↄ vãni.
29 Gòo lokona lalandikɛrinↄla,
gbɛ̃nan yↄ̃nkↄnↄ pↄ́ ũ ń kpɛa.